Uyghur teshkilatliri, ghulja weqesini xatirileshke teyyarlanmaqta

2008-02-02
Élxet
Pikir
Share
Print

Chet'ellerde pa'aliyet élip bériwatqan Uyghur teshkilatliri, 1997‏- yili 5‏- féwral küni yüzbergen ghulja weqesining 11yilliqini xatirilesh üchün teyyarlanmaqta.

Dunya Uyghur qurultiyi mes'ullirining bildürüshiche, chet'ellerde pa'aliyet élip bériwatqan Uyghur teshkilatliri, xelq'ara kishilik hoquq teshkilatliri bilen birlikte, xitay hökümitining 1997‏- yili 5‏- féwral küni Uyghur yashliri teripidin ghulja shehiride tinchliq bilen élip bérilghan namayishini qanliq basturghanliqigha naraziliq bildürüsh, basturush jeryanida we basturushning aldi keynide xitay hökümiti teripidin shéhit qilin'ghan Uyghur yashlirini xatirilesh üchün, 3‏- 4‏- we 5‏- féwral künliri dunyaning her qaysi döletliridiki xitay bash elchixaniliri aldida bir tutash naraziliq namayishliri shuningdek ghulja weqesini xatirilesh pa'aliyetliri élip baridiken.

Dunya Uyghur qurultiyi mes'ullirining xewer qilishiche, ghulja weqesining 11 yilliqi munasiwiti bilen, gollandiyide pa'aliyet élip bériwatqan sherqiy türkistan wexpi, merkizi gollandiyining ga'aga shehiridiki wekaletsiz milletler we xelqler teshkilati bilen birlikte 3‏- féwral küni gollandiyining amstérdam shehiride xatirilesh pa'aliyiti élip baridiken. Amérika, gérmaniye, türkiye, awstraliye, shiwitsiye, norwigiye we en'giliye qatarliq döletlerdiki Uyghur teshkilatliri bolsa, 5‏- féwral küni xelq'ara kishilik hoquq teshkilatliri bilen birlikte, mezkur döletlerdiki xitay bash elchixaniliri aldida naraziliq namayishliri élip bérishni qarar qilghan.

Xitay hökümitining bildürüshiche, 5‏- féwral küni ghulja shehiride yüzbergen weqede 10 kishi ölgen. Lékin, Uyghur teshkilatliri we bezi kishilik hoquq teshkilatliri, mezkur weqede eng az ikki yüz kishining neq meydanda xitay saqchi we herbiy qisimliri teripidin étip öltürülgenlikini we minglighan kishining qolgha élin'ghanliqini bayan qilishmaqta. Ularning éytishiche, ghulja weqesidin kéyin, xitay hökümiti teripidin bu weqege chétishliq dep qolgha élinip türmilerdiki qyin - qistaqlarda ölgen, iz-déreksiz ghayib bolup ketken yaki xitay hökümiti teripidin ölümge höküm qilinip öltürülgen Uyghurlarning sani nechche ming kishige yétidiken. (Ömer qanat)

Pikirler (0)
Share
Toluq bet