Демократик партийиниң парламент әзаси намзатлири уйғурларни зиярәт қилди

2007-07-20
Елхәт
Пикир
Share
Принт

Түркийидә бу йәкшәнбә күни сайлам елип берилиду. Сайламға аз қалған күнләрдә һәрқайси партийиләр вә парламент әзаси намзатлири өзлириниң сайлам тәшвиқат хизмәтлирини тезлитип түрлүк васитиләр арқилиқ сайлам тәшвиқатлирини елип бармақта. Һәммимизгә мәлум болғинидәк, түркийидики уйғур нопусиму сәл қариғили болмайдиған дәриҗидә җиқ болуп, бу сан әлвәттә һәрқайси партийиләрниң аваз саниға бәлгилик дәриҗидә тәсир көрситиду.

Шуңа һәрқайси партийиләр түркийидики бу уйғур нопусиниң авазиға алаһидә қизиқмақта. Нәччә вақиттин бери түркийидики шәрқий түркистан аммиви тәшкилатирини сайламға қатнишидиған партийиләрниң көпи арқа - арқидин зиярәт қилди. Демократлар партийисиму мана буларниң ичидики бири.

Түнүгүн демократик партийиниң вәкиллири қәйсиридики шәрқий түркистан мәдәнийәт вә һәмкарлиқ җәмийитигә алаһидә келип, уйғурлардин һал сориди вә әһвал игәлләп өзлири әгәр парламентқа киргән тәқдирдә уйғурлар үчүн қилип беридиғанлири һәққидә вәдиләрни беришти. Биз мана бу учришиш елип бериливатқан нәқ мәйданға телефон қилип әһвал игилидуқ.

Сейит түмтүрк әпәндиниң меһманларға сөзи

Шәрқий түркистан мәдәнийәт вә һәмкарлиқ җәмийитиниң башлиқи сейит түмтүрк әпәнди меһманларға алди билән сөз қилип мундақ деди: "шәрқий түркистанлиқ қериндашлириңлар болуш сүпитимиз билән сизниң қәдәм тәшрип қилишиңиз бизни хурсән қилди. Әлвәттә сиз һәр даим шәрқий түркистан давасиға көңүл бөлүп кәлгән вә һәссә қошқан бири. Шуңа мән алди билән сизгә пүтүн шәрқий түркистанлиқларға вакалитән рәһмәт ейтимән. Шәрқий түркистан земини вә нопус җәһәттин болсун түркийидин кейинла қалса иккинчи чоң түрк юрти. Шәрқий түркистан пүтүн түркләрниң ана вәтини. Улуғ алим мәһмут қәшқири вә йүсүп хас һаҗипларни йетиштүргән бир тупрақ. 1965- Йили уйғурлар түркийәгә көчмән болуп кәлгәндә бизни түркийигә гираҗданлиққа қобул қилиш үчүн силәрниң партийә көп күч чиқарған иди. Бу җәһәттин елип ейитқандиму силәрниң партийигә көңүл риштимиз бар. Түркийидә уйғурларниң йәрлишиши силәрниң сайәңларда болған иди."

Сейит түмтүрк әпәнди парламент әзаси намзатлириға уйғурлар бүгүн дучар боливатқан қейинчилиқларни вә хитайларниң бесим сиясәтлирини бир қур аңлатқандин кейин парламент әзалиридин күтидиған үмидини ейтип мундақ деди: "бизниң үмидимиз түрк миллитиниң, түркийә җумһурийити дөлитиниң өз ана юртиға, өз қериндашлириға ярдәм қолини узитишини үмид қилимиз. Тарихтин буян түркийә җумһурийити бешиға күн кәлгән пүтүн милләтләрни қойниға алған инсанпәрвәр бир милләт. Парламентқа киргән тәқдирдә уйғурларниң мәсилилирини түркийиниң күн тәртипигә әкилишиңларни үмид қилимиз вә силәргә мувәппәқийәт тиләймән. "

Демократийә партийисиниң намзати мустафа әрасланниң сөзи

Кейин, демократийә партийисидин кәлгән парламент әзаси намзати мустафа әраслан сөз қилип мундақ деди: "буйәрдә олтурған һөрмәтлик чоңлиримиз, қәдирлик қериндашлиримиз! силәрниң яраңлар әлвәттә бизниң яримиз. Буни айришниң мумкинчилики йоқ. Әлвәттә бир қериндаш болуш сүпитимиз билән башқа түрк қериндашлиримизниң бешиға күн чүшкәндә уларни қойнимизға елиш бизниң әбәди вәзипимиздур. Әмма силәрниңму билгиниңлардәк, әпсуски дуня һазир башқа бир йөнилишкә кетиватиду. Ислам дөләтлири бир- биригә игә чиқмайватиду. Худайим буйриса биз демократ партийиси һөкүмәт қурсақ әһвал өзгириду. Биз түркий җумһурийәт вә милләтләр билән болған учришишимизни көпәйтимиз."

Мустафа әраслан йәнә мундақ деди:" мусулман қериндашлиримизниң дәрдигә дава тепишқа тиришимиз. Билгиниңлардәк демократ партийиси 60-йилларда шәрқий түркистандин кәлгән көчмәнләрни түркийигә қобул қилиш қарарини чиқарған адаләт партийисиниң давами. Шуңа биз бу қетим һөкүмәт бешиға кәлсәк, сабиқ адаләт партийиси қилған бу яхши ишларниң техиму яхшисини қилишқа йәни шәрқий түркистанлиқ қериндашлиримизниң бу йәргә келишини әмәс, бәлки уларниң өз юртлиридики хитай зулмида яшаватқан уйғурларниң өз тупрақлирида һозур ичидә яшиши үчүн немә керәк болса биз шуни қилимиз. Биз һәр даим силәрниң йениңларда. Партийә болуш сүпитимиз билән милләт болуш сүпитимиз билән силәрни өзимиздин айримаймиз. Чүнки силәр бизниң қериндишимиз."

Намзатлардин соралған суаллар

Биз парламент әзаси намзати мустафа әраслан әпәндиниң сөзи аяғлашқандин кейин униңға төвәндикидәк дәп соал соридуқ.

Әркин асия радиоси мухбири: "саадәт партийиси болсун, һазир һакимийәт бешидики адаләт вә тәрәққият партийиси болсун пүтүн партийиләрниң милләт вәкиллири намзатлири шәрқий түркистан аммиви тәшкилатлирини зиярәт қилиду. Әпсуски, парламентқа киргән вақтида бәргән вәдилирини унтуп қалиду. Һазир түркийидә көчмән уйғурларниң болсун, уйғур дияридики уйғурларниң болсун бәзи мәсилилири бар. Буларни һәл қилиш үчүн парламентқа киргәндә конкерт немә ишларни қилисиз ? "

Мустафа әр арсилан: "худайим буйруп парламент әзаси болуп сайлансам буйәрдики шәрқий түркистан аммиви тәшкилатлири билән давамлиқ һалда көрүшүп пикир алмаштуруп туримиз. Уйғурларниң немә қийинчилиқи болса уни һәл қилиш үчүн тиришидиғанлиқимизға һечбир шүбһиңиз болмисун. Бизниң сиясәткә киришимиздики әң муһим сәвәбләрниң бири пүтүн дунядики түрк қериндашлиримизға ярдәм қилиш, уларниң мәсилилирини һәл қилиштур. Бу шәрқий түркистанлиқ көчмәнләрни түркийигә қобул қилип йәрләштүргәнму бизниң партийә иди. Бундин кейинму шәрқий түркистанлиқларниң йенида болимиз." (Әркин тарим)

Пикирләр (0)
Share
Толуқ бәт