Amérika ‏- xitay soda talash ‏- tartishliri dawamlashmaqta

2007-09-14
Élxet
Pikir
Share
Print

Amérika- xitay soda munasiwetliri bu yil kirgendin buyan xéli keskinleshken bolup, bu xil jiddiychilik 14- séntebir ‏- jüme küni xitay amérikini eyiblep dunya soda teshkilatigha erz sun'ghandin kiyin téximu chékige yetti.

Xitay dunya soda teshkilatigha erz sunup, amérika xitaydin import qilidighan qeghez matériyallirigha qoyghan yuqiri baj tüzümi üstide amérika bilen söhbet ötküzüshni telep qildi. Bu xitayning dunya soda teshkilatigha kirgendin buyan amérika bilen ikkinchi qétim soda jehette dewagha chüshüshi bolup hésablinidu.

Xitaydin kirgüzülidighan parqiraq qeghezge qoyulidighan baj östürülgen

Bu yil 30- mayda amérika hökümiti, xitay hökümitining öz shirketlirining bazarda put tirep turushini kücheytish üchün béridighan dölet qoshumche yardem puligha jaza qollinish meqsitide, xitaydin kirgüzülidighan parqiraq qeghezge qoyulidighan bajni 23.19 Pirsenttin 99.65 Pirsentkiche östüridighanliqini qarar qilghan idi.

Birleshme agéntliqi bu heqte bergen melumatqa qarighanda, dunya soda teshkilatidiki amérika wekili bu heqte toxtilishni xalimighan. Eksiche, xitayning dunya soda teshkilatidiki wekili amérikining bu mezkur qararini ' adaletsizlik ' dep atighan we xitayning dunya soda teshkilatigha sun'ghan erzi üstide toxtilip: ' bundaq iltimas sunush xitay hökümitining hoquqi' dégen bolsimu ,xitay sun'ghan erzname heqqide tepsiliy toxtilishni ret qilghan hemde xitay hökümitining qa'idisi buyiche nam-sherpini ashkarilashni xalimighan.

Suzan shwab : " eqliy mülük hoquqini qoghdash hazirqi zaman sodisidiki eng ejellik mes'uliyet mesilisi"

Aldinqi yili amérika- xitay soda alaqisida amérika terepte 232.5 Milyard dollar qizil reqem körün'gen bolghachqa amérika hökümiti xitay bilen élip bérilghan soda alaqisidiki namuwapiq tereplerni tengshesh xususida , bu yil xitay bilen ikki merte söhbet ötküzgen.

Uningdin bashqa, amérika xitayni 2001- yili soda teshkilatigha bergen wediside turmidi we eqliy mülük hoquqini qoghdimidi dep, béyjing bilen söhbet ötküzüshni telep qilghan. Amérika soda wekili suzan shwab xitayning eqliy mülük hoquqini qoghdashtiki yétersizliki tüpeyli, amérika shirketliri yiligha nechche milyard dollar ziyan tartmaqta dégen we: ' eqliy mülük hoquqini qoghdash hazirqi zaman sodisidiki eng ejellik mes'uliyet mesilisi. Hemme dölet bu hoquqlarni qoghdashqa keskin mu'amile qilish kérek ' dégen idi.

Dunya soda teshkilati xitayning eqliy mülük hoquqini qoghdash ishlirini tekshürmekchi

Shuning bilen, yéqinda amérika dunya soda teshkilatidin bir kichik guruppa teshkillep, xitay eqliy mülük hoquqini qoghdashta alghan tedbirlerni tekshürüp chiqishni telep qilghan. Emma, bu yil 31- awghust xitay dunya soda teshkilatining belgilimilirige asasen, amérikining telipini tosup qalghan bolsimu, lékin amérika dunya soda teshkilatidin yene, yuqiriqi telepni orunlashni telep qilghan.

Jüme küni dunya soda teshkilati élan qilghan matériyallardin ashkarilinishiche, dunya soda teshkilati amérikining telipige asasen, 25- séntebir bir tekshürüsh guruppisi teshkillep, xitayning eqliy mülük hoquqini qoghdash ishlirini tekshüridiken.

Amérika siyasiyonliri amérika-xitay soda mesilisige köngül bölmekte

Bu yil kirgendin buyan amérikida yüz bergen ermek haywanlarning xitaydin kirgüzülgen haywanat yémeklikide zeherlinip ölüshi, bixeterlik mesilisi seweblik, mattél shirkiti chiqarghan xitayda yasalghan balilar oyunchuqlirini yighiwélish uqturushi, eng muhimi xitay pulining namuwapiq tégishish nisbiti qatarliqlar amérika-xitay soda munasiwetliride mu'eyyen yiriklishishni keltürüp chiqarghan bolup, bu türdiki ishlar amérika siyasiyonlirining jiddiy köngül bolidighan mesilisige aylandi.

16-Awghust, kéngesh palata ezasi, 2008- yilliq amérika prézidént saylimi kandidati kirs dod bayanat élan ilip, amérika prézidénti jor bushni, xitaydin balilar oyunchuq we yémekliklerni import qilishni derhal toxtitishqa chaqirghan idi.

Amérika statistika idarisining yéngi sanliq melumatigha qarighanda, amérika- xitay soda alaqisi jeryanida, bu yil kirgendin buyanqi 8 ay ichide körün'gen qizil reqem 140 milyard dollardin éship ketken. (Jüme)

Pikirler (0)
Share
Toluq bet