Түрк хәлқиниң уйғурларни қоллиши күнсайин күчәймәктә

Ихтиярий мухбиримиз әркин тарим
2019-12-23
Елхәт
Пикир
Share
Принт

Уйғур мәсилисиниң хәлқарада күнсайин күчийишигә әгишип түркийәниң һәр қайси вилайәт, шәһәр, наһийәлиридиму хитайға қарши наразилиқ паалийәтлири көпәймәктә. Йеқиндин буян түркийә тарихида көрүлүп бақмиған шәкилдә нурғун киши намайишларға қатнишип, уйғурларға игә чиқмақта. Бу намайишларда улар хитайни әйибләп, түркийә һөкүмитини уйғурларға игә чиқишқа чақирмақта.

Мәркизи истанбулдики инсаний ярдәм фондиниң чақириқи билән бирла вақитта истанбул, коня, кастамону, қарабүк, самсун, қаһраманмараш, урфа вә бурса қатарқлиқ көплигән шәһәрдә намайиш өткүзүлди.

22-Декабир күни түркийә пайтәхти әнқәрәдиму намайиш өткүзүлди. Намайишқа аммиви тәшкилат мәсуллири вә әнқәрәдики уйғурлардин болуп көп санда киши иштирак қилди. Намайишчилар хитайға ләнәт оқуп, шоарлар товлиди. Түркийә һөкүмитини уйғурларға игә чиқишқа чақирди.

Түркийәниң әң чоң вилайәтлиридин бири болған коня вилайәтидиму 21-22-декабир күнлири икки чоң паалийәт өткүзүлди. 21-Декабир күнидики паалийәт тоғрисидики зияритимизни қобул қилған сутуқ буғрахан илим вә мәдәнийәт вәқпи коня шөбисиниң рәиси абдуләһәт удун әпәнди коня шәһиридики қиличаслан мәйданида өткүзүлгән «авазсиз нида» намлиқ намайишқа түркләрдин сирт коняда туруватқан 200 әтрапида уйғурниңму қатнашқанлиқини, намайишқа җәмий 5-6 миң кишиниң иштирак қилғанлиқини баян қилди.

22-Декабир йәкшәнбә күни охшаш йәрдә бүйүк бирлик партийәси, йәнидән рәфаһ партийәси вә бәзи аммиви тәшкилатлар намайиш өткүзгән. Абдуләһәт удун әпәнди бу һәқтә мәлумат бәрди.

21-22-Декабир күнлири түркийәниң ғәрбий-шималиға җайлашқан қарабүк вилайитиниң қарабүк шәһиридиму намайиш өткүзүлгән. Намайишқа қарабүктики аммиви тәшкилат мәсуллири, әзалири, университет оқуғучилири вә аммидин болуп көп санда киши иштирак қилған. Намайишта анатолийә яшлар җәмийити қарабүк шөбисиниң рәиси азиз гүндоғду әпәнди мәтбуат баянатини оқуп өткән болуп, баянатта хитайниң уйғурларға елип бериватқан инсан қелипидин чиққан бесим сияситини тохтитишқа чақирған. Мәзкур намайишқа қатнашқан қарабүк университети түрк тили вә әдәбияти кәспиниң магистир оқуғучиси волқан әркин әпәнди намайиш тоғрисида мәлумат бәрди.

Түркийәниң шәрқий-җәнубиға җайлашқан қаһраманмараш шәһиридиму хитайға қарши наразилиқ паалийити өткүзүлгән. 19-20-Декабир күнлири «хитайға ләнәт оқуш» темисида икки чоң паалийәт өткүзүлгән болуп, паалийәткә көп санда киши иштирак қилған. Мәзкур шәһәрдики сүтчүимам университети диний илимләр кәспиниң оқутқучиси доктор алимҗан боғда әпәнди бу һәқтә мәлумат бәрди.

Түркийәдә әң көп уйғур оқуғучилар оқуватқан шәһәрләрдин бири һесаблинидиған бурса шәһиридиму 20-декабир күни бир күн ичидә 3 паалийәт өткүзүлгән. Йүсүп йүзлүкләр җәмийити билән уйғур оқуғучилар уюшмиси бирликтә бурса техник университетида доклат бериш йиғини, йиғин ахирлашқандин кейин улуғ мәсчитиниң алдида мәтбуат баянати бериш, шу күни ахшими яшлар мәркизидә доклат бериш йиғини өткүзүлгән. Бурса улудағ университетидики уйғур оқуғучиларниң вәкили абдулқадир абдулкерим бу һәқтә қисқичә мәлумат бәрди.

Хәвәрләргә асасланғанда мәркизи истанбулда турушлуқ инсаний ярдәм фондиниң чақириқиға аваз қошуп истанбулда өткүзүлгән намайишқа 50 миң киши иштирак қилған. Бу 2009-йили 7-айда үрүмчи қирғинчилиқиға наразилиқ билдүрүш үчүн истанбул чағлаян мәйданида өткүзүлгән намайиштин кейинки әң чоң намайиш һесаблиниду.

Пикирләр (0)
Share
Толуқ бәт