Yaponiyining töt neper yuqiri palata ezasining xitay elchixanisigha naraziliq xéti tapshurushi inkas qozghidi

Yaponiyide hakimiyet yürgüzüwatqan yaponiye démokratlar partiyisining mukayama naga'o qatarliq töt neper yuqiri palata ezasining xitay elchixanisigha naraziliq xéti tapshurghanliqi yaponiye metbu'atlirida inkas qozghidi.
Muxbirimiz méhriban
2012-05-30
Élxet
Pikir
Share
Print
4-Nöwetlik dunya Uyghur qurultiyining échilish murasimi yaponiye parlamént yighin zalida ötküzüldi. 2012-Yili 14-may, tokyo.
4-Nöwetlik dunya Uyghur qurultiyining échilish murasimi yaponiye parlamént yighin zalida ötküzüldi. 2012-Yili 14-may, tokyo.
RFA/Erkin Tarim

Melum bolushiche, xitayning yaponiyide turushluq bash elchisi chén yongxu'aning mushu ayning otturilirida yaponiyidiki erkin démokratlar partiyisining 90 din artuq parlamént ezasigha yazghan xétide, "Yaponiyining dunya Uyghur qurultiyining yaponiyide yighin chaqirishigha yol qoyghanliqigha qarshi turidighanliqi" ni bildürgenliki, yaponiye parlaméntidiki öktichi partiye hésablinidighan erkin démokratlar partiyisi ezaliriningla naraziliqini qozghap qalmastin, belki hakimiyet yürgüzüwatqan yaponiye démokratlar partiyisi ezaliri teripidinmu "Yaponiyining ichki ishlirigha qopalliq bilen arilashqanliq" dep eyiblen'gen.

18-May küni yaponiyidiki öktichi partiye- erkin démokratlar partiyisidin bolghan 46 neper parlamént ezasi, imzaliq xet yézip, xitay bash elchisining bu qilmishigha naraziliqini bildürgen. Ular yene xitayning yaponiyidiki bash elchisi chén yongxu'aning yaponiye parlamént ezalirigha yazghan xétining esli nusxisini metbu'atlarda élan qilghan.

30-May küni nöwette hakimiyet yürgüzüwatqan yaponiye démokratlar partiyisining parlaménttiki töt neper gholluq ezasimu xitay bash elchisini eyiblep naraziliq xéti ewetken. Nöwette bu weqe yene bir qétim yaponiye metbu'atlirining qiziq témisigha aylandi.

Yaponiyide chiqidighan "Sanki" gézitining 29-maydiki xewiride hem "Yaponiye kündilik xewerliri" gézitining 30-may künidiki in'glizche sanida bu töt neper yuqiri palata ezasining yaponiyide hazir hakimiyet yürgüzüwatqan démokratlar partiyisining gholluq ezaliri ikenliki alahide tilgha élinip, ularning xitay bash elchisige naraziliq xéti sunushining sewebi xitay bash elchisining mushu ayning otturilirida yaponiye parlamént ezalirigha dunya Uyghur qurultiyining yaponiyide échilishigha naraziliq bildürüp yazghan xétining yaponiye parlamént ezalirining naraziliqini qozghighanliqi sewebidin ikenliki ilgiri sürüldi.

"Yaponiye kündilik xewerliri" gézitidiki xewerde, yaponiyining hakimiyet üstidiki partiyidin bolghan parlamént ezalirining xétide yazghan sözi neqil élinip, "Xitay bash elchisining yaponiye parlamént ezaliridin dunya Uyghur qurultiyining yighinigha qatnashmaqliqni telep qilishi, yaponiyining ichki ishlirigha arilashqanliq" dégen bayanlar bérildi.

Dunya Uyghur qurultiyining yaponiye hem sherqiy jenubiy asiya ishlirigha mes'ul mu'awin re'isi ilham mexmut ependi, radi'omiz ziyaritini qobul qilip, xitayning yaponiyidiki bash elchisining dunya Uyghur qurultiyining échilish mezgilide yaponiye parlamént ezalirigha xet yézip, ulardin dunya Uyghur qurultiyining yaponiyidiki pa'aliyetlirini chekleshni telep qilishi, yaponiye parlamént ezalirining naraziliqini qozghighanliqini bildürdi.

Ilham mexmut ependi yene dunya Uyghur qurultiyining 4-nöwetlik yighinining yaponiyide échilishigha xitay hökümiti tosqunluq qilghan bolsimu, emma yaponiyining bir démokratik dölet bolush süpiti bilen qurultayning yaponiyide échilishi üchün eng yaxshi shara'itlarni yaritip bergenlikini bildürüp, yaponiye hökümitining héqiqi bir démokratik döletke xas salapetni ipadiligenlikini medhiyilidi.

Toluq bet