Dalay lamaning italiyige qilidighan ziyariti, xitay hökümitini bi'aram qilmaqta

2007-11-24
Élxet
Pikir
Share
Print

Italiye hökümet da'iriliri, xitay hökümitining tibetning diniy we siyasiy dahisi dalay lamaning italiyige qilidighan ziyaritini bikar qilish toghrisidiki, teleplirini ret qildi.

Italiye metbu'atining xewer qilishiche, xitay hökümiti dalay lamaning bu yil 16‏- dékabir küni italiyge qilidighan ziyariti tüpeylidin italiye hökümitige qattiq naraziliq bildürüp, italiye hökümitidin dalay lamaning ziyaritini bikar qilishini telep qilghan. Xewerde éytilishiche, italiyidiki xitay bash elchisi italiye hökümitige ewetken naraziliq xétide, italiye hökümiti dalay lamaning ziyaritini bikar qilmisa, xitay tashqi ishlar minstiri yang jéchining italiyige qilidighan ziyaritini bikar qilidighanliqini shuningdek dalay lamaning ziyaritining xitay-italiye soda munasiwetlirige selbiy tesiri yetküzidighanliqini, tekitligen.

Xewerlerge qarighanda, bolupmu dalay lamaning italiyining pédmont ölkisining re'isi teripidin resimi teklip qilin'ghanliqi, xitay hökümitini qattiq bi'aram qilmaqta iken.

Lékin, italiyining eng chong gézitlirining béri bolghan " korira dolasira" ning xewer qilishiche, italiye da'iriliri xitay hökümitining dalay lamaning ziyaritige ruxset bermeslik toghrisidiki teleplirini ret qilghan.

Xewerde éytilishiche, pédmont ölkisining re'isi, mersidis bérisso, "italiye bilen xitay yaxshi munasiwetlerge ige ikki dölet. Biz bu yaxshi munasiwetlerning dawamlishishini ümid qilimiz. Lékin eger xitay hökümiti, kishilik hoquq mesilside xelq'ara ning hörmitige sazawer bolghan bir diniy rehberning italiyini ziyaret qilishi sewebidin, italiyidin öch élishqa tirishsa, buningdin italiyige qarighanda özi téximu köp ziyan köridu" dep körsetken. (Ömer qanat)

Pikirler (0)
Share
Toluq bet