Америка сериқ деңизда, хитай шәрқий деңизда өткүзидиған һәрбий мәшиқләр пәйда қилған дипломатийә җиддийлики

Хитай армийисиниң шәрқий деңизда етиш мәшиқи елип баридиған вақти билән америка билән җәнубий корийиниң сериқ деңиз да бирләшмә һәрбий мәшқ елип баридиған вақти тоғра келип қалди. Бир нәччә күндин буян бу икки һәрбий мәшиқ тоғрисида дипломатийә җәһәттә җиддийлик болуватиду.
Мухбиримиз вәли
2010-06-29
Елхәт
Пикир
Share
Принт
Америка вә җәнубий корийә сериқ деңизда, хитай шәрқий деңизда  һәрбий мәшиқ елип бармақчи болуп, сүрәттә бу икки деңизниң җуғрапийилик орни көрситилгән.
Америка вә җәнубий корийә сериқ деңизда, хитай шәрқий деңизда һәрбий мәшиқ елип бармақчи болуп, сүрәттә бу икки деңизниң җуғрапийилик орни көрситилгән.
http://nf.nfdaily.cn Дин елинди.

Шинхуа агентлиқи 6‏ - айниң 28 ‏ - күни Хитай армийисиниң деңиз қисимлири бу йил елип баридиған һәрбий мәшиқини 10 күн алдиға сүрүп, уни 6‏ - айниң 30 ‏ - күнидин 7‏ - айниң 5 ‏ - күнигичә шәрқий деңизда өткүзүлидиған етиш мәшқ дәп бекитти, дәп җакарлиди. Бу, америка билән җәнубий корийиниң йиллардин буян сериқ деңизда бирләшмә мәшқ өткүзидиған вақтиға тоғра кәлгән иди.

'Хитайниң шәрқи деңиздики етиш мәшиқи авиаматкиларни чөктүрүшни мәқсәт қилидиған мәшиқ'

Хитайниң 'хәлқ гезити'дә болса, хитай армийисиниң 91765 бәлгилик деңиз флоти шәрқи деңизда өткүзидиған етиш мәшқиниң, тамамән америкиниң авиаматкилирини чөктүрүшни мәқсәт қилған мәшқ икәнлики, һәтта 'америкиниң авиаматкиси сериқ деңизға кирсила уни дәрһал ' чөктүрүветиш ' үчүн һәрикәт қоллинидиған мәшиқ икәнлики тилға елинип турди.

Америка билән җәнубий корийиниң сериқ деңиздики һәрбий мәшқиниң дәриҗиси шималий корийә пәйда қилған вәқә түпәйлидин дәриҗиси өрлитилгән

Америка авазиниң баян қилишичә, америка билән җәнубий корийиниң бу йил сериқ деңизда өткүзидиған һәрбий мәшқиниң дәриҗиси, җәнубий корийиниң һәрбий парахоти шималий корийиниң һуҗумиға учриған вәқә түпәйлидин өрлитилгән. Шуңлашқа бу мәшиққә, америкиниң 'җорҗ вашингтон' бәлгилик әң чоң ядролуқ авиаматка урушчи парахотлар топи қатнаштурулмақчи болған. Демәк америка билән җәнубий корийиниң бу йил сериқ деңизда өткүзидиған һәрбий мәшиқи, җәнубий корийиниң һәрбий парахоти шималий корийиниң һуҗумиға учриған вәқәгә қаритилғанлиқи үчүн хитай билән шималий корийиниң зитиға тәгкән.

Хитай баянатчиси чиң гаң 'һәр икки тәрәп өзини тутувелиши керәк' дәп җакарлиди

Ройтрс агентлиқиниң баян қилишичә, хитай ташқи ишлар министирлиқи баянатчиси чин гаң бүгүн мухбирларниң соаллириға җаваб бәргәндә, хитайниң шәрқий деңизда өткүзидиған етиш мәшиқи америкиға қаритилғанлиқини етирап қилмиди. У 'азадлиқ армийиниң җәнубий деңизда өткүзидиған етиш мәшиқи, америка билән җәнубий корийигә қаритилған әмәс, биз һазир бу икки чоң мәшиқниң бир вақитқа тоғра келип қалғанлиқидин ибарәт бундақ бир мәсилигә җиддий диққәт қиливатимиз. Һәр икки тәрәп өзини тутувелиши вә район характерлик җиддийлик пәйда қилмаслиқи керәк' дәп җакарлиди.

'Хитайниң 022 бәлгилик тез парахотлири бир юшурун хейим - хәтәр'

Америка авазиниң баян қилишичә, тәйвәнниң һәрбий мутәхәссиси ли вей бүгүнки мулаһизисидә 'хитайниң бу қетим шәрқий деңизда өткүзидиған етиш мәшқиниң тиғ учи, дәл америка билән җәнубий корийиниң сериқ деңизда өткүзидиған һәрбий мәшиқигә қаритилған. Хитай бу қетимқи етиш мәшиқигә, башқурулидиған бомба орунлаштурулған 022 бәлгилик тез парахотлирини қатнаштуриду. Бу бир юшурун хейим - хәтәр' дәп баян қилған.

'Бир - биригә от ечиш еһтималлиқи аз, чүнки икки тәрәпниң күч селиштурмисида наһайити чоң пәрқ бар'

Хоңкоң һәрбий мутәхәссиси ма диңшеңниң көз қариши буниңға охшимайду. Униң қаришичә, сериқ деңиз билән шәрқий деңизниң арилиқи йеқин әмәс, охшимиған җайда болуватқан һәрбий мәшиқтин бир - биригә от ечиш еһтималлиқи аз, униң үстигә америка - җәнубий корийә тәрәп билән хитай тәрәпниң һәрбий әслиһәлири вә һәрбий күчидә наһайити чоң пәрқ бар.

'Хитай - шималий корийә - америка оттурисида кимниң йүрики пок - пок икәнликини синайдиған бир вастә '

Вашингтон почтиси гезитиниң баян қилишичә, америка билән хитайниң һәрбий мәшиқ өткүзидиған вақти охшашла июн ейиниң ахириға орунлаштурулғанлиқи, һәр хил еһтималлар түпәйлидин, шәрқий деңиз дипломатийисидә җиддийлик пәйда қилди. Бу җиддийлик әмәлийәттә, хитай - шимали корийә - америка оттурисида кимниң йүрики пок - пок икәнликини синайдиған бир вастә болуп қалди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)
Share
Толуқ бәт