Хитай дуня сәһийә тәшкилатиниң уйғур елигә бериш тәлипигә җаваб бәрмиди

2005-07-20
Елхәт
Пикир
Share
Принт

Дуня сәһийә тәшкилатиниң чаршәнбә күни мәлум қилишичә, хитай һөкүмити мәзкур тәшкилатниң қуш зукими байқалған уйғур елигә бериш тәливигә җаваб қайтурмиған.

Дуня сәһийә тәшкилатиниң бейҗиңдики ишханисиниң баянатчиси рой вадияниң билдүришичә, һөкүмәт уларниң уйғур елигә бериш тәливини җавабсиз қалдурупла қалмастин йәнә, уларға қуш зукими сәвәбидин өлгән явайи қушларға аит санлиқ мәлуматларни җиддий йәткүзүш чақириқиғиму инкас қайтурғили унимиған.

Вадия сөзидә йәнә, хитайниң чәтәл чақириқиға җаваб бәрмәй турувилишиниң мәсулийәтсизлик икәнликини әйибләп, қуш зукиминиң давамлиқ тарқилишиға болған әндишисини ипадилиди һәмдә хитайдики бу қуш зукиминиң пәсиллик көчидиған қушлар арқилиқ җәнубий асияға һәтта австралийә вә явропағичә тарқилиш еһтималлиқиниң барлиқини әскәртти.

Уйғур елидики қуш зукими кесили бу йил 3 - айда хитайниң бу йәрдики ишләпчиқириш қурулуш армийисиниң деһқанчилиқ -12девизийисидә байқалған болуп, шу сәвәптин бу йәрдики нәччә миң тохулар өлтүрүлгән һәмдә бу район йигирмә нәччә күнгичә башқа җайлардин айривитилгән иди. Әмма хитай һөкүмити узун өтмәйла, бу районда мәзкүр кесәлликниң яхши контрол қиливелинғанлиғини җакарлап, айрип тәкшуруш чарисини бикар қилди.

Дуня сәһийә тәшкилатиниң мәлум қилишичә, бу кесәл инсанларғиму юқидикән. Һәтта асияда 2003 - йилидин башлап һазирғичә болған мәзгилдә йигирмә нәччә киши бу кесәл сәвәбидин өлгән. (Пәридә)

Пикирләр (0)
Share
Толуқ бәт