Amérika kéngesh palata ezasi xitayni eyiblidi

2007-08-15
Élxet
Pikir
Share
Print

14- Awghust seyshenbe küni amérikidiki eng chong oyunchuq shirkiti mattél özi bazargha salghan oyunchuqlarda bixeterlik mesilisi sadir bolghanliqi seweblik, pütün dunya miqyasida 18 milyon danidin artuq balilar oyunchuqini yighiwélish uqturushi chiqardi.

Mezkur shirket, mushu ayning béshida xitayda ishlitip özi bazargha salghan 1.5 Milyon dane balilar oyunchuqlirini oxshash sewebler tüpeyli yighiwalghan bolup, melum bolushiche mezkur oyunchuqlarda balilarning salametlikige zexmet élip kélidighan zeherlik madda, qoghushun bayqalghan.

Az miqdardiki magnitmu intayin xeterlik

Amérika istémalchilar bixeterliki komitétining re'isi nensiy nord bu nöwet yighiwélish uqturushi chiqirishta, bezi oyunchuqlarda qoghushun arilashqan sir, beziliride ajrap chiqip kétidighan magnit uwaqliri bayqalghanliqidin ibaret ikki xil seweb barliqini we az miqdardiki magnitningmu intayin xeterlik ikenlikini bildürdi we: " komitétimiz magnit uwaqlirining xetiri heqqide agahlandurush bérip kéliwatqinigha bir yildin ashti. Eger bir- ikki tal magnit yutuwélinsa, üchey yolida yallugh peyda qilidu, ücheyni téshiwétidu yaki hezim yollirining tosulup qélishini keltürüp chiqiridu" dédi.

Dik durbin ":emdi emeliy heriket qollinidighan peyt keldi"

Mushu munasiwet bilen amérika kéngesh palata ezasi, démokrat dik durbin bayanat élan qilip, xitayni tawarlarning bixeterliki mesiliside eyiblep, oyunchuq zawutliri bashqilarning tekshürüshni choqum aktip halda qobul qilishi kérek ikenlikini tekitlidi.

Dik durbin bayanatida, her heptide dégüdek bir qétim xitay ishligen oyunchuqlarni yighiwélish uqturushi chiqiwatqanliqini körsitip: " biz xitayning boshang bixeterlik ölchemlirige qarita zerbe bérishini emdi kütüp turalmaymiz. Bundaq halet, yene köpligen balilar we a'ililer xeterge yoluqushidin ilgiri choqum toxtishi kérek." Dédi.

U yene, " bu bir jiddiy mesile. Men xitaydin kélidighan barliq sirlan'ghan balilar mehsulatliri choqum waqitliq tutup qélinip tekshürülüshi kérek dep oylaymen" dep otturigha qoydi.

Kéngesh palata ezasi dik durbin tünügün élan qilghan bayanatida, bu qétimliq yighiwélish uqturushining import qilishta mewjud bolup turuwatqan mesililerni roshenleshtürgenlikini, bixeterlik ölchimi töwen döletlerdin mal import qilghanda balilar we a'ililerning bixeterlikini qoghdash üchün hoshyarliqni téximu östürüshning intayin zörür ikenlikni otturigha qoydi we: "biz import qilinidighan mallargha nisbeten ijabiy bixeterlik ölchemlirige mohtaj. Istémalchilar bixeterlikni qoghdash komitéti öz xizmitining höddisidin chiqishi kérek. Emdi sözlishidighan peyt ketti. Emeliy heriket qollinidighan peyt keldi" dédi.

Dob ékért ": keskin heriket qollinimiz"

Mattél shirkitining bashliqi dob ékért, bu hadisidin chongqur epsuslinidighanliqini, ümidsizlen'genlikini we mushu munasiwet bilen ata- anilardin epu soraydighanliqini bildürdi hemde: "biz bilen toxtamlashquchilar, qa'idige xilapliq qilghanliqi seweblik sistémimizda nuqsan körüldi. Biz buninggha qarita keskin heriket qollinimiz" dédi.

B b s muxbiri kuwintin so'érwil, aldinqi qétim xitayda ishlen'gen balilar oyunchuqlarning yighiwélish uqturushi chiqirilghanda xitayning xéli tiz heriketke kelgenlikini körsitip:"xitay hökümiti köpinche hallarda téz heriket qollanmaydu emma ular kishilerning " xitayda ishlendi" dégen markigha nisbeten ishenchini tézdin yoqitidighanliqini tonup yetti" deydu.

Ötken hepte xitay hökümiti, mattél shirkiti yighiwélish uqturushi chiqarghan oyunchuqlarni yasighan lida shirkitining amérikigha mal éksport qilishini waqitliq toxtatqandin kéyin, mezkur shirketning bashliqi ötken hepte axiri özini olturuwalghan idi. (Jüme)

Pikirler (0)
Share
Toluq bet