Тәрҗиман вә мухбир муһәммәтҗан абдулланиң муддәтсиз қамаққа һөкүм қилинғанлиқи мәлум болмақта

Хитай мәркизи телевизийә истансиси өткән йили, 5 ‏-июл вәқәси һәққидә ишлигән мәхсус программисида, мәркизи хәлқ радио истансиниң мухбири муһәммәтҗан абдулланиң 5‏-июлға четилип тутқун қилинғанлиқини ашкарилиған иди. Йеқинда муһәммәтҗан абдулланиң бир түркүм достлири радиомизға мәктуп йоллап, униң бу йил 4 ‏-айда муддәтсиз қамаққа һөкүм қилинғанлиқи һәққидә учур йәткүзди. Хәттә баян қилинған мәлуматлар вә мухбиримизниң муһәммәтҗан абдулланиң бурунқи хизмәт орнидин игилигән бир қисим мәлуматлар, униң муддәтсиз кесилгәнлик хәвириниң тоғрилиқ еһтималини күчләндүрмәктә.
Мухбиримиз шөһрәт һошур
2010-12-20
Елхәт
Пикир
Share
Принт
Тәрҗиман вә мухбир муһәммәтҗан абдулла
2009-йили
Тәрҗиман вә мухбир муһәммәтҗан абдулла 2009-йили
RFA/Shoret Hoshur

Муһәммәтҗан абдулланиң достлириниң радиомизға язған хетидин мәлум болушичә, у 1977 ‏-йили қарамайда туғулған вә қаримайда чоң болған. 2001 ‏- Йили бейҗиңдики ахбарат университетини пүттүргән. Андин мәркизи хәлқ радио истансисида 8 йил мухбир вә тәһрир болуп ишлигән. Иштин сирт вақитлирида, сәлкин торбетиниң башқурғучилиридин бири болуп вәзипә өтигән. У бултур үрүмчи вәқәсидин 2 һәптә өткәндә тутқун қилинған. Бу йил 4 ‏-айда үрүмчидә ечилған бир мәхпий сотта гүлмирә имин қатарлиқ намайиш йетәкчилири билән бирликтә муддәтсиз қамаққа һөкүм қилинған. Биз муһәммәтҗан абдулланиң муддәтсиз кесилгәнлики һәққидики учурниң тоғрилиқини ениқлаш үчүн, алди билән мәркизи хәлқ радио истансисиниң кадирлар бөлүмигә телефон қилдуқ. Мәсул хадим, әһвални баш тәһрир бөлүмидин соришимизни тәвсийә қилди. Баш тәһрир бөлүмидики мәсул хадим, муһәммәтҗан абдулланиң қанунға хилаплиқ қилғанлиқини, нөвәттә хизмәт орнида йоқлуқини, униң әһвалини қанун орунлиридин игилишимизни ейтти.

Биз үрүмчи шәһәрлик оттура сот мәһкимисигә телефон қилдуқ. Сот хадимлири худди бурунқиға охшашла әһвал һәққидә мәлумат беришни рәт қилди. Биз арқидин мәркизи хәлқ радио истансиниң уйғур бөлүмигә телефон қилдуқ.

Муһәммәтҗанниң достлириниң радиомизға язған хетидә билдүрүлүшичә, муһәммәтҗан асаслиқи сәлкин тор бетидә елан қилған надир тәрҗимә әсәрлири, муһим тәрҗимә хәвәрлири билән җамаәтчилик ичидә тонулған. 26 ‏-Июн шавгүәндә вәқә болуп, дуня уйғур қурултийи чәтәлдики уйғурларни намайишқа чақирип уқтуруш чиқарғанда, бу уқтуруш хитайчә ACNT дегән торбәттә елан қилинған. Муһәммәтҗан абдулла бу уқтурушни хитайчә торбәттин тәрҗимә қилип, сәлкин торбетигә қоюп қойған. Мәлум болушичә, мәзкур уқтурушни тәрҗимә қилип сәлкин торбетигә қойғини қутратқулуқ дәп қаралған вә униңға муддәтсиз қамақ җазаси беришкә асаслиқ сәвәб болған. Сотқа қатнашқан гуваһчилардин бириниң, соттики әйиблимиләргә асасән, муһәммәтҗан абдулланиң достлириға ашкарилишичә, мәмәтҗан абдулла шавгүән вәқәсидин кейин, бейҗиңдики бир түркүм чәтәл мухбирлириниң вәқә һәққидики, вәқәгә қарита уйғурларниң инкаслири һәққидики соаллириға җаваб бәргән. Буму униң бу қетим сот җәрянидики әйиблимиләргә пакитлардин бири болған.

У бурунму торбәтләрдә бир қисим сәзгүр темилардики хәвәрләрни тәрҗимә қилғачқа хитай дөләт бихәтәрлик күчлириниң диққәт нуқтисиға айланған.

Муһәммәтҗан абдулланиң муддәтсиз кесилгәнликини орунлар техи муәййәнләштүрмигән болсиму, әмма муһәммәтҗан абдулла һәққидики юқириқи мәлуматлар вә уйғур елиниң нөвәттики вәзийити, униң муддәтсиз кесилгәнлик еһтималлиқини күчләндүрмәктә.

Пикирләр (0)
Share
Толуқ бәт