Хитайлар тибәт филими сәвәби америка 'палма баһари' кино фестивалини байқут қилди

Хитай кино саһәсидикиләр 2009 ‏- йили 8 - айда австиралийиниң мелборин хәлқара кино фестивалини байқут қилип, уйғур рәһбири рабийә қадир ханим һәққидики "муһәббәтниң 10 шәрти" филиминиң мәзкур фестивалға қатнаштурулғанлиқиға аччиғланған иди.
Мухбиримиз әркин
2010-01-06
Елхәт
Пикир
Share
Принт
Франсийә президенти николас саркозий шәнбә күни далай лама билән көрүшкән болуп, сүрәттә, далай лама саркозийға хада тәқдим қилмақта.
Франсийә президенти николас саркозий шәнбә күни далай лама билән көрүшкән болуп, сүрәттә, далай лама саркозийға хада тәқдим қилмақта.
AFP Photo

Бу әйни чағда хәлқарада зор ғулғула қозғиған вәқәләрниң бири болуп қалған. Бу қетим хитай кино саһәсидикиләр америкида өткүзүлидиған "палма баһари" кино фестивалини байқут қилди.

Хитай кино саһәсидикиләр бу қетим америкиниң калифорнийә штатида өткүзүлидиған "палма баһари" кино фестивалиға байқут елан қилип, мәзкур фестивалға қатнаштурулидиған икки филимини чекиндүрүп чиққанлиқини елан қилди. "Бейҗиң вақти" гезитиниң бу һәқтики хәвиридә, хитай реҗиссорлириниң кино фестивалини байқут қилишиға фестивалда тибәтләргә даир "булут арқисидики қуяш : тибәтләрниң әркинлик күриши"намлиқ филимниң қоюлидиғанлиқи сәвәб болғанлиқини илгири сүргән.

Әгәр бу раст болса, бу хитай кино саһәсидикиләрниң йеқинқи 6 ай ичидә хәлқара сәнәт фестивалини сиясий сәвәбләр түпәйли 2‏ - қетим байқут қилиши болуп һесаблиниду.

"Булут арқисидики қуяш" дегән бу филим тибәтләр һәққидики һөҗҗәтлик филим болуп, тибәт роһани даһиси далай ламаниң һаяти, 2008 ‏- йили лхасада йүз бәргән тибәт вә хитайлар арисидики тоқунуш, тибәтләрниң юртни сеғиниши, бейҗиң олимпик мусабиқисиниң мәшилини йәткүзүш җәрянидики сәргәрдан тибәтләр вә чәтәлдики хитай оқуғучиларни тема қилған.

Хитайлар "палма баһари" кино фестивалидин чекиндүрүп чиққан филимләрниң бири"дәриҗидин ташқири 50", йәнә бири"нәнҗиң ‏- нәнҗиң" дегән филим болуп, бу филимдә японийә армийисиниң 1937 ‏- йили нәнҗиңни игилигән вақтидики вәқәлик тәсвирләнгән иди. Франсийә ахбарат агентлиқиниң хәвиригә қариғанда, "палма баһари" фестивалини байқут қилған хитай кино ширкити тибәт һәққидики филимдә "тибәт мустәқиллиқи"ниң тәрғип қилинғанлиқини илгири сүргән.

Хитайниң бу мәсилидики позитсийисигә тәнқиди пикирдики сәнәтчи затлар болса , хитайниң даим сәнәткә сиясәтни арилаштурувалидиғанлиқини әйиблиди. юқириқи сөзләр германийидики уйғур рәссами мәрвайит һапиз ханимға аит болуп, у йәнә , сиясәтниң сәнәткә мудахилә қилиши сәнәтниң тәрәққиятиға тосалғу болидиғанлиқини, уйғур сәнетиниң һазирқи әһвалидин көрүвелишқа болиду, дәп көрсәтти.

Хитай мәтбуатлириниң бу һәқтики хәвиригә қариғанда "нәнҗиң ‏- нәнҗиң" филиминиң реҗиссори лу чуән ахбарат саһәсигә баянат елан қилип, өзиниң тибәт һәққидики филимниң кино фестивалида қоюлидиғанлиқидин 4 ‏- числа хәвәр тапқанлиқини вә фестивални байқут қилишни қарар қилғанлиқини билдүргән. Лу чүән бу һәқтики баянатида "һәр қандақ нәрсидә дөләт мәнпәәтини муһим орунға қоюш керәк. Бизниң бу мәсилидики позитсийиимиз һечқандақ иккиләнмәй чоқум фестивалдин чекинип чиқиштур" дегән.

Хитай 2009 ‏- йили 8 - айда рабийә қадир ханим һәққидики"муһәббәтниң 10 шәрти" филиминиң мелборин кино фестивали вә тәйвәнниң гавшюң кино фестивалида қоюлушиға қарши чиққан. Хитай мелборин вә гавшюң кино фестиваллирини байқут қилған болсиму, лекин австиралийә билән тәйвәнни тез пүктүрәлмигән иди.

Мәрвайит һапиз ханим лу чүәнниң сөзлирини тәнқидләп, сәнәтни сиясәтниң таразисида тартиш сәнәттики тәпәккүр әркинликини боғидиғанлиқини билдүрди. У, бу филим "мустәқилиқниң тәрғибати әмәс, риаллиқни әкс әттүрүштур" дәйду.

"Палма баһари" хәлқара кино фестивали тор бетиниң тонуштурушиға қариғанда "булут арқисидики қуяш" филимини фестивалға қатнаштурғучи дөләт һиндистан болуп, тәхминән бир саәт 20 минутлуқ филимниң реҗиссори литу сарин билән тәнзин сонам исимлик тибәт қан сестимисидики сәнәтчиләрдур. "Палма баһари" хәлқара кино фестивали 18 ‏-январға қәдәр давамлишиду. "Булут арқисидики қуяш" филими болса 1 - айниң 10 ‏- вә 12 ‏- күни икки мәйдан қоюлидикән.

Нөвәттә "булут арқисидики қуяш" филиминиң оскар мукапатиниң мунәввәр һөҗҗәтлик филимләр намзатлиқиға көрситилидиған яки көрситилмәйдиғанлиқи мәлум әмәс. Бәзи анализчилар әгәр "булут арқисидики қуяш" оскар мукапатиға намзатлиққа көрситилсә, хитай оскар мукапатини байқут қиламду? дегән соални қоюшқан.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)
Share
Толуқ бәт