Türkiyede Uyghur akadémiyesi yétekchilikide yashlarni terbiyelesh xizmiti aktip élip bérilmaqta

Ixtiyariy muxbirimiz azigh
2019-12-17
Élxet
Pikir
Share
Print
Uyghur akadémiyesining orunlashturushi bilen Uyghur akadémiyesining istanbuldiki ishxanisida "Xelq'ara weziyet we milliy küresh yolliri" boyiche échilghan terbiyelesh kursi. 2019-Yili 14-dékabir, türkiye.
Uyghur akadémiyesining orunlashturushi bilen Uyghur akadémiyesining istanbuldiki ishxanisida "Xelq'ara weziyet we milliy küresh yolliri" boyiche échilghan terbiyelesh kursi. 2019-Yili 14-dékabir, türkiye.
RFA/Azigh

Uyghur mesilisining xelq'arada jiddiy küntertipke kélishige egiship muhajirettiki Uyghur teshkilatliri Uyghur mesilisining xelq'aralishishigha töhpe qoshalaydighan, Uyghur mesilisi duch kéliwatqan her xil ijtima'iy we siyasiy mesililerge taqabil turalaydighan iqtidarliq yashlar qoshuni yétishtürüp chiqishni muhim xizmet pirinsipi qilmaqta.

13-, 14-dékabir Uyghur akadémiyesining orunlashturushi bilen Uyghur akadémiyesining istanbuldiki ishxanisida "Xelq'ara weziyet we milliy küresh yolliri" boyiche terbiyelesh kursi échildi. Uyghur akadémiyesi jem'iy 10 Uyghur tetqiqatchining ders bérishi we 58 Uyghur yashning qatnishishi bilen bu yil 4-, 7- we 10-aylarda üch qétimliq "Milliy mepkure we teshkilatchiliq" boyiche terbiyelesh kursini muweppeqiyetlik ötküzgen bolup, bu qétimliq "Xelq'ara weziyet we milliy küresh yolliri" toghrisidiki kursqa aldinqi 3 qétimliq kurstin jem'iy 15 oqughuchi tallan'ghan.

Biz siyasiy sapagha we teshkiliy anggha ige Uyghur yashlirini terbiyeleshning ehmiyiti we Uyghurlarning siyasiy pa'aliyetlirige körsitidighan tesiri heqqide Uyghur akadémiyesining ijra'iye re'isi abdulhemit qaraxan ependini ziyaret qilduq. Qaraxan ependim, bu heqte tepsiliy toxtilip mundaq dédi: "Hemmimizge melum bolghinidek dunyaning herqaysi jayliridiki sherqi türkistan teshkilatlirida yashlarning nisbiti intayin az. Shunga biz yashlarning terbiyelinishi we yétiship chiqishigha, bolupmu bilimlik semimiy, ot yürek yashlarning yétishishige purset bérishimiz kérek. Dawa yolidiki péshqedemler tejribe sawaqlirini yashlargha yetküzüshini, bashqa milletlerning tejribe sawaqlirini yekünlep, yashlirimizning dawa yolida ghelibilik dewager inqilabchi bolup yétiship chiqishigha ehmiyet bérishimiz kérek."

Uyghur akadémiyesining Uyghur yashliridin tayanch küch yétishtürüsh meqsitide teshkillewatqan kurslirigha dunyaning herqaysi jayliridin Uyghur ziyaliyliri, Uyghur puqrawi teshkilatlirining gholluq rehberliri qatniship, Uyghurlarning nöwettiki siyasiy weziyiti, Uyghur teshkilatlirining roli, teshkillesh we bashqurush usulliri, her xil téxnikiliq we siyasiy mesililer üstide etrapliq melumat bergen.

Biz bu qétimliq "Xelq'araliq weziyet we milliy küresh yolliri" namliq kursqa qatniship oqughuchilargha bosniyeliklerning milliy küresh yolliri heqqide melumat bergen beykent uniwérsitétning oqutquchisi doktor meghpiret kamal xanimni ziyaret qilduq. Meghpiret kamal xanim yuqiriqi kurslarning Uyghur yashlirini terbiyeleshtiki roli we ünümi heqqide toxtilip mundaq dédi: "Yashlar bir millet ümidi we kélechiki dep qarilidu. Ular yaxshi yétishse millet ronaq tapidu. Hazir wetinimizde buni emelge ashurush tes. Chet'eldiki yashlirimizning her jehette yardemge we yétekleshke mohtaj ikenlikini hemmimiz bilimiz. Bularning köpinchisi intayin yash, emdi hayatqa qedem qoyup, musteqil yashashqa bashlighan waqitta yat bir yerde yalghuz qilip qaldi. Ata-anisi we yéqinliri bilen munasiwiti pütünley üzülüp ketti, shunga rohi jehettin intayin sunuq. Kelgüsi heqqidiki pilanliri astin-üstün bolup ketti. Bu kurslarni we léksiyelerni orunlashturushtiki meqsitimiz bolsa, aldi bilen yashlirimizning öz medeniyitini tonush, yashash we hayattiki kélishmesliklerni bir terep qilish maharitini yétishtürüsh, kespi bilimlerni igileshke righbetlendürüsh, bügünki téxnika dewride téxnikidin paydilinishni bilish we dunyadiki xelqlerning tejribe-sawaqlirini öginish, tetbiqlash arqiliq weten-millet üchün xizmet qilish éngini östürüshtin ibaret."

Doktor meghpiret kamal, ablimit qaraxan qatarliq bir qisim Uyghur mutexessislirining qarishiche, Uyghur mesilisi xelq'araning küntertipige kéliwatqan, siyasiy we ijtima'iy pa'aliyetler üchün iqtidarliq Uyghur yashliri jiddiy éhtiyajliq boluwatqan bu dewrde, teshkilatlarning yaki muhajirettiki Uyghur jama'itining yashlarni terbiyelishi, ulargha yéngi chiqish yoli tépish üchün yardem bérishi muhajirettiki Uyghurlarning siyasiy we ijtima'iy dawamliqi üchün intayin muhim ehmiyetke ige iken.

Toluq bet