Уйғур тәшкилатлири, ғулҗа вәқәсини хатириләшкә тәйярланмақта

2008-02-02
Елхәт
Пикир
Share
Принт

Чәтәлләрдә паалийәт елип бериватқан уйғур тәшкилатлири, 1997‏- йили 5‏- феврал күни йүзбәргән ғулҗа вәқәсиниң 11йиллиқини хатириләш үчүн тәйярланмақта.

Дуня уйғур қурултийи мәсуллириниң билдүрүшичә, чәтәлләрдә паалийәт елип бериватқан уйғур тәшкилатлири, хәлқара кишилик һоқуқ тәшкилатлири билән бирликтә, хитай һөкүмитиниң 1997‏- йили 5‏- феврал күни уйғур яшлири тәрипидин ғулҗа шәһиридә тинчлиқ билән елип берилған намайишини қанлиқ бастурғанлиқиға наразилиқ билдүрүш, бастуруш җәрянида вә бастурушниң алди кәйнидә хитай һөкүмити тәрипидин шеһит қилинған уйғур яшлирини хатириләш үчүн, 3‏- 4‏- вә 5‏- феврал күнлири дуняниң һәр қайси дөләтлиридики хитай баш әлчиханилири алдида бир туташ наразилиқ намайишлири шуниңдәк ғулҗа вәқәсини хатириләш паалийәтлири елип баридикән.

Дуня уйғур қурултийи мәсуллириниң хәвәр қилишичә, ғулҗа вәқәсиниң 11 йиллиқи мунасивити билән, голландийидә паалийәт елип бериватқан шәрқий түркистан вәхпи, мәркизи голландийиниң гаага шәһиридики вәкаләтсиз милләтләр вә хәлқләр тәшкилати билән бирликтә 3‏- феврал күни голландийиниң амстердам шәһиридә хатириләш паалийити елип баридикән. Америка, германийә, түркийә, австралийә, шивитсийә, норвигийә вә әнгилийә қатарлиқ дөләтләрдики уйғур тәшкилатлири болса, 5‏- феврал күни хәлқара кишилик һоқуқ тәшкилатлири билән бирликтә, мәзкур дөләтләрдики хитай баш әлчиханилири алдида наразилиқ намайишлири елип беришни қарар қилған.

Хитай һөкүмитиниң билдүрүшичә, 5‏- феврал күни ғулҗа шәһиридә йүзбәргән вәқәдә 10 киши өлгән. Лекин, уйғур тәшкилатлири вә бәзи кишилик һоқуқ тәшкилатлири, мәзкур вәқәдә әң аз икки йүз кишиниң нәқ мәйданда хитай сақчи вә һәрбий қисимлири тәрипидин етип өлтүрүлгәнликини вә миңлиған кишиниң қолға елинғанлиқини баян қилишмақта. Уларниң ейтишичә, ғулҗа вәқәсидин кейин, хитай һөкүмити тәрипидин бу вәқәгә четишлиқ дәп қолға елинип түрмиләрдики қйин - қистақларда өлгән, из-дерәксиз ғайиб болуп кәткән яки хитай һөкүмити тәрипидин өлүмгә һөкүм қилинип өлтүрүлгән уйғурларниң сани нәччә миң кишигә йетидикән. (Өмәр қанат)

Пикирләр (0)
Share
Толуқ бәт