Gherb elliri xitayni lxasadiki toqunushta xitayni küch ishletmeslikke chaqirdi

2008-03-14
Élxet
Pikir
Share
Print

Tibet namayishchiliri bilen xitay qoralliq qisimliri arisida partlighan lxasadiki toqunush gherb ellirining diqqitini qozghap, xitay da'iriliridin namayishchilargha qoral küchi ishletmeslikni telep qildi. Fransiye tashqiy ishlar ministiri kochinér, jüme küni xitay da'irilirini özini tutuwélishqa chaqirip, yawropa ittipaqidiki 27 döletning bu mesilige jiddi köngül bölüwatqanliqini bildürdi. Lékin yawropa ittipaqi 8 - ayda échilidighan béyjing olimpik musabiqisigha qarita tedbir qollunush pikiride bolmidi.

Amérika tashqiy ishlar ministirlikining eskertishiche, béyjingdiki amérika bash elchisi xitay da'iriliridin özini tutuwélishni, namayishchilargha qoral küchi ishletmeslikni telep qilghan. Amérika prézidént ishxanisi aqsaray bolsa béyjingni " tibet medeniyitige hörmet qilish"qa ündidi.

Bryussélda yawropa ittipaqining bashliqlar yighinigha qatnishiwatqan en'giliye bash ministiri goldén browén, "weqede yüz bériwatqan ishlar bizni endishige séliwatidu," didi. U yene kishilik hoquqning kapaletke ige qilinishini telep qilip, xitaygha " naraziliqning nahayiti küchlük" ikenlikini bildürdi.

Gérmaniye hökümiti bolsa tinch namayishlargha yol qoyulushni telep qildi. Gérmaniye tashqi ishlar bayanatchisi,fédéral hökümetning lxasadiki weziyetni endishe bilen közitiwatqanliqini eskertip,"terepler küch ishlitishtin saqlinish kérek," dep eskertti hem " bizning nezirimizde tinch namayish pikir erkinlikining qanuni yollarda ipadilinishidur," dep körsetti.

Tibet rohani dahiysi dalay lama jüme küni bayanat élan qilip, tibet weziyitidin " chongqur endishe" qiliwatqanliqini we xitay da'iriliridin namayishchilargha qoral küchi ishletmeslikni telep qildi. Eng yéngi xewerlerge qarighanda jüme küni xitay saqchilar bilen tibet namayishchilar arisida yüz bergen toqunushta 2 tibet puqrasi ölgen. (Erkin)

Pikirler (0)
Share
Toluq bet