Muhajirettiki Uyghurlar arisida "# Téxiche uchur yoq!" herikiti dawamlashmaqta

Muxbirimiz méhriban
2019-12-16
Élxet
Pikir
Share
Print
Uyghur aptonom rayonining re'isi shöhret zakir muxbirlarning so'allirigha jawab bermekte. 2019-Yili 30-iyul, béyjing.
Uyghur aptonom rayonining re'isi shöhret zakir muxbirlarning so'allirigha jawab bermekte. 2019-Yili 30-iyul, béyjing.
AP

3-Dékabir küni amérika awam palatasida "Uyghur kishilik hoquqi qanuni layihisi" 1 ge qarshi 407 awaz bilen maqulluqtin ötkendin kéyin xitay hökümiti arqa-arqidin naraziliq bayanatlirini élan qilip, amérikagha qarshi omumyüzlük teshwiqat hujumi bashlidi.

9-Dékabir küni xitay dölet kabinétining béyjingda ötküzgen axbarat élan qilish yighinida Uyghur aptonom rayonining qorchaq re'isi shöhret zakir atalmish "Kespiy terbiyelesh merkezliri" namidiki lagérlarda tutup turuluwatqan tutqunlarning "Oqush" püttürüp, öylirige qaytqanliqini, emma yéngi terbiyelen'güchilerning bu lagérlargha dawamliq kirip-chiqip turidighanliqini bildürdi.

Shöhret zakir sözide "Nöwette terbiyelen'güchilerning hemmisi oqush püttürüp boldi… ular hökümetning yardimide muqim ishqa orunliship, turmush sapasi yuqiri kötürüldi," dégen. U yene bu xil terbiyeleshning "Kishilerning shexsiy arzusi asasida dawamlishiwatqanliqini, terbiyelen'güchiler bu orunlargha erkin kirip-chiqip turuwatqanliqi" ni bildürgen.

Shöhret zakir bu sözlerni qilghan waqitta xelq'ara taratqularda lagér shahitlirining guwahliq sözliri we kishilik hoquq teshkilatlirining doklatliri arqa-arqidin élan qiliniwatatti. Yeni xitayning lagérlardiki nurghun tutqunlarni qamaqqa höküm qilip, ularni türmilerge yötkigenliki, köp qisim lagér tutqunlirini lagérlar yénidiki zawut fabrikalargha orunlashturup, ularni mejburiy emgekke séliwatqanliqi ashkarilan'ghan idi. Shunga shöhret zakirning bu bayanati xelq'arada jiddiy inkas qozghidi.

Xelq'ara taratqularda muhajirettiki Uyghurlarning wetendiki uruq-tughqanliri bilen bimalal sözlishish imkaniyitige ige emesliki xewer qiliniwatqan bir mezgilde amérikadiki Uyghur pa'aliyetchiliridin behram sintashning teshebbusi bilen ijtima'iy taratqularda "# Téxiche uchur yoq!" herikiti qanat yaydi. Bu heriket dawamida muhajirtettiki köpligen Uyghurlar özlirining jaza lagérlirigha qamalghan uruq-tughqanlirining süretlirini körsitip, ata-ana we uruq-tughqanliridin "Téxiche uchur yoqluqi" ni bildürdi.

Bu heriketke qatnashqan Uyghurlardin amérikaning boston shehiride turushluq mariye xanim, wirginiye shitatitida yashaydighan jür'et nizamidin ependi we gérmaniyediki tahir mutellip ependiler radiyomiz ziyaritini qobul qildi.

Ular öz a'ilisidikilerning téxiche lagérlarda ikenlikini, ulardin hazirgha kelgüche héchqandaq uchur alalmighanliqini bayan qilip, Uyghur aptonom rayonining re'isi shöhret zakirning bayanatigha so'al qoydi. Ular shöhret zakirning "Kespiy terbiyelesh merkezliri" namidiki lagérlarda tutup turuluwatqan tutqunlarning "Oqush" püttürüp, öylirige qaytqanliqi heqqidiki sözlirining emeliyette xitayning xelq'ara jem'iyetning közini boyash üchün élip barghan yalghanchiliq herikiti ikenlikini bildürdi.

Ular ziyaritimiz jeryanida xitay hökümitining yalghanchiliqini dunyagha anglitish, xelq'ara bésim arqiliq xitay hökümitini lagérlargha qamalghan Uyghurlarni qoyup bérishke mejburlash, özliri yashawatqan döletlerni xitay hökümitige qarita emeliy tedbir élishqa dewet qilish üchün "#Téxiche uchur yoq!" herikitige pa'al awaz qoshqanliqini ilgiri sürdi.

Programmining tepsilatini yuqiriqi awaz ulinishidin anglighaysiler.


Toluq bet