Dalay lama xelq'ara jem'iyetni tibet weqesini tekshürüshke chaqirdi

2008-03-16
Élxet
Pikir
Share
Print

Tibetning diniy dahiysi dalay lama hindistandiki tibet sergerdan hökümiti jaylashqan darisaladiki turalghu jayida yekshenbe küni bayanat élan qilip, xelq'ara jem'iyetni tibette yüz bergen qanliq weqening heqiqiy ehwalini tekshürüshke chaqirdi.

Dalay lama sözide junggo hökümitini "tibetlerning medeniyitini" yoqitishqa urunuwatqanliq bilen eyibligen.

Tibet sergerdan hökümiti bolsa lxasadiki toqunushta 80 ademning ölgenlikini élan qilghan bolsimu, biraq xitay hökümiti peqet 10 ademning ölgenlikige iqrar bolghan. Yekshenbe küni lxasa shehiri tinchlan'ghan bolup, sheherge xitay azadliq armiyisining tanka we quruqluq qisimliri kirip, herbiy halet élan qilghan.

Toqunush jeryanida nechchiligen mashina, dukan we bashqilar köydürüwétilgen. Bu qétimqi tibet xelqining keng kölemlik naraziliq herikiti tibetning bir qanche jaylirida yüz bergendin bashqa yene sichüen ölkisidiki tibetler toplashqan jaylardimu dawamliship, saqchilar bilen toqunush kélip chiqqan.

Jüme, shenbe, yekshenbe künliri dunyaning köpligen döletliridiki xitay elchixaniliri aldida tibetler we ularning qollighuchiliri naraziliq namayishliri ötküzgen. Shenbe we yekshenbe künliri amérika sheherliridin nyuyork we washin'gtondimu namayish bolghan. (Ümidwar)

Pikirler (0)
Share
Toluq bet