Xitay mallirigha yéngi cheklimiler qoyuldi

2006-12-26
Élxet
Pikir
Share
Print

Türkiye tashqi soda idarisining uqturushidin melum bolushiche 2007-yilida xitayning 44 türdiki toqumichiliq mallirigha cheklime qoyulidiken. Türkiye tashqi soda idarisi menbesi xitay xelq jumhuriyitidin bolghan bezi toqumichiliq we teyyar kiyim mallirining import qilinishigha cheklime qoyushni qararlashturdi. Uqturushtin qarighanda, tashqi soda idarisi import bash mudirliqi élip barghan tekshürüsh netijiside, xitay xelq jumhuriyitining mewjut toqumichiliq we teyyar kiyim ishlep chiqirish küchining kündin kün'ge artiwatqanliqi we menbesi xitay xelq jumhuriyiti bolghan mallarning import qilinishining bazarni qalaymiqanlashturush we bazar qalaymiqanlashturush tehditi seweblik tijaretning tertiplik rawajlinishigha tosaq bolidighanliqi éniqlan'ghan. Netijide, xitay xelq jumhuriyiti menbelik bezi toqumichiliq we teyyar kiyim mehsulatlirining import qilinishigha san cheklimisi qoyushqa qarar bérilgen.

San cheklimisi qoyulidighan mallarning asasliqliri töwendikiche:

Paxtiliq rextler, pelto, chapan qatarliq kiyim - kéchekler, yung, paxta, sün'iy talalardin ishlep chiqirilghan sharpa, yaghliq we mushuninggha oxshash mehsulatlar, qiz- ayallar üchün yipektin ishlep chiqirilghan maykilar, toqulma kiyimler, yipektin ishlep chiqirilghan köynek, mayka, könglekler, kariwat yapquchlar, perdiler. Erler we oghul balilar üchün tikilgen uxlash kiyimliri, dastixanlar, yung we haywanlarning qilliridin toqulghan rextler, bowaqlar üchün tikilgen kiyimler, paypaq qatarliqlar.

Yuqirida sanap ötkenlirimiz san cheklimisi qoyulghan mallarning peqetla bir qismidur. Ötken yili türkiye mana mushundaq san cheklimisi chiqarghanda xitay buning dunya tijaret teshkilatining qanunlirigha xilap ikenlikini éytip türkiyige naraziliq bildürgen idi. Emma buninggha qarimay türkiye san cheklimisi qoyulidighan mallarning sanini téximu jiqayitmaqta. Hazir xitayning türkiyide turushluq bash elchisi sung eygo xitaygha qaytqandin kéyin uning ornigha sung goshyen wezipige teyinlendi. U wezipini tapshurup alghandin kéyin herqaysi ministirlerni ayrim -ayrim ziyaret qilip ikki dölet arisidiki munasiwetni yéqinlashturushqa tirishiwatqan künimizde türkiyening xitay méligha bundaq bir san cheklimisini chiqirishi ikki dölet munasiwitige qandaq tesir körsiter? bu heqte köz qarishini élish üchün türkiye xitay munasiwiti mutexessisi doktor erkin ekrem ependi bilen téléfon ziyariti élip barduq.

Pikirler (0)
Share
Toluq bet