Уйғур гимнастика маһири нариман қурбаноф италийәдики мусабиқидә күмүш медалға еришкән

Ихтиярий мухбиримиз ойған
2019-07-26
Елхәт
Пикир
Share
Принт
Италийәниң  өткүзүлгән дуня мусабиқисидә күмүш медалға еришкән уйғур гимнастика маһири нариман қурбаноф (солдин биринчиси). 2019-Йили июл. Неапол, италийә.
Италийәниң өткүзүлгән дуня мусабиқисидә күмүш медалға еришкән уйғур гимнастика маһири нариман қурбаноф (солдин биринчиси). 2019-Йили июл. Неапол, италийә.
RFA/Oyghan

Қазақистанлиқ уйғур яшлириниң тәнһәрикәтниң һәр хил түрлири бойичә өткүзүлүватқан дуняви мусабиқиләрдә чоң нәтиҗиләр қазиниватқанлиқи мәлум. Йеқинда «қазақ ахбарат бюроси» агентлиқида елан қилинған «оқуғучиларниң дуня тәнһәрикәт оюнлири 2019: гимнастика маһири нариман қурбаноф күмүш медал утувалди» намлиқ мақалә елан қилинған. Униңда 21 яшлиқ уйғур йигити нариман қурбанофниң гимнастикиниң «ат үстидики һәрикәт» түри бойичә күмүш медалға еришкәнлики хәвәр қилинған.

Игилишимизчә, мушу айниң 3-күнидин 14-күнигичә италийәниң неапол шәһиридә оқуғучилар-яшларниң тәнһәрикәт оюнлири бойичә 30-қетимлиқ язлиқ дуня мусабиқиси болуп өткән. Униңға тәнһәрикәтниң 18 түри бойичә 112 мәмликәттин 6000 ға йеқин тәнһәрикәтчи қатнашқан. Омумий нәтиҗиләр бойичә қазақистан командиси 1 алтун медал, 5 күмүш медал вә 1 мис медал билән 25-орунни игилигән.

Биз шу мусабиқидин кейин қирғизистанниң иссиқкөл областида дәм еливатқан гимнастика маһири нариман қурбаноф билән алақилишип, униң италийәдики дуня мусабиқисидә көрсәткән тиришчанлиқлири һәққидә мәлумат игилидуқ.

Нариман қурбаноф радийомиз зияритини қобул қилип, мундақ деди: «оқуғучи вә яшларниң тәнһәрикәт оюнлири һәм дуня мусабиқиси мениң бу йилдики икки чоң мәқситим болуп һесаблиниду. Омумән италийәдә өткән мусабиқигә 2016-йилдин тартип мәқсәтлик һалда тәйярландим. Униңға яхши тәйярландим десәм болиду. Дәсләптә утуқлирим яхши болған иди, әмма ахирқи басқучта һәммини нәтиҗилик көрситиш мумкин болмиди. Шундақтиму өзүм тиришип, ахирида иккинчи орунни игилидим. Хуласиләп ейтқанда, бу нәтиҗәмдин рази болдум десәм болиду. Әмди келәчәктә болидиған дуня мусабиқисигә маһарәтлиримни техиму мурәккәпләштүрүп, җиддий тәйярлинишим керәк. Өткән йили болған дуня мусабиқисидә хәлқара гимнастика бирләшмиси маңа дуня бойичә тәнһәрикәт маһири дегән бәлгә вә гуваһнамә бәргән иди. Бу дуня бойичә чоң шәрәп. Мениң келәчәктә бирла мәқситим бар. Алдимиздики дуня мусабиқисигә җиддий тәйярлиниш. Мениң мәқситим пәқәт алтун медал елишла әмәс, бәлки олимпик тәнһәрикәт мусабиқисидә дуня чемпийонлуқиға еришиштур.»

Мәлум болушичә, алмута шәһиридә яшаватқан нариман қурбаноф бәш йешидин тартип гимнастика билән шуғулланған. Униң дадиси һүсәнҗан қурбанофму шу саһәниң маһири болуп, нариманниң еришкән утуқлирида чоң рол ойниған икән. Нариман қурбаноф өткән йили австралийәниң мелборин шәһиридә өткүзүлгән дуня мусабиқисидә алтун медалға еришкән иди. У «ат үстидә моллақ етиш» һәрикәт усули билән дуня гимнастика тәнһәрикити саһәсидә йеңилиқ яратқан һәм униң техникисиға гимнастика федератсийәси тәрипидин «қурбаноф» яки инглизчә «The Kurbanow» дәп нам берилгән. Нариман қурбаноф шу йили йәнә силовенийәниң копер шәһиридә болуп өткән гимнастика бойичә дуня мусабиқисидә «ат үстидики һәрикәт» бойичә орундиған маһарәтлири билән иккинчи орунға еришип, күмүш медал билән тәқдирләнгән иди. 

«Кентавр» қабилийәтлик тәнһәрикәтчиләргә ярдәм қилиш җәмийәтлик фондиниң президенти, қазақистанда хизмәт көрсәткән мәшқавул мәхмут искәндәрофниң ейтишичә, һазир қазақистанлиқ гимнастика маһирлири мушу йили германийәдә өткүзүлидиған дуня мусабиқисигә тәйярланмақтикән. У мундақ деди: «штутгартта дуня мусабиқиси болиду. У икки басқуч бойичә елип берилиду. 24 Командиниң ичигә кириш керәк болған биринчи басқучтин өттуқ. Улар 16-орунни елип кирди. Улар алтә маһирдин тәшкил тапқан болуп, шуларниң үчи уйғур. Нариман қурбаноф, һаким мусайеф вә иляс әзизоф. Уларниң һәммиси қазақистан командиси тәркибигә киргән. У йәрдә начар тәнһәрикәтчиләр болмайду. Нариман өзиниң шәхсий техникисини көрситип, нам қазанди.» 

Махмуд искәндәроф йәнә гимнастика түрлириниң һәр хил болидиғанлиқи, һәр бир түрниң өз алдиға тәләплири вә техникиси болидиғанлиқини билдүрди. У тәнһәрикәтниң гимнастика түри бойичә юқирида исми аталған уйғур йигитлиридин башқа йәнә карими милад, ербол җантиқоф қатарлиқ талантлиқ тәнһәрикәтчиләрдин көп үмид күтидиғанлиқини оттуриға қойди.

Пикирләр (0)
Share
Толуқ бәт