Yer tewresh apitining tesirige uchrighan xelqler qiyinchiliqqa düch kelmekte

2005-02-18
Élxet
Pikir
Share
Print
CHINA-QUAKE-WARM-200.jpg
2003-Yil féwralda chongqurchaqta yüz bergen yer tewreshtin kéyinki ikkinchi kéchini sirtta ötküzgen bu kishi ot issinmaqta.

Üchturpan nahiyisidiki 6.2 Bal yer tewresh apitining yüz berginige 4 kün bolup qaldi. Nechche kündin béri uda yéghiwatqan qar sewebidin, apet tesiride dez ketken we melum derijide ziyan'gha uchrighan öyler dawamliq örülüp chüshmekte. Üchturpan nahiyilik xelq hökümitining élan qilghan xewirige qarighanda, mezkür nahiyide hazirghiche jem'iy 8126 éghiz öy örülüp chüshken. Shundaqla, dez kétip xeter asitida qalghan öylerning sani bolsa 26 ming éghizdin ashqan. Téxi bir kün awal pütün nahiye boyiche 23 ming kishi apet tesirige uchrighanliqi melum bolghan bolsa, mana emdilikte apet tesirige uchrighan xelqning sani 28 ming 5 yüzdin ashqan.

Hökümet yardem boyumlirining yétishmigenlikini tunji qétim étirap qildi

Téléwizorlardin pul, yimek- ichmek, kiyim - kéchek we yotqan körpilerning i'ane qilin'ghanliqini körduq, biraq bizge kélip bolalmidi.

Üchturpan nahiyilik partkom teshwiqat bölümi jüme küni tunji qétim qutquzush boyumlirining yétishmeywatqanliqini étirap qilip, gerche bir qisim kishilerge chédir öyler bérilgen bolsimu, emma kömür, yotqan-köpe we yimek-ichmekke oxshash turmush boyumlirining yétishmesliki sewebidin apet rayonidiki xelqlerning hazir soghaq qish künlirini ötküzüshi teske toxtawatqanliqini xewer qildi.

Dihqan: téléwizorda körgen yardem boyumlar bizge téxi yétip kelmidi

Üchturpan nahiyisining imamlirim yézisidiki öyi pütünley örülüp chüshüp 4 balisi bilen chédirda yétishqa mejbur bolghan bir Uyghur özlirining nöwettiki qiyinchiliqlirini sözlep, gerche téléwizorlarda köp yardemlerning boliwatqinini köriwatqan bolsimu, emma u nersilerning özlirige téxi yétip kelmigenlikini éytti.

Téshida qalghanlar yoq. Hemmisi chédir öylerge kirip boldi.

Biz yene, yer tewresh apitining tesirige eng éghir uchrighan yéngi awat yézisidiki qutquzush ishlirining qandaq élip bériliwatqanliqini éniqlash üchün yéziliq hökümet ishxanisigha téléfon qilduq. Bu yerdiki nöwetchi xadim, hökümetning apet rayonlirigha yéqindin köngül bölüp, türlük yardem boyumlirini bériwatqanliqini bildürdi.

Biz bu munasiwet bilen yéngi awat yézisining melum bir kentige téléfon uliduq. Bu yerdiki yer tewreshte öyi örülüp chüshüp hazirghiche dez ketken öyde daldinishqa mejbur bolghan ismini ashkarilashni xalimighan bir Uyghur, ta bügün'ge qeder héchkimning ularning kentige kélip hal- ehwal sorap baqmighanliqini, shundaqla hökümet ularning haligha yétish u yaqta tursun, bu kenttiki bir qisim kishilerni mejburiy halda yene bir kentke élip bérip, örülgen öylerni retke sélish emgikige salghanliqini melum qildi.

Bu yerdiki déhqanlarning yilliq kirimi hökümet éytqandekmu?

Yene shundaq dez ketken öylerde turiwatimiz. Amal yoq

Üchturpan nahiyisi dölet derijilik kembeghel rayon hésablinidighan bolup, üchturpan nahiyilik hökümet bu yerdiki kishilerning yilliq kirimining 1625 yüen ikenlikini élan qilghan. Yéngi awat yézisidiki özini ottura hal sewiyide dep qaraydighan bu déhqan, özining yilliq kirimining 150 yüen etrapida kélidighanliqini éytti.

Ziyaritimiz dawamida bu kishi yene, hökümetning tézdin ularning qiyinchiliqlirini bir terep qilishini ümid qilidighanliqini éytti. Shundaqla apet rayonidiki ziyaritimizni qobul qilghan kishiler, bizning ularning hal-ehwalini sorap, sürüshte qilip turushimizning, ular üchün tolimu ehmiyetlik ikenlikini bildürdi. (Peride)

Pikirler (0)
Share
Toluq bet