Муһаҗирәттики уйғурлар арисида «# техичә учур йоқ!» һәрикити давамлашмақта

Мухбиримиз меһрибан
2019-12-16
Елхәт
Пикир
Share
Принт
Уйғур аптоном райониниң рәиси шөһрәт закир мухбирларниң соаллириға җаваб бәрмәктә. 2019-Йили 30-июл, бейҗиң.
Уйғур аптоном райониниң рәиси шөһрәт закир мухбирларниң соаллириға җаваб бәрмәктә. 2019-Йили 30-июл, бейҗиң.
AP

3-Декабир күни америка авам палатасида «уйғур кишилик һоқуқи қануни лайиһиси» 1 гә қарши 407 аваз билән мақуллуқтин өткәндин кейин хитай һөкүмити арқа-арқидин наразилиқ баянатлирини елан қилип, америкаға қарши омумйүзлүк тәшвиқат һуҗуми башлиди.

9-Декабир күни хитай дөләт кабинетиниң бейҗиңда өткүзгән ахбарат елан қилиш йиғинида уйғур аптоном райониниң қорчақ рәиси шөһрәт закир аталмиш «кәспий тәрбийәләш мәркәзлири» намидики лагерларда тутуп турулуватқан тутқунларниң «оқуш» пүттүрүп, өйлиригә қайтқанлиқини, әмма йеңи тәрбийәләнгүчиләрниң бу лагерларға давамлиқ кирип-чиқип туридиғанлиқини билдүрди.

Шөһрәт закир сөзидә «нөвәттә тәрбийәләнгүчиләрниң һәммиси оқуш пүттүрүп болди… улар һөкүмәтниң ярдимидә муқим ишқа орунлишип, турмуш сапаси юқири көтүрүлди,» дегән. У йәнә бу хил тәрбийәләшниң «кишиләрниң шәхсий арзуси асасида давамлишиватқанлиқини, тәрбийәләнгүчиләр бу орунларға әркин кирип-чиқип туруватқанлиқи» ни билдүргән.

Шөһрәт закир бу сөзләрни қилған вақитта хәлқара таратқуларда лагер шаһитлириниң гуваһлиқ сөзлири вә кишилик һоқуқ тәшкилатлириниң доклатлири арқа-арқидин елан қилинивататти. Йәни хитайниң лагерлардики нурғун тутқунларни қамаққа һөкүм қилип, уларни түрмиләргә йөткигәнлики, көп қисим лагер тутқунлирини лагерлар йенидики завут фабрикаларға орунлаштуруп, уларни мәҗбурий әмгәккә селиватқанлиқи ашкариланған иди. Шуңа шөһрәт закирниң бу баянати хәлқарада җиддий инкас қозғиди.

Хәлқара таратқуларда муһаҗирәттики уйғурларниң вәтәндики уруқ-туғқанлири билән бималал сөзлишиш имканийитигә игә әмәслики хәвәр қилиниватқан бир мәзгилдә америкадики уйғур паалийәтчилиридин бәһрам синташниң тәшәббуси билән иҗтимаий таратқуларда «# техичә учур йоқ!» һәрикити қанат яйди. Бу һәрикәт давамида муһаҗиртәттики көплигән уйғурлар өзлириниң җаза лагерлириға қамалған уруқ-туғқанлириниң сүрәтлирини көрситип, ата-ана вә уруқ-туғқанлиридин «техичә учур йоқлуқи» ни билдүрди.

Бу һәрикәткә қатнашқан уйғурлардин американиң бостон шәһиридә турушлуқ марийә ханим, виргинийә шитатитида яшайдиған җүрәт низамидин әпәнди вә германийәдики таһир мутәллип әпәндиләр радийомиз зияритини қобул қилди.

Улар өз аилисидикиләрниң техичә лагерларда икәнликини, улардин һазирға кәлгүчә һечқандақ учур алалмиғанлиқини баян қилип, уйғур аптоном райониниң рәиси шөһрәт закирниң баянатиға соал қойди. Улар шөһрәт закирниң «кәспий тәрбийәләш мәркәзлири» намидики лагерларда тутуп турулуватқан тутқунларниң «оқуш» пүттүрүп, өйлиригә қайтқанлиқи һәққидики сөзлириниң әмәлийәттә хитайниң хәлқара җәмийәтниң көзини бояш үчүн елип барған ялғанчилиқ һәрикити икәнликини билдүрди.

Улар зияритимиз җәрянида хитай һөкүмитиниң ялғанчилиқини дуняға аңлитиш, хәлқара бесим арқилиқ хитай һөкүмитини лагерларға қамалған уйғурларни қоюп беришкә мәҗбурлаш, өзлири яшаватқан дөләтләрни хитай һөкүмитигә қарита әмәлий тәдбир елишқа дәвәт қилиш үчүн «#техичә учур йоқ!» һәрикитигә паал аваз қошқанлиқини илгири сүрди.

Программиниң тәпсилатини юқириқи аваз улинишидин аңлиғайсиләр.


Пикирләр (0)
Share
Толуқ бәт