Yawropa parlaménti peyshenbe küni 71 awazning qollap bilet tashlishi, bir parlamént ezasining awaz bérishtin waz kéchishi astida xitay hökümitini tibet rohani dahiysi bilen dalay lama bilen söhbet ötküzüshke chaqiridighan qararname maqullidi.
Qararnamide her ikkila terepni aldinqi shert qoymighan ehwalda söhbetni tézrek eslige keltürüshke chaqirghan shundaqla hem xitayning zimin pütünlikige hörmet qilish hem tibet xelqining ghayisini emelge ashurushni, her ikkila terep qobul qilalaydighan bir lahiye üstide birlikke kélishni telep qilghan.
Xitay bilen dalay lama arisidiki söhbet 2002 -yili 9 - aydin eslige kelgendin béri, ikki terep wekilliri 2006 - yilning bashlirighiche jem'iy 5 qétim söhbet élip bardi. Lékin xitay hökümiti 2006 -yilning bashliri söhbetni tuyuqsiz toxtatqan . Tibet teshkilatliri bolsa yawropa parlaméntini qararini qarshi almaqta.
Xelq'ara tibet herikiti teshkilati yawropa shöbisining bashliqi sirén changpa, yawropa parlaméntining qarari tibetlerni ilhamlandurmaqta, deydu. Yawropa parlaménti qararida xitay bilen dalay lamaning bezi konkrét mesililerde pikir ixtilapi barliqini, bolupmu tibet bilen xitayning tarixiy munasiwitide chüshenchisi oxshimaydighanliqini tekitligen.
Sérin changpaning eskertishiche, dalay lama tibet tarixta xitayning bir qisimi bolmighan, dep qarimaqta. U, xitay hökümiti dalay lama tibetni junggoning bir qisimi, dep étirap qilishi kérek, digen telepni otturigha qoyghan bolsimu, lékin dalay lamaning buni qobul qilishi mumkin emes, dep qaraydighanliqini bildürdi. (Erkin)
