100 Уйғур оқуғучи түркийиниң оқуш ярдәм пулиға еришти

8-Айниң 31-күнидин башлап түркийиниң оқуш ярдәм пулиға еришкән яки еришәлмигән оқуғучиларға уқтуруш тарқитилишқа башлиған болуп, өткән һәптә ахирлашти.
Ихтиярий мухбиримиз әркин тарим
2012-09-10
Елхәт
Пикир
Share
Принт
Гази университетиниң оқуғучи қобул қилиш тоғрисидики чүшәндүрүш. 2012-Йили сентәбир, түркийә.
Гази университетиниң оқуғучи қобул қилиш тоғрисидики чүшәндүрүш. 2012-Йили сентәбир, түркийә.
RFA/Erkin Tarim

Түркийидики университетларға қобул қилинған уйғур оқуғучиларниң сани җәмий 100 болуп, буларниң атмиши уйғур дияридин, қириқи түркийигә өткән йили вә бу йил кәлгән оқуғучилардин қобул қилинған. Оқуш мукапат пулиға еришкәнләрниң хушаллиқи, еришәлмигәнләрниң көңүл ғәшликини сөз билән тәсвирләп бериш һәқиқәтән қийин. Лекин иш буниң билән түгимиди, оқуш мукапат пулиға еришәлмигәнләрниң оқуш мукапатисиз болсиму бирәр мәктәпкә кирип оқуш пурсәтлири һелиму һәм бар болуп, уйғур әрбаблири вә уйғур оқуғучиларниң ортақ тиришчанлиқи билән бу өткәлдин өтүп кетиши мумкин. Әмдики мәсилә, бир мәктәпкә кирип оқуған билән айлиқ турмуш расхотини қандақ һәл қилиш мәсилисидур. Түркийидә бу һәқтиму нурғун пурсәтләр уйғур оқуғучиларни күтүп турупту, уйғур оқуғучилар бир күн болсиму бурун һәрикәткә өтүп, шу пурсәтләрдин пайдилинишқа тиришмиса, йәнә шу турмуш қийинчилиқи түпәйлидин техи оқуш башлимай турупла бешиға ғәм чүшидиғанлиқи һәммәйләнгә аян. Төвәндә биз түркийидә йиллардин бери оқуғучиларға ярдәм қилип келиватқан яки өсүмсиз қәрз берип келиватқан сахавәт органлири, вәхпә-җәмийәтләрниң бәзилирини тонуштурмақчимиз, әлвәттә ярдәм қилидиған орунлар булар биләнла чәклинип қалмайду.

Оқуш ярдәм пулиға еришиш үчүн тиришчан вә еһтияҗлиқ болуш керәк. Түркийидики һәрқайси иҗтимаий вә мәмурий җәмийәтләр нәтиҗә қазанған вә ярдәмгә еһтияҗи болған оқуғучиларға маддий ярдәм бериду. Университет оқуғучилириға оқуш ярдәм пули беридиған иҗтимаий вә мәмурий органлар вә җәмийәтләр төвәндикиләр:
1. юртлар қуруми – kredi ve yurtlar kurumu илтимас қилиш тор бәт адреси:
www.kyk.gov.tr. Оқуғучилар мушу тор бәт адреси арқилиқ оқуш ярдәм пулиға тизимлатса болиду. юртлар қуруминиң айлиқ ярдәм пули соммиси 260 лира. Тәхминән 150 долларға тоғра келиду.
2. Түрк маарип вәхписи-Türk Eğitim Vakfı TEV. Бу йил дөләт ичидин җәмий 9500 оқуғучиға оқуш ярдәм пули бериду. Тизимлитиш адреси: www.tev.org.tr . Тизимлитиш муддити 9-айниң 22-күни аяғлишиду.
3. Вәһби көч вәхиписи-Vehbi Koç Vakfı. Бу вәхпә он миң оқуғучини оқуш ярдәм пули билән тәминләшни пиланлаватиду. Оқуғучилар мәктәптә тизимға алдурғанда оқуғучилар ишлири башқармиси  (öğrenci işleri)дин бу вәхипиниң ярдәм пули үчүн тизимлатса болиду.
4. Сабанҗи вәхписи-Sabancı Vakfı. Сабанҗи вәхиписи бу вәхиптин ярдәм пули еливатқан оқуғучиларға һәрйили 380 оқуғучи қошуп маңиду. Һәрайда 310 лира (тәхминән 180 доллар) оқуш ярдәм пули билән тәминләйду. 9-Айниң 14,15-күнлири өз мәктипиниң оқуғучилар ишлири башқармисиға тизимлитиш арқилиқ сабанҗи вәхипиниң оқуш ярдәм пулини илтимас қилса болиду.
5. Түркийә диянәт вәхиписи-Türkiye Diyanet Vakfı. Бу вәхипә түрк җумһурийәтлиридин кәлгән оқуғучиларни асас қилған һалда оқуш ярдәм пули билән тәминләйду. Тизимлитиш адреси: diyanet.gov.tr
6. Анатолийә вәхиписи-Anadolu Vakfı. Бу вәхип һәр айда 250 лира оқуш ярдәм пули билән тәминләйду. Почта йоли билән оқуш ярдәм пули илтимас қилиниду. Илтимас қилиш муддити 9-айниң 1-күнидин 30-күнигичә. Почта адреси вә илтимас қилишқа керәклик материяллар ушбу тор бетидә техиму ениқ берилгән. http://www.anadoluvakfi.org.tr/burs-basvuru-ve-degerlendirme-sureci.aspx
7. Һүсәйн өзйеғин вәхписиHüseyin Özyeğin Vakfı. Бу вәхипә тәхминән 550 оқуғучини оқуш ярдәм пули билән тәминләйду. Тизимлитиш вақти 9-айниң 15-күнидин 10-айниң 15-күнигичә. Бу вәхипиниң оқуш ярдәм пулини пәқәтла истанбулда дөләт игиликидики университетларда оқуйдиған оқуғучилар илтимас қилалайду.Оқуғучилар мәктәпкә тизимлитип болғандин кейин вәхипигә берип биваситә оқуш ярдәм пулини илтимас қилса болиду.
8. Бәрикәт вәхиписи-Bereket Vakfı. Университет вә доктор оқуғучиларға оқуш ярдәм пули бериду. Тизимлитиш 9-айниң 23-күнидин 30-күнигичә вәхипиниң тор бетидә елип берилиду.
9. Әнсар вәхиписи-Ensar Vakfı. Тизимлитиш вақти вә шәртлирини вәхипиниң тор бәт адресидин тәкшүргили болиду.
Булардин сирт, түркийә пән техника тәтқиқат қуруми-TÜBİTAK, истанбул тиҗарәт ишханиси-İTO, әймир күлтүр вәхиписи-Eymir Kültür Vakfı, әлгинкан вәхиписи-Elginkan Vakfı, күлтүр очиқи вәхиписи-Kültür Ocağı Vakfı, бирлик вәхиписиBirlik Vakfı, илим яйма җәмийити-İlim Yayma Cemiyeti, уран вәхиписи-Uran Vakfı, ташкәнт вәхиписи-Taşkent Vakfı вә һәрқайси шәһәрләрниң тиҗарәт ишханилириму оқуғучиларни оқуш ярдәм пули билән тәминләйдиған иҗтимаий қурумлардин ибарәт.

Пикирләр (0)
Share
Толуқ бәт