Xu ping: 'hemme qatlam iqtisadini yükseldürüsh' sho'ari kompartiyining yene bir qétimliq köz boyamchiliqi

Siyasiy analizchi xu ping ependi, bügün radi'omiz ziyaritini qobul qilip, béyjingda échiliwatqan xitay kompartiyisining 17‏ - nöwetlik 5‏ - omumi yighinida xu jintaw otturigha qoyghan "igilikni yaxshilaydighan tüzülme berpa qilip, hemme qatlam iqtisadini yükseldürüsh" dégen yéngi sho'arni "xitay kommunist hökümitining yene bir qétimliq köz boyamchiliq siyasiti" dep tenqidlidi.
Muxbirimiz mihriban
2010-10-18
Élxet
Pikir
Share
Print
Sürette, béyjing bahari zhornilining bash muherriri siyasiy analizchi xu ping ependi.
Sürette, béyjing bahari zhornilining bash muherriri siyasiy analizchi xu ping ependi.
Süretni xu ping ependi teminligen.

Béyjingda échiliwatqan xitay kompartiyining "12 - besh yilliq pilanini muzakire qilish yighini" heqqide xitay metbu'atliri bilen chet'el metbu'atlirida oxshimighan inkaslar bérildi.

Xitay hökümet metbu'atliri bu yighin heqqide "kelgüside iqtisadni östürüsh üchün islahat élip bérish pilanlan'ghan yighin" dep uchur tarqatti.

Gherb metbu'atliridin en'gliye b b s agéntliqi "bu, xitay kommunist hökümitining xitayda barghanche éghirlishiwatqan bay - kembeghellik perqi keltürüp chiqarghan awam xelq arisidiki naraziliqni peseytish we kompartiyining öz hökümranliqini saqlap qélish üchün tedbir tüzüsh yighini" dep xewer berdi.

Chet'ellerdiki xitay démokratliridin siyasiy analizchi xu ping ependi bu yighin heqqide öz qarashlirini otturigha qoydi. Xu ping ependi yighinda xu jintaw teripidin otturigha qoyulghan "hemme qatlam iqtisadini yükseldürüsh" sho'ari heqqide toxtilip, buning xitay kommunist hökümitining xitay xelqi arisida barghanche küchiyiwatqan "siyasiy jehette islahat élip bérish" telipini, iqtisadi jehette islahat élip baridighanliqini wede qilish arqiliq, basturushqa urunush ikenlikini ilgiri sürdi.
 
Xu ping mundaq dédi: "bu yighin, xitayda bay- kembeghellik perqi éghirliship؛ kompartiye emeldarlirining chirikliki yuqiri pellige yetken, xelqning naraziliqi küchiyip؛ siyasiy islahat élip bérish telipi küchiyiwatqan mezgilge toghra keldi. Xelq'arada bolsa ' 2008 xitabnamisi' arqiliq qanun özgertish teshebbusini otturigha qoyghini üchün, xitay kommunist hökümiti teripidin türmige tashlan'ghan siyasiy mehbus lyu shawbogha nobél tinchliq mukapati bérilgen bir sezgür waqitta échildi. Körünüp turuptiki hazir xitay kommunist hökümiti öz hakimiyitini saqlap qélishta jiddiy sinaqqa duch kelgen mushundaq peytte, xelqning naraziliqini bésish, xelq'ara jem'iyetning bésimidin qutulush üchün, bu yighinda 'hemme qatlam iqtisadini yükseldürüsh' dégen müjmel sho'arni otturigha qoyup, yene bir qétim köz boyamchiliq qiliwatidu."

Xu ping ependi yene özining, xu jintaw otturigha qoyghan "hemme qatlam iqtisadini yükseldürüsh, inaq jem'iyet berpa qilish" dégen yéngi sho'ari bilen "shinjang xizmet yighini" da otturigha qoyulghan "iqtisadni yükseldürüp, uzun muddetlik eminlikke kapaletlik qilish" sho'arining emeliyette xelqning naraziliqini basturush üchün, oxshash meqsette élip bériliwatqan siyasiy aldamchiliq dep qaraydighanliqini bildürdi.

Xu ping mundaq dédi: "meyli bu qétim yighinda otturigha qoyulghan 'igilikni yaxshilaydighan tüzülme berpa qilip, hemme qatlam iqtisadini yükseldürüsh, inaq jem'iyet berpa qilish' dégen yéngi sho'ar bolsun, yaki bu yil 5 - ayda échilghan 'shinjang xizmet yighini' da otturigha qoyulghan 'iqtisadni yükseldürüp, uzun muddetlik eminlikke kapaletlik qilish' sho'ari bolsun, bu yerde kompartiyining meqsiti nahayiti éniq. Yeni ' kommunist hakimiyetning uzun muddetlik menpe'itige kapaletlik qilish, bu hakimiyetning xelqning naraziliq heriketliri ichide aghdurulup kétishining aldini élish üchün qolliniwatqan siyasiy jehettiki aldamchiliq neyringi déyishke bolidu. Chünki xitay kommunist hökümiti tibet we Uyghur rayonida bu milletlerge qarita mustemlike siyasitini yürgüzüwatqini üchün, yerlik milletlerning xitay hökümitige bolghan naraziliqini basturushqa tedbir élishqa mejbur. Xitay ölkiliride bolsa köp qisim bayliqning chirikleshken kommunist emeldarliri qoligha merkezleshkenliki sewebidin, xitaydiki awam puqralarning kommunist hökümetke bolghan naraziliqini peseytish üchün 'hemme qatlam iqtisadini yükseldürüsh, inaq jem'iyet berpa qilish' dégen sho'arni kötürüp chiqip, xitay ölkiliride yüz bériwatqan naraziliq heriketlirini basturush üchün aldamchiliq siyasiti yürgüzüwatidu."

Xu ping ependining qarishiche, xitay kommunist hökümiti nöwette öz hakimiyitidin ensiresh halitide turuwatqan bir peytte, xitayda islahat élip bérishni otturigha qoyghini üchün xitay kommunist hökümiti teripidin türmige qamalghan lyu shi'awbodek bir kishige nobél tinchliq mukapati bérilishi, kommunist partiyining gherb démokratik ellirige bolghan öchmenlikini téximu ashurghan bolup, bu qétimqi yighinda otturigha qoyulghan hem qarar élish belgilen'gen tedbirlerning hemmisi emeliyette xitay kommunist hakimiyitining öz hökümranliqini saqlap qélish üchün urunushi iken.

Xu ping ependi yene özining buningdin kéyin textke chiqidighan xitay kommunist emeldarliriningmu xitayda siyasiy islahat élip bérishigha ishench bilen qarimaydighanliqini bildürdi.

U sözini "xitayda siyasiy özgirish bolamdu, dégen mesilige aldin - ala bir néme déyish qéyin, emma xitay kommunist partiyisi özimu hazir, eger buningdin kéyin siyasiy islahat élip barmisa, choqum gumran bolidighanliqini alliqachan bilip boldi. Shunga igilikni yaxshilaydighan tüzülme berpa qilip, 'hemme qatlam iqtisadini yükseldürüsh, inaq jem'iyet berpa qilish' dégen yéngi sho'arimu emeliyette kompartiye hakimiyitining xelqni aldash üchün élip bériwatqan yene bir qétimliq köz boyamchiliq déyishke bolidu," dégen jümliler bilen ayaghlashturdi.

Yuqiridiki awaz ulinishidin, bu heqtiki melumatimizning tepsilatini anglaysiler.

 
Pikirler (0)
Share
Toluq bet