Xitayning herbiy tereqqiyatini mexpiy qanat yaydurushi amérikini xatirjemsiz qiliwatidu

2008-03-12
Élxet
Pikir
Share
Print

Herbiy sélinma we herbiy qisimlarni zamaniwilashturush pilanini ashkara élip bérish telipi xitay - amérika herbiy munasiwetliride amérika üzlüksiz otturigha qoyup kéliwatqan we uni qayghugha séliwatqan mesilidur. Amérika tinch okyan qisimlirining adémirali, qomandan timoti kéting, aldinqi küni amérika kéngesh palatasining herbiy ishlar komitétidiki ispat bérish yighinida bu mesilidiki endishilirini otturigha qoyup, xitayning herbiy sélinmini üzlüksiz köpeytishi amérika herbiy da'irilirini bi'aram qiliwatqanliqini hem xitay herbiy qisimlirining zadi néme gherezge yetmekchi boluwatqanliqigha nisbeten chüshenchisi cheklik ikenlikini bildürdi.

"Ularning istratégiyilik gherizi bizning diqqitimizni qozghaydu"

Kétingning kéngesh palatasidiki sözi amérika dölet mudapi'e ministirliqi yéqinda élan qilghan "xitay herbiy küchining ehwali" dégen doklattiki qarashlar bilen oxshash bolup, doklatta xitay herbiy tereqqiyatining ashkara emesliki, bu melum sahelerde amérika armiyisige tehdit séliwatqanliqi ilgiri sürülgen. Kéting, herbiy ishlar komitétidiki kéngesh palata ezalirigha bergen guwahliq sözide, xitayning üzlüksiz küchiyiwatqan herbiy iqtidari özliride endishe qozghawatqanliqini, xitay armiyisining yetmekchi bolghan gherizige qarita chüshenchisi cheklik da'iride ikenlikini eskertip, " ular ashkarilighan nersiler bizning nuqti'inezirimizche yéterlik emes " deydu.

Bash shtabi hawaydiki amérika tinch okyan armiyisi amérikining eng qudretlik hawa we déngiz küchi merkezleshken qisimi bolup, teywen boghuzining bixeterliki mezkur qisimning mes'uliyet da'iriside idi. Amérika kéngesh palatasidiki yighinda xitayning öz tesir da'irisini kéngeymekchi boluwatqanliqini tekitligen kéting " ularning istratégiyilik gherizi bizge qarshi turushni meqset qilmighan teqdirdimu, lékin bu yenila bizning diqqitimizni qozghaydu " dédi.

" Her ikki terepni herbiy herikettin saqlinish toghrisida agahlandurduq "

Amérika tinch okyan armiyisining mezkur adémirali, xitayning özliride endishe qozghawatqan bashqurulidighan bomba we éléktronik urush qilish küchi amérika herbiy da'iriliride munazire qiliniwatqanliqini eskertip, "bizning éhtiyaj chüshkende orunlashturidighan nazuk qorallirimiz bar. Köp qisim éléktronik qorallarning qarshi turush ünümi yaxshi, lékin yene bir qisim qorallarning ünümi yenila cheklik "dep körsetti.

Kéting amérika kéngesh palata ezalirigha xitay herbiy tereqqiyati teywen boghuzining bixeterlikige tehdit séliwatqanliqini, amérika tinch okyan armiyisining muhim wezipilirining biri, teywen boghuzining bixeterlikige kapaletlik qilish bolup, lékin boghuzdiki muqimliqni qoghdashning achquchi yenila teywenning özini mudapi'e qilish iqtidarini östürüsh "dep qaraydighanliqini bildürdi. U, teywen boghuzida urush partlash éhtimali yüz bermesliki mumkin, dep qarimaqta.

Kéngesh palata ezalirigha "teywen boghuzida weqe yüz bermesliki mumkin " dep qaraydighanliqini tekitligen kéting, özlirining teywen yaki xitaylar bilen sözleshkende ulargha asiya - tinch okyan rayonining muqimliqini, bolupmu teywen boghuzining muqimliqini alahide semige salghanliqini, lékin xitaylarning teywen boghuzi etrapida herbiy orunlashturushni kücheytkenliki tüpeyli bu teywen da'irilirining diqqitini qozghawatqanliqini, emma özlirining her ikki terepni herbiy herikettin saqlinish toghrisida agahlandurghanliqini bildürdi.

" Xitay teywen boghuzi etrapigha az kem 1000 dane bashqurulidighan bomba orunlashturdi "

Amérika dölet mudapi'e ministirliqi besh burjeklik binaning doklatida, xitayning teywen boghuzi etrapigha az kem 1000 dane bashqurulidighan bomba orunlashturghanliqini, awi'amatka, urush paraxotigha qarshi charlighuchi we ballistik bombilar shundaqla sün'iy hemrah hem qit'eler'ara bashqurulidighan bombigha qarshi qorallarni rawajlanduruwatqanliqini ilgiri sürgen.

Lékin kéting, kéngesh palatasidiki ispat bérish yighinida teywen boghuzining weziyiti teywendiki prézidént saylimidin kéyin yumshash yoligha qarap méngishi mumkin, qarimaqta. U, " teywen pat yéqinda yeni 3 ‏- ayning 22 ‏- küni saylam ötküzidu. Namzatlarning her ikkisi xitay xelq jumhuriyitige mötidil siyaset tutmaqta. Bu, otturidiki ixtilapni yumshitishi mumkin. Biz nahayiti éhtiyat bilen 22 ‏- marttiki saylamdin kéyin otturidiki munasiwet yumshaydu, dep qaraymiz " dep eskertidu.

"Xitayning éléktronik urush qilish teyyarliqi bizni endishige séliwatidu "

Xitay xelq qurultiyi yéqinda, xitayning bu yilqi herbiy xam chotini 17.6 Pirsent östüridighanliqini, omumi herbiy sélinma texminen 57 milyard dollargha yétidighanliqini bildürgen idi. Xitay hökümiti herbiy sélinmidiki bu artishni asasliqi herbiylerning telim - terbiye we turmush shara'itini yaxshilashni meqset qilghan, dep chüshendürmekte. Lékin amérika dölet mudapi'e ministirliqi doklatida xitayning éléktronik urush qilish iqtidarini östürüwatqanliqini, xitay tor zerbidarlirining amérika tor séstimisi we dunyaning her qaysi jayliridiki intérnét ulanmilirigha hujum qilghanliqini tekitligen.

Kéting kéngesh palatasidiki ispat bérish yighinida bu mesilige izahat bérip, "xitayning éléktronik urush qilish teyyarliqi bizni endishige séliwatidu. Bu bizning diqqitimizni qozghawatqan mesililerning biri. Xitay uchurlashturushni herbiy mekteplerdiki muhim tetqiqat témisi süpitide tutuwatidu " dep körsetti. (Erkin)

Pikirler (0)
Share
Toluq bet