Сүбһи фонди тәшкилати уйғур йетим вә оқушсиз балиларға давамлиқ ярдәм қилидиғанлиқини билдүрди

Әнглийидики Dawn фонди тәшкилати йәни "сүбһи хәйр-сахавәт " фонди тәшкилати йеқинда әнглийиниң лондон шәһиридә "хитай, хитайдики унтулған мусулманларни есигә елиши керәк" дегән темида мәхсус йетим вә оқушсиз қалған уйғур балилириға ярдәм бериш ианә топлаш паалийити өткүзди.
Мухбиримиз әқидә
2011-01-10
Елхәт
Пикир
Share
Принт
Шәпәқ фонди җәмийити уйғур районида меһир - муһәббәт йәткүзмәктә
Шәпәқ фонди җәмийити уйғур районида меһир - муһәббәт йәткүзмәктә
www.dawn-foundation.co.uk

"Сүбһи хәйр-сахавәт " фондиниң мәзкур паалийитигә, лондон уйғур ансамбили йеқиндин һәмкарлашқан болуп, лондон уйғур ансамбилиниң қурғучиси әзиз әпәнди радиомиз мухбириға "сүбһи хәйри-сахавәт " тәшкилатиниң 2007-йилидин буян үрүмчи шәһиридә намрат, йетим-йесир балиларни оқутуш, игә чақисиз қери-чөриләрниң һалидин хәвәр елишқа охшаш хәйир-сахавәтлик ишлар билән шуғуллинип келиватқанлиқидин мәлумат бәргән иди.

Биз йәнә, мәзкур фонди тәшкилатиниң 2007-йили үрүмчидә 200 оқуғучини оқуш пурситигә игә қилғанлиқини, уларниң 156 нәпириниң уйғур оқуғучилар икәнликини, 6 яштин 16 яшқичә болған бу балиларниң 58 ниң ата-аниси йоқ йетим балилар икәнликидин хәвәр тапқан идуқ.

Бүгүн биз, "сүбһи хәйр-сахавәт" фондиниң рәиси Naemma Raza әпәндини зиярәт қилдуқ. У өзиниң буниңдин 10 йил бурун хитайниң гуаңҗу шәһиридә уйғурлар билән тонушқанлиқини вә үрүмчигә берип, намрат уйғурлар олтурақлашқан районда зиярәттә болуп, уйғурларниң қийинчилиқ ичидики ечинишлиқ турмушини көрүп, қурбиниң йетишичә ярдәм қилиш ирадисини турғузғанлиқини билдүрүп, "мән йетим балиларни, болупму оқушсиз балиларни көрсәм чидап туралмаймән, үрүмчидики йетим балилар шундақ әқиллиқ икән, әгәр улар яхши тәрбийилинип, мол-билимләргә игә болса, ишинимәнки, кәлгүсидә миллитигә ярамлиқ төһпикарлардин болуп йетишип чиқиду" деди.

Naemma Raza Әпәнди сөзидә йәнә, үрүмчидә йетим вә оқушсиз балилардин сирт, яшанған игә-чақисиз кишиләрниңму интайин көп икәнликини, буларниң һәммисиниң ярдәмгә еһтияҗлиқ икәнликини билдүрди.

"Сүбһи хәйри-сахавәт тәшкилати" ниң әсли мәқситиму, ярдәмсиз қалған кишиләргә ярдәм бериштин ибарәт. Нөвәттә уйғурларниң әһвали, болупму иқтисадий җәһәттә қийинчилиқ астида яшаватқанлиқи, болупму саватсизлиқ мәсилилири бизни чоңқур ойға салди, әлвәттә биз уйғурлар мәсилисини хәлқарада улар тоғрисида бериливатқан хәвәрләр арқилиқ чүшинип йәттуқ вә әнглийидики уйғурлар арқилиқ, болупму лондон уйғур ансамбилидин уйғурларни техиму ениқ тонудуқ. Буниңдин кейин техиму көп вә җанлиқ паалийәтләр уюштуруп уйғурлар үчүн хизмәт ишлисәк дегән үмидимиз бар."

Наемма әпәндидин биз йәнә "сүбһи хәйри-сахавәт " тәшкилатиниң паалийәтлиригә хитай һөкүмити қандақ позитсийә билдүрди дегән соални соридуқ. У: "биз қанунлуқ йосунда мунасивәтлик маарип тармақлири билән сөзлишип, йетим-йесирларни оқуш пурситигә игә қилиш рәсмийәтлирини беҗирдуқ. Мән тоғра йолда қиливатқан хизмитимизниң чоқум ахирғичә тосалғусиз давамлишидиғанлиқиға ишинимән" деди.

"Сүбһи хәйри-сахавәт " тәшкилатиниң" хитай, хитайдики унтулған мусулманларни есигә елиши керәк " темисида елип берилған уйғурларға ярдәм бериш ианә топлаш паалийитигә қатнашқан лондон уйғур ансамбилиниң әзаси низамидин әпәнди, наемма әпәнди башчилиқида елип берилған мәзкур паалийәттин чоңқур тәсирләнгәнликини билдүрди.

Лондон ансамбилиниң қурғучиси әзиз әпәнди, "сүбһи хәйри сахавәт" тәшкилати әнглийидә уйғурлар үчүн интайин муһим вә әһмийәтлик болған бу хизмәтни 2007-йили башлап, һазирға қәдәр давамлаштуруватқанлиқини вә бу хизмәтни буниңдин кейин техиму күчәйтидиғанлиқи һәққидә ипадә билдүргәнликини ейтип, "Naemma әпәнди башчилиқида елип бериливатқан уйғурлар үчүн ярдәм хизмити, әнглийидики башқа инсанпәрвәрләр үчүнму үлгилик вә түрткилик рол ойнайду" деди.

Толуқ бәт