Хитай сақчилири тибәттә өйму - өй ахтуруп тутуш һәрикити елип бармақта

2008-03-17
Елхәт
Пикир
Share
Принт

10 - Март тибәтниң лхаса шәһиридә башланған наразилиқ намайиши бүгүн бир аз пәскойға чүшкән болсиму, әмма бу намайишниң тәсири һазир сичуән, гәнсу вә чиңхәй қатарлиқ өлкә районларға таралған болуп, һазир хитай һөкүмити әскәр вә қораллиқ сақчи қисимлирини тибәтләр олтурақлашқан районларға йөткигән.

Радиомиз игилигән мәлуматларға қариғанда, һазир сичуән өлкисиниң аба тибәт аптоном области аба наһийисидә йәкшәнбә күни кәң көләмлик намайиш йүз бәргән болуп, миңлиған намайишчи амма гардән ибадәтханиси алдиға йиғилип қаршилиқ көрситиш намайиши елип барған һәмдә бәзи намайишчилар таш ‏ - кесәк етип сақчи аптомобиллириниң әйникини чаққан.

Мәлум болушичә, таш атқучиларға сақчилар оқ чиқарған болуп, нәтиҗидә әң аз дегәндиму 8 адәм өлгән.

Йәрлик бир тибәтниң радиомизға бәргән мәлуматидин ашкарилинишичә, вәқә асасән гәрдән ибадәтханисидики ламалар билән сақчилар арисидики тоқунуштин келип чиққан болуп, тоқунуш җәрянида сақчилар намайишчиларниң бәзилирини уруп өлтүрүвәткән.

Мәзкур тибәтниң билдүрүшичә йәнә, тибәтләр мустәқиллиқ үчүн елип барған намайиш сәвәбидин сақчилар билән раһиблар тоқунушқан һәмдә хитай сақчи ‏ - әскәрлиридин бир нәччә адәмни уруп өлтүрүвәткән икән.

14 - Март башланған намайиш тоқунушини тинҗитиш үчүн хитай әскәр вә тинчлиқ сақлаш қисимлирини тибәткә киргүзгән һәмдә намайишчиларни тәслим болушқа чақирған вә бүгүн йерим кечигичә намайишини тохтитиши һәққидә ултиматум тапшурған иди.

Б б с да хәвәр қилишичә, һазир хитай қисимлири тибәттә өктичиләрни тутушни башливәткән болуп, бир йәрлик тибәтниң б б с ға телефун арқилиқ билдүрүшичә, һазир хитай сақчилири өйму - өй ахтуруп тутуш һәрикити елип бериватқан болуп, улар илгири сиясий җинайәт билән әйибләнгән тибәтләрни йәнә қайтидин қолға алған икән. (Җүмә)

Пикирләр (0)
Share
Толуқ бәт