Xitay saqchiliri tibette öymu - öy axturup tutush herikiti élip barmaqta

2008-03-17
Élxet
Pikir
Share
Print

10 - Mart tibetning lxasa shehiride bashlan'ghan naraziliq namayishi bügün bir az peskoygha chüshken bolsimu, emma bu namayishning tesiri hazir sichu'en, gensu we chingxey qatarliq ölke rayonlargha taralghan bolup, hazir xitay hökümiti esker we qoralliq saqchi qisimlirini tibetler olturaqlashqan rayonlargha yötkigen.

Radi'omiz igiligen melumatlargha qarighanda, hazir sichu'en ölkisining aba tibet aptonom oblasti aba nahiyiside yekshenbe küni keng kölemlik namayish yüz bergen bolup, minglighan namayishchi amma garden ibadetxanisi aldigha yighilip qarshiliq körsitish namayishi élip barghan hemde bezi namayishchilar tash ‏ - kések étip saqchi aptomobillirining eynikini chaqqan.

Melum bolushiche, tash atquchilargha saqchilar oq chiqarghan bolup, netijide eng az dégendimu 8 adem ölgen.

Yerlik bir tibetning radi'omizgha bergen melumatidin ashkarilinishiche, weqe asasen gerden ibadetxanisidiki lamalar bilen saqchilar arisidiki toqunushtin kélip chiqqan bolup, toqunush jeryanida saqchilar namayishchilarning bezilirini urup öltürüwetken.

Mezkur tibetning bildürüshiche yene, tibetler musteqilliq üchün élip barghan namayish sewebidin saqchilar bilen rahiblar toqunushqan hemde xitay saqchi ‏ - eskerliridin bir nechche ademni urup öltürüwetken iken.

14 - Mart bashlan'ghan namayish toqunushini tinjitish üchün xitay esker we tinchliq saqlash qisimlirini tibetke kirgüzgen hemde namayishchilarni teslim bolushqa chaqirghan we bügün yérim kéchigiche namayishini toxtitishi heqqide ultimatum tapshurghan idi.

B b s da xewer qilishiche, hazir xitay qisimliri tibette öktichilerni tutushni bashliwetken bolup, bir yerlik tibetning b b s gha téléfun arqiliq bildürüshiche, hazir xitay saqchiliri öymu - öy axturup tutush herikiti élip bériwatqan bolup, ular ilgiri siyasiy jinayet bilen eyiblen'gen tibetlerni yene qaytidin qolgha alghan iken. (Jüme)

Pikirler (0)
Share
Toluq bet