Дуня уйғур қурултийи 30-авғуст «хәлқара ғайиб болғанлар күни» дә баянат елан қилди

Дуня уйғур қурултийи бүгүн 30-авғуст «хәлқара ғайиб болғанлар күни» мунасивити билән баянат елан қилип, хәлқарани 5-июл үрүмчи вәқәсидин кейин из-дерәксиз йоқап кәткән уйғурлар мәсилисигә җиддий қарашқа чақирди.
Мухбиримиз меһрибан
2012-08-30
Елхәт
Пикир
Share
Принт
Аилә-тавабиатлири муһаҗирәттики уйғурларниң ярдимигә еришкән ғайиб болған уйғурлар.
Аилә-тавабиатлири муһаҗирәттики уйғурларниң ярдимигә еришкән ғайиб болған уйғурлар.
RFA

Дуня уйғур қурултийи иҗраийә һәйити рәиси долқун әйса вә дуня уйғур қурултийи баянатчиси дилшат ришитлар радиомиз зияритини қобул қилип, дуня уйғур қурултийиниң 5-июл вәқәсидин кейин шәрқий түркистанда из-дерәксиз йоқап кәткән уйғурларниң дерикини қиливатқанлиқини билдүрүп, хитай һөкүмитидин бу мәсилидә хәлқара җәмийәткә җаваб беришни тәләп қилидиғанлиқини билдүрди.

Бүгүн хәлқара из-дерәксиз йоқап кәткәнләрни сүрүштүрүш күни. Чәтәлләрдики уйғур тәшкилатлиридин дуня уйғур қурултийи бу мунасивәт билән баянат елан қилип, хитай һөкүмитидин 2099-йили үрүмчидә йүз бәргән 5-июл вәқәсидин кейин из-дерәксиз ғайиб болған уйғурлар һәққидә хәлқара җәмийәткә җаваб беришни тәләп қилидиғанлиқини билдүрди.

Дуня уйғур қурултийиниң «из-дерәксиз йоқап кәткән уйғурларни сүрүштүрүш» һәққидики баянатида, хәлқара кәчүрүм тәшкилати қатарлиқ кишилик һоқуқ тәшкилатлириниң 5-июлдин кейинки уйғур ғайибларниң из-дерикини қиливатқанлиқи оттуриға қоюлди. Баянатта йәнә, дуня уйғур қурултийи рәиси рабийә қадир ханимниң сөзи нәқил елинип, һәрқайси демократик әлләр һөкүмәтлиридин хитай билән болған дипломатик алақилири һәм сода мунасивитидә, 5-июлдин кейин хитай даирилири тәрипидин тутуп кетилип, һазирғичә из-дерики болмиған уйғурлар мәсилисини хитайдики кишилик һоқуқ дәпсәндичиликидики муһим мәсилиләрниң бири қатарида оттуриға қоюш тәләп қилинди.

Бүгүн хәлқара из-дерәксиз йоқап кәткәнләрни сүрүштүрүш күни мунасивити билән дуня уйғур қурултийи иҗраийә һәйити рәиси долқун әйса вә дуня уйғур қурултийи баянатчиси дилшат ришитлар радиомиз зияритини қобул қилип шәрқий түркистанда из-дерәксиз йоқап кәткән уйғурлар мәсилисиниң хәлқараниң җиддий көңүл бөлүшигә тегишлик мәсилиләрниң бири икәнликини тәкитләп, дуня уйғур қурултийиниң бу мәсилини өз хизмитиниң муһим күн тәртипигә киргүзгәнликини илгири сүрди.

Баянатчи дилшат ришит сөзидә, әркин асия радиоси һәм башқа йоллар арқилиқ игилигән мәлуматларға асасланғанда, шәрқий түркистанда уйғурларниң из-дерәксиз ғайиб болуп кетиш әһвалиниң еғир икәнликини билдүрүп, хәлқарани 5-июл үрүмчи вәқәсидин кейин, хитай даирилири тәрипидин тутуп кетилип, из-дерәксиз йоқап кәткән уйғурлар мәсилисигә җиддий қарашқа чақирди.

Дуня уйғур қурултийиниң иҗраийә һәйити рәиси долқун әйса дуня уйғур қурултийиниң бу һәқтә елип бериватқан конкрет хизмәтлири һәққидә тохталди.

Долқун әйса сөзидә, дуня уйғур қурултийиниң 5-июл вәқәсидин кейин шәрқий түркистанда из-дерәксиз йоқап кәткән уйғурлар һәққидә мәхсус доклат тәйярлап, һазирға қәдәр бирләшкән дөләтләр тәшкилати вә 50 тин артуқ демократик дөләтләр әлчиханисиға хәт йезип, шәрқий түркистандики из-дерәксиз йоқап кәткәнләр мәсилисини хитай билән болған дипломатик мунасивәтлиридә оттуриға қоюшини, хитай һөкүмитидин бу мәсилидә хәлқара җәмийәткә җаваб беришни тәләп қилидиғанлиқини билдүрди.

Долқун әйса әпәнди йәнә, һәрқайси дөләтләрдики уйғур тәшкилатлириниң бу мәсилигә җиддий қараватқанлиқини илгири сүрүп, дуня уйғур қурултийиниң америка, канада, японийә вә явропа дөләтлиридики 30 дин артуқ шөбә тәшкилатниң өз дөләтлиридики мунасивәтлик орунларға 5-июл үрүмчи вәқәсидин кейин из-дерәксиз ғайиб болған уйғурлар һәққидә мәхсус хәт йоллиғанлиқини билдүрди.

Долқун әйса әпәнди сөзидә йәнә, хәлқара кәчүрүм тәшкилати қатарлиқ кишилик һоқуқ тәшкилатлири һәм дуня уйғур қурултийиниң шөбә тәшкилатлири болмиған һиндонезийә, малайшия қатарлиқ бир қисим демократик дөләтләрдики кишилик һоқуқ тәшкилатлириниңму из-дерәксиз ғайиб болған уйғурлар мәсилисигә җиддий қараватқанлиқини билдүрди.

Радиомиз 5-июл үрүмчи вәқәси вә вәқәдин кейинки тутқун қилишта хитай сақчилири һәм қораллиқ хадимлири тәрипидин елип кетилип, из-дерәксиз ғайиб болған уйғурлар һәққидә мәхсус сәһипә ачқан болуп, һазирға қәдәр елан қилинған тәпсилий хәвәрләр 30 парчидин ашиду.

Пикирләр (0)
Share
Толуқ бәт