Мәрһум турғун алмасниң ахирәтлики қандақ өткән?

2007-09-12
Елхәт
Пикир
Share
Принт

TurghunAlmas-150.jpg
Турғун алмас әпәндиниң яш вахтидики сүрити. Photo from Wikipedia

Уйғур хәлқиниң пәхирлик оғлани, тарихшунас турғун алмас әпәнди 2001- йили 11- сентәбир күни сүбһидә үрүмчи шәһиридики уйғур тебабәт дохтурханисида кесәл сәвәби билән өзи сөйгән ана макандин мәңгүлүк видалашти.

Мәрһумниң өлүм хәвири һөкүмәт тармақлириға йәткәндин кийин, һөкүмәт хәлққә бесим ишлитип мәрһумниң мейитини дәрһал узитиветиш һәмдә органлар вә башқа мунасивәтлик идарә -җәмийәтләрниң мәрһумниң мейит намизиға қатнашмаслиқи хусусида буйруқ чүшүргән болсиму, әмма хәлқ қәлбидин әбәдий алий орунға еришкән турғун алмасниң ахирәтлики, хитай һөкүмити көрүшни әң халимайдиған рәвиштә елип берилди.

Хәлқ өзгичә шәкилдә мәрһумға өз һөрмитини билдүрүшкән иди

Гәрчә хитайниң уйғур елидики ахбарат органлиридин нә телевизор, нә бирәр йәрлик гезитиниң бир бурҗикидиму, мәрһумниң өлүмигә атап иккилик хәвәр яки бир мәрсийә ‏- қәсидиләр берилмигән болсиму, лекин турғун алмасниң мейити толиму алаһидә узитилған болуп, хәлқ өзгичә шәкилдә мәрһумға өз һөрмитини билдүрүшкән иди.

Турғун алмас әпәнди җан үзгән күни дадисиниң бешида болған оғли мурат алмас әпәнди шу күнки әһвални әсләп: " һөкүмәт дадамниң мейитини тиз дин қоюветиш һәққидә бесим ишләткән иди" дәйду.

Мәрһумниң ахирәтлик ишлириниң тәпсилатидин хәвәрдар затлар турғун алмасниң аләмдин өткәнлик хәвириниң пәқәт ноғай мәсчит темиға чаплап қоюлған уқтуруштин билгәнликини әсләшти. Һазир германийидә яшаватқан яш язғучи, тәтқиқатчи күрәш атихан әйни вақитта үрүмчидә хәлқ нәшрятида муһәррир болуп ишләйдиған болуп, у шу күндики ишларни әсләп, шу күни һөкүмәтниң турғун алмасниң өлүм хәвирини тизгинләш үчүн көп күч сәрп қилғанлиқини билдүрди.

Түркийидики шәрқий түркистан вәхписи турғун алмасниң роһиға атап хәтмә- қуран оқутқан

Түркийидики шәрқи түркистан вәхписиниң ишхана мудири һамут көктүркниң билдүрүшичә, турғун алмас әпәндиниң өлүм хәвири түркийигә йетип кәлгәндин кийин, түркийидики уйғур җамаити мусибәткә чөмгән һәмдә түркийидики шәрқий түркистан вәхпиниң башлиқи генерал мәһәммәт ризабекинниң орунлаштуруши билән турғун алмасниң роһиға атап хәтмә- қуран оқутқан вә нәзирә бәргән. Мәлум болушичә, шу қетимлиқ нәзиргә 200 дин артуқ адәм қатнашқан.

Мәрһумниң симаси хәлқ арисида мәңгү заһирдур

Гәрчә, турғун алмас әпәнди көз юмғили 6 йил болған болсиму, әмма мәрһумниң қамәтлик симаси, у йезип қалдурған тарихи китабларда, шеир мисралирида, болупму өзи язған, мәшһур уйғур музикант, хәлқ артиси зикир әлпәттаһ музикисини ишлигән "тәнлирим япрақ" намлиқ нахшида һәрдәм заһир болуп туриду. (Җүмә)

Пикирләр (0)
Share
Толуқ бәт