Түркийәдики уйғурлар қурбан һейтта мәрһум муһәммәтимин буғра вә әйса алптекинларниң қәбрисини йоқлиди

Ихтиярий мухбиримиз әркин тарим
2019-08-12
Елхәт
Пикир
Share
Принт
Әнқәрәдики уйғурлар қурбан һейтта мәрһум муһәммәтимин буғраниң тупрақ бешиға берип дуа тилавәт қилди. 2019-Йили 11-авғуст.
Әнқәрәдики уйғурлар қурбан һейтта мәрһум муһәммәтимин буғраниң тупрақ бешиға берип дуа тилавәт қилди. 2019-Йили 11-авғуст.
RFA/Erkin Tarim

Түркийәдики уйғурлар бу йиллиқ қурбан һейтта мәрһум лидерлириниң қәбрисини йоқлап, уларни хатириләшни унтумиди.

Қурбан һейтниң биринчи күни, йәни 11-авғуст түркийәниң һәрқайси җайлиридики уйғурлар һейт намизидин кейин мәрһум лидәрлардин муһәммәтимин буғра, әйса йүсүп алиптикин қатарлиқ кишиләрниң тупрақ бешини йоқлап, дуалар қилди.

Бу йил қурбан һейтта түркийәдә түркийәдә милйонлиған кишиләр өз юртлириға қайтип, уруқ-туғқанлири билән җәм болуп, һейт намизини биллә оқуватқан, вәтини вә миллити үчүн җенини пида қилған шеһитлириниң вә аләмдин өткән йеқинлириниң қәбриси бешида дуа қиливатқан шундақла қурбанлиқ қойларни союватқан пәйтләрдә түркийәдики уйғурларму еғир кәйпият иликидә бу йиллиқ қурбан һейтни күтүвалди.

Улар уйғурларниң әнәниси бойичә миллий кийимлирини кийип, һейт намизини оқуп, қурбанлиқлирини союп, уруқ-туғқанлириниң қәбриси түркийәдә болғанлири тупрақ бешини йоқлап, һейт өткүзмәктә. Йәни истанбулдики уйғурлар мәрһум әйса йүсүп алиптекинниң тупрақ бешиға, әнқәрәдики уйғурлар мәрһум муһәммәтимин буғраниң тупрақ бешиға берип дуа тилавәт қилди.

Узун йил әйса йүсүп алиптекинниң йенида ишлигән, шәрқий түркистан вәқпиниң сабиқ рәиси һамутхан гөктүрк әпәнди қурбан һейт намизидин кейин бир гуруппа уйғурниң шәрқий түркистан дәвасиниң йол башчилиридин әйса йүсүп алиптекинниң қәбрисигә берип, дуа қилғанлиқини баян қилди.

Қиммәтлик радио аңлиғучилар әйса йүсүп алиптикин 1901-йили туғулған болуп, 1995-йили түркийәниң истанбул шәһиридә аләмдин өткән. У 1952-йили түркийәгә кәлгән болуп, әйни вақитта уйғур вә қазақ юртдашларниң түркийәгә келип җайлишишида зор рол ойниған. У өмриниң ахириғичә түркийәдә уйғур миллий дәваси үчүн күрәш қилған. Һамутхан гөктүрк әпәнди бу һәқтә тәпсилий мәлумат бәрди.

Түркийәдә оқуватқан уйғур оқуғучилар йилдин йилға көпәймәктә. Бурса шәһиридики улудағ университетида оқуватқан 120 нәпәр уйғур оқуғучиниң вәкили абдуқадир абдукерим зияритимизни қобул қилип, уйғур оқуғучиларниң аилисигә телефон қилип, ата-анисиниң һейтини тәбриклийәлмигәнлики үчүн көңүллириниң бәкла йерим икәнликини баян қилди.

Түркийәниң ғәрбий райониға җайлашқан бурса шәһири уйғур оқуғучилар әң көп шәһәрләрдин бири һесаблиниду. Уйғур оқуғучиларниң өз юртиға болған сеғинишини азайтиш үчүн бурса османғази наһийәлик һөкүмәт уларға «уйғур өйи» ечип бәргән. Уйғур оқуғучиларниң вәкили абдуқадир абдукерим «уйғур өйи» ни зиярәт қилған оқуғучиларниң өз юртиға барғандәк һес қилғанлиқини әскәртип өтти.

Түркийәниң пайтәхти әнқәрәдики уйғурларму бу йиллиқ қурбан һейтни уйғурларниң әнәниси бойичә өткүзмәктә. Әнқәрәдики уйғурлар намаздин кейин мәрһум лидер муһәммәтимин буғраниң қәбрисигә берип дуа қилған. Уйғур академийәси иҗраийә комитетиниң рәиси абдулһәмит қарахан әпәнди зияритимизни қобул қилип, өзиниң бу йиллиқ қурбан һейт һәққидики тәсиратлирини баян қилди.

Истанбулдики уйғурларниң көпи зәйтинбурну, ақсарай, сәфакөй вә бәйликдүзү районлириға җайлашқан. Қәйсәри шәһиридә һазир икки уйғур мәһәллиси бар болуп, буларниң бири 1964-йили түркийәниң қәйсәри шәһири әхмәт йәсәвий мәһәллисигә җайлаштурулған уйғурлардин тәркиб тапқан мәһәллә болса, йәнә бири 2014-2015 йиллирида малайсия вә тайланд арқилиқ кәлгән уйғурлар турушлуқ бәлсин дөләт қорусидур. Сабиқ муавин дөләт министири бүләнт аринч әпәндиниң 2009-йили бәргән баянатиға асасланғанда, түркийәдики уйғур нопуси 300 миң әтрапида икән.

Пикирләр (0)
Share
Толуқ бәт