Америка ‏- хитай сода талаш ‏- тартишлири давамлашмақта

2007-09-14
Елхәт
Пикир
Share
Принт

Америка- хитай сода мунасивәтлири бу йил киргәндин буян хели кәскинләшкән болуп, бу хил җиддийчилик 14- сентәбир ‏- җүмә күни хитай америкини әйибләп дуня сода тәшкилатиға әрз сунғандин кийин техиму чекигә йәтти.

Хитай дуня сода тәшкилатиға әрз сунуп, америка хитайдин импорт қилидиған қәғәз материяллириға қойған юқири баҗ түзүми үстидә америка билән сөһбәт өткүзүшни тәләп қилди. Бу хитайниң дуня сода тәшкилатиға киргәндин буян америка билән иккинчи қетим сода җәһәттә дәваға чүшүши болуп һесаблиниду.

Хитайдин киргүзүлидиған парқирақ қәғәзгә қоюлидиған баҗ өстүрүлгән

Бу йил 30- майда америка һөкүмити, хитай һөкүмитиниң өз ширкәтлириниң базарда пут тирәп турушини күчәйтиш үчүн беридиған дөләт қошумчә ярдәм пулиға җаза қоллиниш мәқситидә, хитайдин киргүзүлидиған парқирақ қәғәзгә қоюлидиған баҗни 23.19 Пирсәнттин 99.65 Пирсәнткичә өстүридиғанлиқини қарар қилған иди.

Бирләшмә агентлиқи бу һәқтә бәргән мәлуматқа қариғанда, дуня сода тәшкилатидики америка вәкили бу һәқтә тохтилишни халимиған. Әксичә, хитайниң дуня сода тәшкилатидики вәкили америкиниң бу мәзкур қарарини ' адаләтсизлик ' дәп атиған вә хитайниң дуня сода тәшкилатиға сунған әрзи үстидә тохтилип: ' бундақ илтимас сунуш хитай һөкүмитиниң һоқуқи' дегән болсиму ,хитай сунған әрзнамә һәққидә тәпсилий тохтилишни рәт қилған һәмдә хитай һөкүмитиниң қаидиси буйичә нам-шәрпини ашкарилашни халимиған.

Сузан шваб : " әқлий мүлүк һоқуқини қоғдаш һазирқи заман содисидики әң әҗәллик мәсулийәт мәсилиси"

Алдинқи йили америка- хитай сода алақисида америка тәрәптә 232.5 Милярд доллар қизил рәқәм көрүнгән болғачқа америка һөкүмити хитай билән елип берилған сода алақисидики намувапиқ тәрәпләрни тәңшәш хусусида , бу йил хитай билән икки мәртә сөһбәт өткүзгән.

Униңдин башқа, америка хитайни 2001- йили сода тәшкилатиға бәргән вәдисидә турмиди вә әқлий мүлүк һоқуқини қоғдимиди дәп, бейҗиң билән сөһбәт өткүзүшни тәләп қилған. Америка сода вәкили сузан шваб хитайниң әқлий мүлүк һоқуқини қоғдаштики йетәрсизлики түпәйли, америка ширкәтлири йилиға нәччә милярд доллар зиян тартмақта дегән вә: ' әқлий мүлүк һоқуқини қоғдаш һазирқи заман содисидики әң әҗәллик мәсулийәт мәсилиси. Һәммә дөләт бу һоқуқларни қоғдашқа кәскин муамилә қилиш керәк ' дегән иди.

Дуня сода тәшкилати хитайниң әқлий мүлүк һоқуқини қоғдаш ишлирини тәкшүрмәкчи

Шуниң билән, йеқинда америка дуня сода тәшкилатидин бир кичик гуруппа тәшкилләп, хитай әқлий мүлүк һоқуқини қоғдашта алған тәдбирләрни тәкшүрүп чиқишни тәләп қилған. Әмма, бу йил 31- авғуст хитай дуня сода тәшкилатиниң бәлгилимилиригә асасән, америкиниң тәлипини тосуп қалған болсиму, лекин америка дуня сода тәшкилатидин йәнә, юқириқи тәләпни орунлашни тәләп қилған.

Җүмә күни дуня сода тәшкилати елан қилған материяллардин ашкарилинишичә, дуня сода тәшкилати америкиниң тәлипигә асасән, 25- сентәбир бир тәкшүрүш гурупписи тәшкилләп, хитайниң әқлий мүлүк һоқуқини қоғдаш ишлирини тәкшүридикән.

Америка сиясийонлири америка-хитай сода мәсилисигә көңүл бөлмәктә

Бу йил киргәндин буян америкида йүз бәргән әрмәк һайванларниң хитайдин киргүзүлгән һайванат йемәкликидә зәһәрлинип өлүши, бихәтәрлик мәсилиси сәвәблик, маттел ширкити чиқарған хитайда ясалған балилар оюнчуқлирини йиғивелиш уқтуруши, әң муһими хитай пулиниң намувапиқ тегишиш нисбити қатарлиқлар америка-хитай сода мунасивәтлиридә муәййән йириклишишни кәлтүрүп чиқарған болуп, бу түрдики ишлар америка сиясийонлириниң җиддий көңүл болидиған мәсилисигә айланди.

16-Авғуст, кеңәш палата әзаси, 2008- йиллиқ америка президент сайлими кандидати кирс дод баянат елан илип, америка президенти җор бушни, хитайдин балилар оюнчуқ вә йемәкликләрни импорт қилишни дәрһал тохтитишқа чақирған иди.

Америка статистика идарисиниң йеңи санлиқ мәлуматиға қариғанда, америка- хитай сода алақиси җәрянида, бу йил киргәндин буянқи 8 ай ичидә көрүнгән қизил рәқәм 140 милярд доллардин ешип кәткән. (Җүмә)

Пикирләр (0)
Share
Толуқ бәт