Tibet rohani dahisi dalay lamaning xitay hökümiti bilen söhbet élip baridighan lodi gyari bashchiliqidiki wekiller ömiki jüme küni shangxeyge yétip barghan bolushi mumkin. Roytérs axbarat agéntliqi bu heqtiki xewiride, dalay lamaning washin'gtondiki wekili lodi gyari we kélsang gyaltsén hem ularning 2 yardemchisining jüme küni hindistandin shangxeyge qarap uchqanliqini bildürdi.
Bu nöwetlik xitay - tibet söhbitining mezmuni toghrisida her ikkila terep axbarat sahesige uchur bérishtin özini qachurmaqta. Merkizi londondiki tibet uchur torining xewiride eskertishiche, dalay lamaning wekilliri 5 - iyulda hindistan'gha qaytidiken we xitaylar bilen bolghan söhbette dalay lamaning xitaydiki budda tawapgahlirini ziyaret qilish pilani muzakirige qoyulidiken. Mezkur tor bétining xewiride, " dalay lamaning xitaygha ibadetke bérish pilani söhbette muzakire qilinidighan merkizi téma ikenliki perez qilinmaqta " déyilgen . Lékin daramsalagha jaylashqan tibet sergerdan parlaméntidiki zatlar bu nöwetlik söhbetning netije bilen axirlishishidin ümidsiz ikenlikini bildürdi.
Tibet sergerdan parlaméntining ezasi kédrup tondupning eskertishiche, xitay hökümiti amérikining bésimi astidila dalay lama bilen söhbetlishishke mejbur boluwatidu. Lékin u, gerche tibet wekillirige xitayning qanchilik yaxshi bolup ketkenliki körsitilsimu, emma béyjinggha bérip söhbetlishishning özi ijabiy tereqqiyat, dep qaraydighanliqini bildürdi.
Dalay lama wekillirining hazirghiche xitay bilen ötküzgen söhbetliri kompartiye merkizi birliksep bölümi bilen élip bérilghan. Bu qétimqi söhbet merkizi birliksep bölümi bilen élip bérilamdu yaki söhbetke bashqa organlar arilishamdu bu hazirche melum emes. (Erkin)
