10-Декабир күни түркийәдә уйғурлар тоғрилиқ көплигән паалийәтләр өткүзүлди

Ихтиярий мухбиримиз әркин тарим
2019-12-12
Елхәт
Пикир
Share
Принт
Түркийәдә елип берилған уйғурлар тоғрисидикиси паалийәтләрдин көрүнүш.
Түркийәдә елип берилған уйғурлар тоғрисидикиси паалийәтләрдин көрүнүш.
RFA/Erkin Tarim

Уйғур мәсилисиниң хәлқарада күнсайин күчийишигә әгишип түркийәниң һәр қайси җайлирида хитайға қарши наразилиқ паалийәтлири көпәймәктә. Шундақла уйғурларниң һазирқи еғир вәзийитини оттуриға қоюш үчүн доклат бериш, мәтбуат баянати елан қилиш қатарлиқ паалийәтләр бириниң арқисидин бири өткүзүлмәктә.

10-Декабир күни «дуня кишилик һоқуқ хитабнамиси» қобул қилғанлиқиниң 71 йиллиқи мунасивити билән әнқәрәдики хәлқаралиқ кишилик һоқуқи тәшкилати йилдирим бәязит университетиниң залида «шәрқий түркистанда кишилик һоқуқ дәпсәндичилики» темисида доклат бериш йиғини өткүзүлди.

Әнқәрәдики қуғулу бағчисида түркийәниң әң чоң аммиви тәшкилатлиридин бири болған кадирлар уюшмиси башчилиқида 8 тәшкилат бирликтә уйғурларниң еғир вәзийити тоғрисида мәтбуат баянати елан қилиш йиғини өткүзди. Мәзкур паалийәткә сабиқ парламент әзаси, аммиви тәшкилат мәсуллири, оқуғучилар вә әнқәрәдики уйғурлар қатнашти.

10-Декабир күни қәйсәри, битлис, кастамону, қириқларели, әскишеһир вилайәтлиридә уйғурларниң еғир вәзийити тоғрида мәтбуат баянати бериш йиғини өткүзүлди.

Измирдики әгә университетиниң профессори алимҗан инайәт әпәнди 9-декабир күни афйондики қоҗатәпә университетида, 10-декабир күни измирдики түрк оҗақлири тәшкилатида уйғурлар дучар болуватқан кишилик һоқуқи дәпсәндичилики тоғрисида доклат бәрди.

10-Декабир күни йилдирим бәязит университетидики доклат бериш йиғинида хәлқаралиқ кишилик һоқуқи тәшкилати рәиси рәмзи чайир әпәнди билән әнқәрәдики уйғур институтиниң мудири әркин әкрәм әпәнди доклат бәрди. Доктор әркин әкрәм әпәнди бу мунасивәт билән зияритимизни қобул қилип, йиғинда бәргән доклати тоғрисида мәлумат бәрди.

Әнқәрәдики қуғулу бағчисида өткүзүлгән намайишқа 400 әтрапида киши иштирак қилди. Намайишта кадирлар уюшмисиниң рәиси мухбирларға баянат берип, хитайниң уйғурларға елип барған бесим сияситини әйибләш билән бирликтә түркийә һөкүмитини уйғурларға игә чиқишқа чақирди. Бу намайишқа иштирак қилған закир һаҗи бу һәқтә бизгә мәлумат бәрди.

Профессор доктор алимҗан инайәт әпәндиму зияритимизни қобул қилип, өзиниң афйон вә измирда бәргән доклатлири һәққидә мәлумат бәрди.

Әнқәрәдики хәлқаралиқ кишилик һоқуқ тәшкилати 2014-йили қурулған болуп, һазирғичә көп қетим уйғурлар тоғрисида паалийәт елип барди. Мәзкур тәшкилатниң рәиси рәмзи чаяр әпәнди бундин кейинму уйғурлар дучар болуватқан еғир вәзийәтни түгитиш үчүн тиришидиғанлиқини баян қилди. У мундақ деди: «бизниң тәшкилатимиз 2014-йили қурулди. Шәрқий түркистандин кәлгән хәвәрләр бизни бәкла ечиндуриду. Биз шәрқий түркистандики тирагедийәләрни дуня җамаәтчиликигә аңлитиш үчүн түркийәдә вә дуняда қолимиздин кәлгәнчә тиришчанлиқ көрситимиз. Бу тоғрида түркийәдики шәрқий түркистан тәшкилатлири биләнму һәмкарлишимиз.»

Пикирләр (0)
Share
Толуқ бәт