Турпан тәвәсидики хәлқ кәлкүн апитиниң зәрбисигә учриди

2005-08-10
Елхәт
Пикир
Share
Принт

Уйғур ели хәвәр тор бәтлиридин мәлум болушичә, 8 - айниң 6 - күнидин, 7 - күнигичә турпан тәвәсидә 26 саәт әтрапида тохтимастин қаттиқ ямғур йеғип, җәмий 7 йеза, 2 базар, йәнә 2 мәйданда еғир кәлкүн апитини кәлтүрүп чиқарған. Бу кәлкүн апити әзәлдин һөл йеғин кәм болған турпанда 50 йилдин буян көрүлгән әң еғир апәт һесаблинидикән.

Зиян еғир болсиму өлүм - йетим әһвали көрүлмигән

Сина хәвәр ториниң хәвиригә қариғанда, турпандики чатқал, сиңгим, үзүмчи, астанә қатарлиқ йезилар апәт тәсиригә бир қәдәр еғир учриған болуп, җәмий 280 аилиликниң 1522 еғиз өйи өрүлгән, 2700 мо бинәм һәмдә кевәзликләрни, тәкләрни су бесип, 36милйон юән әтрапида бивастә иқтисади зиян көрүлгән, дәсләпки ситатистикида турпан тәвәсидә 50 миң әтрапида амминиң апәт тәсиригә учриғанлиқи мәлум болған, гәрчә кәлкүн апитиниң тәсири бир қәдәр зор болсиму, бәхткә яриша, адәм өлүш - ярилиниш әһваллири көрүлмигәнлики хәвәр қилинмақта.

Уйғур елидики ахбарат орунлириниң турпанда йүз бәргән кәлкүн апити һәққидә бәргән хәвәрлиригә қариғанда, кәлкүндә йәнә 312 - номурлуқ дөләт таш йоли бөликини қиян елип кәткән. Йезилардики нурғун кичик таш йоллар бузулған, апәтниң һуҗумиға әң еғир учриған чатқал йезисида 6 кариз өрүлүп чүшкән.

Уйғур елидики даңлиқ саяһәт орни болған турпанда мушу айниң 25 - күни, 14 - нөвәтлик йипәк йоли үзүм байрими өткүзулиду, шундақла бу мәзгил турпанда саяһәтчиликниң әң ават мәзгили һесаблиниду. Катта саяһәт байрими һарписида турпанниң туюқсиз кәлкүн апитигә учриши, турпан һөкүмәт һәмдә саяһәт идарилирини җиддийләштүргән.

Кәлкүн турпан шәһәр ичигиму бәлгилик тәсир көрсәткән

Биз кәлкүн апитиниң әһваллири һәққидә тәпсили мәлумат елиш үчүн турпан вилайәтлик һөкүмәт башқурушидики кәлкүндин мудапиә көрүш ишханисиға телефон қилғинимизда, телефонни алған бир хадим, апәт әһваллири һәққидә қисқичә мәлумат берип, кәлкүнниң турпан шәһәр ичигиму еғир тәсир көрсәткәнликини ейтти.

Чатқал йезиси һәммидин еғир зиянға учриди

Биз йәнә бу қетим кәлкүн апитигә әң еғир учриған чатқал йезисиниң апәттин кейинки әһваллирини игиләш үчүн чатқал йезисиға телефон қилдуқ. Йезидин бир киши зияритимизни қобул қилип, у йезида 30 миң адәм барлиқини, пахта, тәг, йоллар вә миңлиған өйләрниң зәрбигә учриғанлиқини ейтип бәрди.

50 Йилдин буянқи еғир апәт

Хитай хәлқ ишлири министирлиқиниң -10 авғуст ашкарилишичә, өткән һәптә уйғур елиниң турпан әтрапини асас қилип яққан қаттиқ ямғурда турпан велайитила кәлкүн апитигә учрап қалмай, йәнә үрүмчи һәмдә санҗиниң бир қисим районлириму охшимиған дәриҗидә кәлкүн зәрбисигә учрап, 187 миңдин көп адәм кәлкүн апитидә қалған.

Бу кәлкүндә 9 - авғустқичә 4 адәмниң өлгәнлики мәлум болған, кәлкүндә йоқап кәткән кишиләр сани техичә мәлум әмәс икән. Кәлкүн йүз бәргән районларда өрүлгән өйләрниң сани 11 миң 4 йүзгә йәткән. Кәлкүн апити йәнә үрүмчи турпан, санҗи қатарлиқ җайларда қатнаш, су иншаати, һәмдә алақә вастилирини бузғунчилиққа учратқан.

Хитай хәлқ ишлири министирлиқиниң апәттин қутқузуш бөлүм башлиқи ли шәнруй "давамлиқ қурғақ болған уйғур елиниң ғәрбий шималида бундақ зор кәлкүн апитиниң йүз бериши кәм учрайду, болупму турпан тәвәликидә бу 50 йилдин буян көрүлүп бақмиған әң еғир кәлкүн апити һесаблиниду" дәп билдүргән.

Тәңритағ тор бетиниң бу һәқтә бәргән хәвиригә қариғанда, турпан, үрүмчи, санҗи әтрапини асас қилип йүз бәргән бу кәлкүн апитигә нисбәтән, хитай хәлқ ишлири министирлиқи 4 - дәриҗилик апәттин қутқузушқа мунасип тәдбир қолланмақчи икән. (Гүлчеһрә)

Пикирләр (0)
Share
Толуқ бәт