Лхасада йәнә хитай һөкүмитигә қарши наразилиқ һәрикити елип берилди

2008-03-29
Елхәт
Пикир
Share
Принт

Хитай һөкүмити тәрипидин елинған қаттиқ бихәтәрлик тәдбирлиригә қаримай, тибәттики наразилиқ һәрикәтлири давамлишиватиду. Хәвәрләргә қариғанда, шәнбә күни чүштин кейин, тибәтниң пайтәхти лхаса шәһиридә тибәтләр йәнә хитай һөкүмитигә қарши наразилиқ намайиши өткүзгән.

Намайишни өз көзи билән көргүчиләрниң, әркин асия радиоси тибәт бөлүмигә хәвәр қилишичә, намайиш лхаса шәһириниң мәркизи бейҗиң кочиси әтрапида башланған. Хәвәрдә ейтилишичә, хитай қораллиқ сақчи қисимлири тибәтләр зич олтурақлашқан лхаса шәһириниң бархор, камкүнсаң вә рамочә районлирини шуниңдәк җокаң бутханисини пүтүнләй қамал қилған.

Мәркизи һиндистанниң дарамсала шәһиридики тибәт сәргәрдан һөкүмитиниң баянатчиси тензин такла, ройтерс агентлиқиға бәргән баянатида," шәнбә күни лхасада елип берилған наразилиқ һәрикитигә қанчилик кишиниң қатнашқанлиқи мәлум әмәс, лекин хитай һөкүмитиниң орунлаштуруши билән чәтәллик дипломатлар лхасани зиярәт қилған күни илип берилған бу намайишқа нурғунлиған адамниң қатнашқанлиқи пәрәз қилинмақта" дегән.

Хитай һөкүмитиниң орунлаштуруши билән лхаса ни зиярәт қилған ғәрб дөләтлириниң дипломатлири, хитай һөкүмитиниң бу һәрикитини яхши йөнүлүшкә қарап ташланған тунҗи қәдәм дәп тәбирләп, хитай һөкүмитидин, уларниң зияритигә чәклимә қоймаслиқини тәләп қилған.

Көпчиликкә мәлум болғандәк, 27 - март күни чәтәллик мухбирлар хитай һөкүмитиниң орунлаштуруши билән лхасадики җокаң бутханисини зиярәт қиливатқан мәзгилдә, мәзкур бутханидики тибәтлик буддист раһиблар, тибәткә әркинлик, тибәтләргә диний әркинлик дәп шуар товлап, хитай һөкүмитиниң хәлқара җамаәткә тибәттики вәзийәтни турақлиқ вә тинч көрситиш арзусини бит-чит қилған иди. (Өмәр қанат)

Пикирләр (0)
Share
Толуқ бәт