Xitay tibet pa'aliyetchilirige we dalay lamaning qollighuchilirigha tehdit saldi

2008-03-07
Élxet
Pikir
Share
Print

Xitay da'iriliri jüme küni tibet pa'aliyetchilirini we dalay lamaning qollighuchilirini agahlandurup, eger ular béyjing olimpik musabiqisi mezgilide namayish qilsa yaki weqe sadir qilsa jiddiy wastilarni qollinidighanliqini we buning üchün jiddiy tedbirler élip qoyghanliqini bildürdi. Tibet aptonom rayoni partkomining mu'awin sékritari shyangba pingso, rayonda olimpik bixeterliki üchün jiddiy tedbirler élin'ghanliqini eskertidu.

Tibettiki xitay qoralliq saqchi qisimliri siyasiy bölümining mes'uli kang jinjung dalay lamaning qollighuchilirini agahlandurdi. Kang, olimpik jeryanida eger muqimsiz amillar bayqalsa, bolupmu dalay lamaning qollighuchilirining herikitige jiddiy wastilar bilen inkas qayturidighanliqini ilgiri sürgen. Shyangba pingso bilen kang jinjung bu sözlerni xelq qurultiyi yighinining dem élish arisida muxbirlargha tekitligen. Shu küni tibet aptonom rayonining partkom sékritari jang chinglin béyjingda muxbirlarni kütüwélip, dalay lamani "olimpik musabiqisigha buzghunchiliq qilmaqchi " dep eyiblidi.

Chet'eldiki tibet teshkilatliri we dalay lamaning qollighuchiliri béyjing olimpik musabiqisi tibet mesilisini dunya jama'etchilikining diqqitige sunush we xitayni dalay lama bilen söhbet ötküzüshke qistashning yaxshi pursiti, dep qarimaqta. Chet'eldiki 5 tibet teshkilati yéqinda olimpik harpisida hindistandin tibetke yürüsh qilidighanliqini jakarlighan.

2007 ‏ - Yili 4 ‏ - ayda 5 neper amérikiliq taghqa chiqquchi himalaya téghida tibet bayriqini chiqarghanliqi tüpeyli xitaydin qoghlap chiqirilghan. Shu yili 8 ‏ - ayda kanadaliq oqughuchilar seddichin sépiligha chiqip tibet bayriqini asqan idi. Xitay hökümiti olimpik mezgilide tibetlerning keng - kölemlik ammiwi naraziliq herikitige duch kélishtin ensirimekte. (Erkin)

Pikirler (0)
Share
Toluq bet