Kanada bash ministiri xu jintaw bilen körüshkende höseyin jilil mesilisini otturigha qoydi

2006-11-20
Élxet
Pikir
Share
Print

Wyétnamning paytexti xanoyda ötküzülgen asiya ‏- tinch okyan iqtisadiy hemkarliq teshkilati bashliqlar yéghinigha qatnashqan kanada bash ministiri stifan harper, yéghin jeryanida xitay dölet re'isi xu jintaw bilen uchriship, özbékistan teripidin xitaygha tapshurup bérilgen höseyin jilil mesilisini otturigha qoyghanliqini bildürdi.

Kanadada chiqidighan toronto yultuzi gézitining xewer qilishiche, kanada bash ministiri stifan harper yighin heqqide muxbirlargha bergen bayanatida, prézidént xu jintawgha kishilik hoquqni bolupmu kanada puqralirining hoquqini dawamliq qoghdaydighanliqimni ipadilidim, dégen.

Xitay hökümiti gerche, kanada bash ministiri harper bilen xitay dölet re'isi xu jintawning uchrishishida höseyin jilil mesilisining tilgha élin'ghanliqini étirap qilghan bolsimu, emma uchrishishta kishilik hoquq mesilisining kanada bash ministiri éytqandek keng da'iride muzakire qilinmighanliqini ilgiri sürdi.

Xitay tashqi ishlar minsitirliqining bayanatchisi li jyenchaw mezkur uchrishish heqqide bergen bayanatida, uchrishishta höseyin jilil mesilisining tilgha ilin'ghanliqini, emma her ikki terep özlirining bu mesile toghrsidiki köz qarashlirini tekitligenlikini bildürüp "junggoning jilil mesilisidiki köz qarishi éniq. Biz uni xitayche ismi bilen ataymiz. Bizche u bir xitay puqrasi. Shuning üchün béyjing uning mesilisini xitayning ichki jinayet délosi dep qaraydu" dédi.

Xitay tashqi ishlar minsitirliqining bayanatchisi li jyenchawning bayanatini, xitayning kishilik hoquqqa bolghan köz qarishidin kélip chiqqanliqini tekitligen kanada bash ministiri harper, xitay hökümitining bezen kishilik hoquq mesililirini kishilik hoquq mesilisi dep qarimaydighanliqini bildürdi.

Toronto yultuzi gézitining xewiride éytilishiche, kanada bash ministiri harperning xitay dölet re'isi xu jintaw bilen élip barghan söhbitide höseyin jilil mesilisini otturigha qoyghanliqining , bu mesilige qandaq tesir körsitidighanliqi éniq emes, emma höseyin jililning ayali bu xewerni anglap nahayiti xush bolghanliqini we höseyin jililning qoyup bérilishige bolghan ishenchsining köcheygenlikini bildürgen. (Qanat)

Pikirler (0)
Share
Toluq bet