Buningdin kéyin yüz béridighan bashqurulidighan bomba siniqi teywenning bolushi mumkin

2006-08-01
Élxet
Pikir
Share
Print

Roytrs agéntliqining béyjingdin xewer qilishiche, 8 ‏- ayning 1 ‏- küni, xitay hökümiti özining dölet mudapi'e ministiri sawgangchu'en arqiliq teywen'ge qarita, burun xitayning eng chong rehberliri qilip ötken sözlerni qaytidin tekrarlap qattiq teleppuz bilen agahlandurush bergen. Saw gangchu'en sözini "teywen musteqil bolush yoligha mangsa, biz hergiz qarap turmaymiz. Teywenning herxil nam astida dölitimizdin ayrip chiqip kétilishige hergiz ruxset qilmaymiz" dep qattiq teleppuz bilen éytqan. Xitayning dölet mudapi'e ministiri sawgangchu'en béyjingdiki chong xelq sariyida armiye bayrimi munasiwiti bilen chet'ellik méhmanlarni qedeh kötürüshke teklip qilghanda qilghan bu sözide yene "xitayning bir pütünlükini qoghdash bizning tüp menpe'etimiz" dep tekitligen.

Xitay: teywenning her qandaq yol bilen musteqil bolushigha qet'iy ruxset qilmaymiz

B b s ning xewer qilishiche, xitay hökümitining teywen mesililirige da'ir ikki chong ishxanisi bu yil 2 ‏- aydin bashlapla, teywen prézidénti chén shuybyenning "teywen dunya soda teshkilatigha teywen dégen nam bilen eza bolup kiridu" dégen sözige qarita we chén shuybyenning "xitay hökümitining birlikke keltürüsh dégen siyasitini emeldin qaldurush" üchün qollanmaqchi bolghan qanuniy tedbirlirige qarita tehlil yürgüzüp, "bu chén shuybyenning teywenni qanuniy yol bilen musteqil qilishqa urun'ghanliqi", "teywende dawamlishiwatqan musteqilliq heriketlerni derije örletkenliki bolup hésablinidu ", "emma biz teywenning her qandaq yol bilen musteqil bolushigha qet'iy ruxset qilmaymiz" dep sözleshke bashlighan idi. Xitayning dölet mudapi'e ministiri saw gangchu'enning bu qétimqi armiye bayrimi munasiwiti bilen qilghan sözi gerche burunqi kona sözlerni qaytidin tekrarlashtin ibaret bolsimu, emma teleppuz jehettin nahayiti qattiq éytilghan.

Teywen herbiy küchini ashurmaqta

"Xitay uchur tori"da bayan qilinishiche, teywende uzundin buyan teyyarliniwatqan urush paraxotlirigha qarshi "jesur ‏-üch" belgilik awazdin tiz uchidighan bashqurulidighan bomba sinaq qilinish aldida turuwatqanliqi uchur wastilirigha ayan idi. Yéqinda teywende chiqidighan "birleshme géziti"de bu xil bashqurulidighan bombining alliqachan teywen qisimlirining "zeper" belgilik herbiy paraxotlirigha békitilip bolghanliqigha da'ir foto resimler élan qilin'ghan.

Xongkongdiki "jongping agéntliqi"ning xewer qilishiche, teywenning bu xil bashqurulidighan bomba tetqiqati xitay hökümiti 90 ‏- yillarda teywen boghuzida bashqurulidighan bomba sinaq qilghandin kéyin bashlan'ghan iken. Hazir bu xil bashqurulidighan bomba bilen teywendin 1000 kilométir yiraqliqtiki xitay tewesidiki nishanlargha zerbe bérish mumkin. Emma teywen dölet mudapi'e ministirliqi hazirqi "jesur ‏-üch" belgilik bashqurulidighan bomba heqqide pikir bayan qilishni ret qilmaqta.

Buningdin kéyin yüz béridighan bashqurulidighan bomba siniqi teywenning bolushi mumkin

Xristi'an ilmiy zhurnilining yazghuchisi simon montlak ependining teybéyde élan qilghan mulahizi'isde bayan qilinishiche, emdi buningdin kéyin yüz béridighan bashqurulidighan bomba siniqi teywenning bolushi mumkin. Simon ependining bayan qilishiche, amérika 2001 ‏- yilidin bashlapla özining teywenni qoral bilen teminlesh heqqide bergen wedisini tekrarlap kéliwatidu. Bu jeryanda, teywenmu özini qoghdash üchün aktip mudapi'e siyasitini qollinip kelmekte. Gerche xitay hökümitining herbiy qisimlar üchün ajratqan meblighi 19 milyard amérika dollirigha yetken, hazir teywen'ge qarita teyyarlap qoyghan bashqurulidighan bombisining sani 800 din ashqan, küch sélishturmisi jehette xitay hazir teywendin yuqiri orunda tursimu, emma teywen 8 milyard amérika dolliri xamchoti asasida dölitini mudapi'e qilish üchün aktip teyyarliq körüwatidu, teywende teyyarlan'ghan "jesur ‏-üch" belgilik herbiy paraxotlargha békitidighan awazdin tiz uchidighan bashqurulidighan bomba teywen qisimlirining teywen boghuzidiki herbiy éhtiyajigha tamamen uyghun kélidu. Teywen hazir özining emeliy herikiti arqiliq xitay hökümitige "teywen mesilisini hel qilish" dégen xiyali pikir üchün töleydighan bedelni chungqur hés qildurmaqchi boluwatidu. (Weli)

Pikirler (0)
Share
Toluq bet