Йәр тәврәш апитиниң тәсиригә учриған хәлқләр қийинчилиққа дүч кәлмәктә

2005-02-18
Елхәт
Пикир
Share
Принт
CHINA-QUAKE-WARM-200.jpg
2003-Йил февралда чоңқурчақта йүз бәргән йәр тәврәштин кейинки иккинчи кечини сиртта өткүзгән бу киши от иссинмақта.

Үчтурпан наһийисидики 6.2 Бал йәр тәврәш апитиниң йүз бәргинигә 4 күн болуп қалди. Нәччә күндин бери уда йеғиватқан қар сәвәбидин, апәт тәсиридә дәз кәткән вә мәлум дәриҗидә зиянға учриған өйләр давамлиқ өрүлүп чүшмәктә. Үчтурпан наһийилик хәлқ һөкүмитиниң елан қилған хәвиригә қариғанда, мәзкүр наһийидә һазирғичә җәмий 8126 еғиз өй өрүлүп чүшкән. Шундақла, дәз кетип хәтәр аситида қалған өйләрниң сани болса 26 миң еғиздин ашқан. Техи бир күн авал пүтүн наһийә бойичә 23 миң киши апәт тәсиригә учриғанлиқи мәлум болған болса, мана әмдиликтә апәт тәсиригә учриған хәлқниң сани 28 миң 5 йүздин ашқан.

Һөкүмәт ярдәм боюмлириниң йетишмигәнликини тунҗи қетим етирап қилди

Телевизорлардин пул, йимәк- ичмәк, кийим - кечәк вә йотқан көрпиләрниң ианә қилинғанлиқини көрдуқ, бирақ бизгә келип болалмиди.

Үчтурпан наһийилик партком тәшвиқат бөлүми җүмә күни тунҗи қетим қутқузуш боюмлириниң йетишмәйватқанлиқини етирап қилип, гәрчә бир қисим кишиләргә чедир өйләр берилгән болсиму, әмма көмүр, йотқан-көпә вә йимәк-ичмәккә охшаш турмуш боюмлириниң йетишмәслики сәвәбидин апәт районидики хәлқләрниң һазир соғақ қиш күнлирини өткүзүши тәскә тохтаватқанлиқини хәвәр қилди.

Диһқан: телевизорда көргән ярдәм боюмлар бизгә техи йетип кәлмиди

Үчтурпан наһийисиниң имамлирим йезисидики өйи пүтүнләй өрүлүп чүшүп 4 балиси билән чедирда йетишқа мәҗбур болған бир уйғур өзлириниң нөвәттики қийинчилиқлирини сөзләп, гәрчә телевизорларда көп ярдәмләрниң боливатқинини көриватқан болсиму, әмма у нәрсиләрниң өзлиригә техи йетип кәлмигәнликини ейтти.

Тешида қалғанлар йоқ. Һәммиси чедир өйләргә кирип болди.

Биз йәнә, йәр тәврәш апитиниң тәсиригә әң еғир учриған йеңи ават йезисидики қутқузуш ишлириниң қандақ елип бериливатқанлиқини ениқлаш үчүн йезилиқ һөкүмәт ишханисиға телефон қилдуқ. Бу йәрдики нөвәтчи хадим, һөкүмәтниң апәт районлириға йеқиндин көңүл бөлүп, түрлүк ярдәм боюмлирини бериватқанлиқини билдүрди.

Биз бу мунасивәт билән йеңи ават йезисиниң мәлум бир кәнтигә телефон улидуқ. Бу йәрдики йәр тәврәштә өйи өрүлүп чүшүп һазирғичә дәз кәткән өйдә далдинишқа мәҗбур болған исмини ашкарилашни халимиған бир уйғур, та бүгүнгә қәдәр һечкимниң уларниң кәнтигә келип һал- әһвал сорап бақмиғанлиқини, шундақла һөкүмәт уларниң һалиға йетиш у яқта турсун, бу кәнттики бир қисим кишиләрни мәҗбурий һалда йәнә бир кәнткә елип берип, өрүлгән өйләрни рәткә селиш әмгикигә салғанлиқини мәлум қилди.

Бу йәрдики деһқанларниң йиллиқ кирими һөкүмәт ейтқандәкму?

Йәнә шундақ дәз кәткән өйләрдә туриватимиз. Амал йоқ

Үчтурпан наһийиси дөләт дәриҗилик кәмбәғәл район һесаблинидиған болуп, үчтурпан наһийилик һөкүмәт бу йәрдики кишиләрниң йиллиқ кириминиң 1625 йүән икәнликини елан қилған. Йеңи ават йезисидики өзини оттура һал сәвийидә дәп қарайдиған бу деһқан, өзиниң йиллиқ кириминиң 150 йүән әтрапида келидиғанлиқини ейтти.

Зияритимиз давамида бу киши йәнә, һөкүмәтниң тездин уларниң қийинчилиқлирини бир тәрәп қилишини үмид қилидиғанлиқини ейтти. Шундақла апәт районидики зияритимизни қобул қилған кишиләр, бизниң уларниң һал-әһвалини сорап, сүрүштә қилип турушимизниң, улар үчүн толиму әһмийәтлик икәнликини билдүрди. (Пәридә)

Пикирләр (0)
Share
Толуқ бәт