Учтурпандики апәткә учриған хәлқләр қийинчилиққа учримақта

2005-02-16
Елхәт
Пикир
Share
Принт

15 - Фиврал күни әтигән саәт бәш йеримларда учтурпан наһийисидә қаттиқ йәр тәвригән иди. Йәр тәврәштә һечқандақ адәм зиян- зәхмәткә учримиған. Бирақ йеңи ават , имамлирим вә ямансу йезисидики нурғун аһалиләр охшаш болмиған дәриҗидә апәтниң тәсиригә учриған болуп, бәзи аилиликләрниң өйи өрүлүп чүшкән. Бәзилириниң өйигә болса чак кәткән.

Йәр тәврәш апити йүз бәргәндин кийин, хитай мәтбуатлири бәс- бәстә хәвәр берип, апәткә учриған раюнлардики хәлқләрниң турмуши вә апәттин қутқузуш әһваллирини тонуштурған.

Хитай мәтбуатлирида

Апәткә учриған хәлқ барла йәрдә һөкүмәт кадирлири улар билән биллә.

"Шинхуа тор бети" чаршәнбә күни бәргән хәвиридә, "мухбиримиз йеңи ават йезисида хәлқләрниң турмушлириниң илгирикидәкла нормал давам итиватқанлиқини көрди. Чарвичилар йәнила аптапта қойлирини бодаветипту. яшанғанлар болса йол бойлирида параңлишиветипту. Уларниң турмуши нормал кетиветипту", дейилгән.

Хәвәрдә йәнә, учтурпан наһийилик һәр қайси тармақлар вә йеңи ават йезисидики хизмәтчи хадимларниң нәқ мәйдандики қутқузуш ишлириға қатнишиватқанлиқини, йәр тәврәштә өрүлүп чүшкән вә яки чак кәткән өйләрдики аһалиләрниң хулум- хошниларниң өйлиригә вә қишлиқ чедирларға йөткәлгәнликини билдүрүп, апәт районида бирму киши сиртта қалидиған вә яки хәтәрлик чак кәткән өйләрдә түнәйдиған әһваллар көрүлмигәнликини мәлум қилди.

Хитай даирилири: апәткә учриғанлар тәл төкүс орунлаштурулди

Биз хәлқниң апәткә учраш әһвали вә апәттин қутқузуш ишлири һәққидә техиму илгирлигән һалда мәлумат игиләш үчүн, учтурпан наһийилик партком ишханисиға телефон қилғинимизда, бир мәсул хадим нөвәттә қутқузуш ишлириниң җидди давам қиливатқанлиқини билдүрди.

Униң ейтишичә, нөвәттә учтурпан наһийилик партком вә һөкүмәт даирилири апәткә учриған барлиқ хәлқләрни тәл төкүс орунлаштуруп болған. У сөзидә, апәткә учриған хәлқ барла йәрдә һөкүмәт кадирлириниң, улар билән биллә боливатқанлиқини билдүрди. У йәнә, апәткә учриған хәлқниң иссиниш, йимәк- ичмәк вә туралғу җай мәсилисиниң пүтүнләй һәл болғанлиқини көрсәтти.

Униң билдүрүшичә, ақсу вилайәтлик хәлқ ишлири идариси әвәткән чедир, ун, гүрүч , көмүргә охшаш ярдәм боюмлири апәткә учриған хәлққә йәткүзүлгән. Бирақ, у қанчилик ярдәм боюмлириниң тарқитилғанлиқи һәққидә техи ениқ мәлуматниң йоқлиқини ийтти.

Өзимизниң кигизлиримизни ачиқип, сөгәтниң бадирлири билән чедир ясап, дәккә – дүккидә, йүрикимиз поп-пок һалда ухлимай өтүватимиз.

ярдәм техи кәлмиди

Ундақта, учтурпан наһийисидики апәткә учриған хәлқләр һәқиқәтән керәклик ярдәмләргә еришип, турмушлирини орунлаштуривалдиму?

Биз бу һәқтә мәлумат игиләш үчүн йәр тәврәш апитиниң әң еғир зәрбисигә учриған йеңи ават йезисидики кишиләргә телифон қилдуқ. Зияритимизни қубул қилған бир киши, йәр тәврәш апити йүз бәргили икки күн болған болсиму, әмма уларниң кәнтигә һечқандақ ярдәмниң йитип кәлмигәнликини, кәнт рәһбириниң келип чак кәткән өйләрни тизимлап кәткәндин башқа деһқанларниң һали билән кари болмиғанлиқи вә деһқанларниң наһайити нарази икәнликини билдүрди.

У йәнә, өзиниң икки еғиз өйи вә қотанлириниң сәйшәнбә күнидики йәр тәврәштә аман- исән қалған билән, униңдин кейинки яққан қар вә әгәшмә йәр тәврәш сәвәбидин бүгүн өрүлүп чүшкәнликини, қарниң 20 сантеметр әтрапида икәнликини билдүрди.

Сәйшәнбә күни әтигән учтурпан наһийисидә йүз бәргән 6.2 Бал йәр тәврәшниң тәсиригә учтурпан наһийисиниң башқа йезилириму охшаш болмиған дәриҗидә учриған.

Өзимиз кегиздә чедир қуруп түнәватимиз

Өзлиримизгә чәк кәтти. Шундақтиму һава соғуқ болғачқа шу өйләрдә йетишқа мәҗбур болдуқ.

Имамлирим йезисидики бир деһқан аял, өзлириниң өйлиригиму чак кәткәнликини, бирақ сирт соғуқ болғанлиқи үчүн, чак кәткән хәтәрлик өйләрдә түнәшкә мәҗбур боливатқанлиқини билдүрүп, өзлириниң кегизләр билән чедир қуруп, сиртта ухлимай өтиватқанлиқини билдүрди.

Учтурпан ямансу йезисидики бир қисим аһалиләрдин игилишимизчә, уларниң йезисида бир нәччә йилдин боян йәр тәврәшкә бәрдашлиқ берәләйдиған бәш - алтә йүз йүрүштәк өй селинғачқа вә қурбити йәткәнләр лимлиқ өйләрни селиватқачқа, уларниң йезисида өйлири чүшүп кетидиған вә чак кетидиған әһваллар бираз аз көрүлгән.

Хитай ишләпчиқириш қурулуш армийиси өйлири учриған зиян аз болған

Сәйшәнбә күни зияритимизни қубул қилған ақсу вилайәтлик йәр тәврәш идарисиниң ли фамилилик бир хадимму, учтурпан наһийиси йәр тәврәш бәлбиғида болғанлиқи үчүн, 1970 - йиллардин башлап, бу районда йәр тәврәшкә бәрдашлиқ берәләйдиған өйләрниң селинғанлиқини билдүргән. У йәнә, бу қетимқи йәр тәврәш апитигә қаттиқ учриған райондики хитай ишләпчиқириш қурулуш армийиси деһқанчилиқ 1 - дивизийиси 4 - полкиниң бу хизмәтләрни яхши ишлигәнлики үчүн, уларда өйләрниң өрүлүш , чак кетиш әһваллириниң аз көрүлгәнлики, өйлири өрүлгәнләрниң һәммисиниң чәт- чегра йезилардики намрат уйғур деһқан- чарвичилири икәнликини көрсәткән иди.

Хитай һөкүмитиниң зувани болған шинхуа агентлиқиниң әң йеңи мәлуматлирида ейтилишичә, чаршәнбә күни чүштин кейингичә учтурпан наһийисидә 89 аилиликниң өйи өрүлүп, 900 гә йеқин аилиликниң өйи қисмән вәйран болған. Йәрлик даириләр апәт районлиридики зиянға учраш әһваллирини давамлиқ тәкшүрмәктә икән. (Арзу)

Пикирләр (0)
Share
Толуқ бәт