Японийиниң төт нәпәр юқири палата әзасиниң хитай әлчиханисиға наразилиқ хети тапшуруши инкас қозғиди

Японийидә һакимийәт йүргүзүватқан японийә демократлар партийисиниң мукаяма нагао қатарлиқ төт нәпәр юқири палата әзасиниң хитай әлчиханисиға наразилиқ хети тапшурғанлиқи японийә мәтбуатлирида инкас қозғиди.
Мухбиримиз меһрибан
2012-05-30
Елхәт
Пикир
Share
Принт
4-Нөвәтлик дуня уйғур қурултийиниң ечилиш мурасими японийә парламент йиғин залида өткүзүлди. 2012-Йили 14-май, токйо.
4-Нөвәтлик дуня уйғур қурултийиниң ечилиш мурасими японийә парламент йиғин залида өткүзүлди. 2012-Йили 14-май, токйо.
RFA/Erkin Tarim

Мәлум болушичә, хитайниң японийидә турушлуқ баш әлчиси чен йоңхуаниң мушу айниң оттурилирида японийидики әркин демократлар партийисиниң 90 дин артуқ парламент әзасиға язған хетидә, «японийиниң дуня уйғур қурултийиниң японийидә йиғин чақиришиға йол қойғанлиқиға қарши туридиғанлиқи» ни билдүргәнлики, японийә парламентидики өктичи партийә һесаблинидиған әркин демократлар партийиси әзалириниңла наразилиқини қозғап қалмастин, бәлки һакимийәт йүргүзүватқан японийә демократлар партийиси әзалири тәрипидинму «японийиниң ички ишлириға қопаллиқ билән арилашқанлиқ» дәп әйибләнгән.

18-Май күни японийидики өктичи партийә- әркин демократлар партийисидин болған 46 нәпәр парламент әзаси, имзалиқ хәт йезип, хитай баш әлчисиниң бу қилмишиға наразилиқини билдүргән. Улар йәнә хитайниң японийидики баш әлчиси чен йоңхуаниң японийә парламент әзалириға язған хетиниң әсли нусхисини мәтбуатларда елан қилған.

30-Май күни нөвәттә һакимийәт йүргүзүватқан японийә демократлар партийисиниң парламенттики төт нәпәр ғоллуқ әзасиму хитай баш әлчисини әйибләп наразилиқ хети әвәткән. Нөвәттә бу вәқә йәнә бир қетим японийә мәтбуатлириниң қизиқ темисиға айланди.

Японийидә чиқидиған «санки» гезитиниң 29-майдики хәвиридә һәм «японийә күндилик хәвәрлири» гезитиниң 30-май күнидики инглизчә санида бу төт нәпәр юқири палата әзасиниң японийидә һазир һакимийәт йүргүзүватқан демократлар партийисиниң ғоллуқ әзалири икәнлики алаһидә тилға елинип, уларниң хитай баш әлчисигә наразилиқ хети сунушиниң сәвәби хитай баш әлчисиниң мушу айниң оттурилирида японийә парламент әзалириға дуня уйғур қурултийиниң японийидә ечилишиға наразилиқ билдүрүп язған хетиниң японийә парламент әзалириниң наразилиқини қозғиғанлиқи сәвәбидин икәнлики илгири сүрүлди.

«японийә күндилик хәвәрлири» гезитидики хәвәрдә, японийиниң һакимийәт үстидики партийидин болған парламент әзалириниң хетидә язған сөзи нәқил елинип, «хитай баш әлчисиниң японийә парламент әзалиридин дуня уйғур қурултийиниң йиғиниға қатнашмақлиқни тәләп қилиши, японийиниң ички ишлириға арилашқанлиқ» дегән баянлар берилди.

Дуня уйғур қурултийиниң японийә һәм шәрқий җәнубий асия ишлириға мәсул муавин рәиси илһам мәхмут әпәнди, радиомиз зияритини қобул қилип, хитайниң японийидики баш әлчисиниң дуня уйғур қурултийиниң ечилиш мәзгилидә японийә парламент әзалириға хәт йезип, улардин дуня уйғур қурултийиниң японийидики паалийәтлирини чәкләшни тәләп қилиши, японийә парламент әзалириниң наразилиқини қозғиғанлиқини билдүрди.

Илһам мәхмут әпәнди йәнә дуня уйғур қурултийиниң 4-нөвәтлик йиғининиң японийидә ечилишиға хитай һөкүмити тосқунлуқ қилған болсиму, әмма японийиниң бир демократик дөләт болуш сүпити билән қурултайниң японийидә ечилиши үчүн әң яхши шараитларни яритип бәргәнликини билдүрүп, японийә һөкүмитиниң һеқиқи бир демократик дөләткә хас салапәтни ипадилигәнликини мәдһийилиди.

Пикирләр (0)
Share
Толуқ бәт