Мюнхендики «боғда уйғур мәктипи» ниң көлими зораймақта

Ихтиярий мухбиримиз әкрәм
2020-03-09
Елхәт
Пикир
Share
Принт
«Меһрибан анилар» дәп атилидиған «германийә уйғур анилар бирлики» ниң қармиқида қурулған «боғда уйғур мәктипи» ниң ечилиш мурасимидин көрүнүш. 2020-Йили 7-март, мюнхен.
«Меһрибан анилар» дәп атилидиған «германийә уйғур анилар бирлики» ниң қармиқида қурулған «боғда уйғур мәктипи» ниң ечилиш мурасимидин көрүнүш. 2020-Йили 7-март, мюнхен.
RFA/Ekrem

7-Март күни германийәниң мюнхен шәһиридики «меһрибан анилар» дәп атилидиған «германийә уйғур анилар бирлики» ниң қармиқида қурулған «боғда уйғур мәктипи» ниң ечилиш мурасими өткүзүлди.

Мюнхен шәһиридә яшайдиған уйғур зиялийси пәридә ханимниң ечилиш мурасимида қилған сөзлиригә асасланғанда, бу мәктәп йеңидин 4 синипқа еришкән болуп, бу синипларда уйғур пәрзәнтлиригә уйғур ана тили асас қилинған һалда түрлүк пәнний, диний билимләр һәмдә уйғур мәдәнийәт-сәнити, өрп-адәтлири өгитилидикән.

Мюнхен шәһиридики җамаәт әрбаби аблимит турсун әпәндиниң тилға елишичә, 7-март күнидики бу мәктәпниң ечилиш мурасими дағдуғилиқ өткүзүлгән. Униң билдүрүшичә, «боғда уйғур мәктипи» ниң дәсләпки асаси уйғур дияридики җаза лагерлириниң зулуми әвҗигә чиққан 2018-йили хитайниң уйғур миллий кимликигә қиливатқан таҗавузиға қарши қурулған. «Боғда уйғур мәктипи» 2 йилдин буян тәрәққий қилип, униң һазирқи оқуғучилириниң сани йүздин һалқип кәткән.

«Германийә уйғур анилар бирлики» ниң әзалиридин һәлимә ханим «боғда уйғур мәктипи» ниң ечилиш мурасимида қилған сөзидә «меһрибан анилар» ниң һазирға қәдәр мюнхенда елип барған паалийәт даириси тоғрисида қисқичә чүшәнчә берип, «меһрибан анилар» ниң германийәдики уйғур җамаитиниң қизғин қоллиши, яр-йөләктә болушиға муйәссәр болуп келиватқанлиқини әскәрткән.

Уйғур зиялийси аблимит турсун әпәнди бу һәқтә тохталғанда уйғур миллитиниң бешиға толиму қабаһәтлик бир заман кәлгән бүгүнкидәк бир вәзийәттә муһаҗирәттики уйғур пәрзәнтлирини вәтинигә, байриқиға, миллий кимликигә игә қилип тәрбийәләп йетиштүрүшниң толиму зөрүрлүкини тәкитлиди. У бу хилдики иштин сиртқи мәктәпләрни уйғурлар топлишип олтурақлашқан дуняниң һәрқайси дөләтлиридә тәсис қилишни тәшәббус қилди.

«Боғда уйғур мәктипи» икки йилдин буян мюнхен шәһиридә көп қетим түрлүк сәнәт паалийәтлирини өткүзүп кәлгән иди. Мәзкур мәктәпниң мәсуллиридин пәридә ханимниң баян қилишичә, 1-март өткүзүлгән қоюқ миллий пураққа игә болған «уйғур ана тил паалийити» мурасими германийәдики уйғурларниң қизғин алқишлириға сазавәр болупла қалмай, дуняниң һәрқайси җайлиридики уйғур җамаитиниң яхши баһасиға еришкән. Бу мәктәп дәрсләрдин сирт, яз мәзгиллиридики тәтилләрдә йәнә уйғур оқуғучиларни дала сәйлилиригә елип чиқишни давамлаштуридикән.

Толуқ бәт