D u q kanada hökümitining hüsenjan jélil mesilige alahide köngül bölüshini telep qildi

2006-06-29
Élxet
Pikir
Share
Print

Dunya Uyghur qurultiyi bayanatchisi dilshat rishit bayanat élan qilip,xitay we özbékistan hökümitining hüsenjan jélil mesiliside élip barghan qanunsiz herikitini qattiq eyiblidi. Shuning bilen birge u yene, kanada hökümitining barliq charilerni ishqa sélip , öz puqrasigha ige chiqishini telep qildi.

Bügün istansimizning ziyaritini qobul qilghan dilshat rishit ependi sözide": bir döletning puqrasini, sewebsizla bashqa bir dölet tewelikige shu döletning jinayetchisi süpitide qayturup bérish xelq'ara qanunlargha xilapliq qilghanliq bolupla qalmastin belki ochuq ‏- ashkara halda yeng ichide sodilishish arqiliq görüge élish jinayiti hésablinidu" dédi. U bu qétimqi Uyghurlarni görüge élish qilmishining shangxey hemkarliq teshkilatining yighinidin kéyinla yüz bergenlikige alahide diqqet qiliwatqanliqini eskertti .

Dunya Uyghur qurultiyining mu'awin re'isi, kanada Uyghur jem'iyiti re'isi memet toxti ependi, hüsenjan jélilning , mart aylirida kanadaning puqraliq pasportini ishlitip a'ilisi bilen birlikte, özbékistan'gha tuqqan yoqlash üchün barghanda , özbékistan teripidin qolgha élin'ghanliqini, uning kanada puqrasi ikenlikini bildüridighan pasportini musadire qilip, andin xitaygha tapshurup bergenlikini bildürdi. Memet toxti ependining éytishiche, bu yolsiz heriket , hüsenjan jélilni xelq'aragha xitay puqrasi qilip körsitish üchün asas yaritip bergen.

Bu arida kanada metbu'atlirida, kanada hökümitining, hüsenjan jélil mesilisini bir terep qilishta barliq diplomatik wastilerni qollinip , xitay hökümitige bésim ishlitiwatqanliqi, bolupmu hösenjan jélilning xitayning qolida ikenlikini éniqlash üchün heriket élip bériwatqanliqi heqqide xewerler élan qilindi.

Özbékistan terep düshenbe küni kanada hökümitige, hüsenjan jélilni xitaygha qayturup bergenlikini melum qilghandin béri, bügün'ge qeder xitay bu heqte héchqandaq inkas bildürmidi. (Eqide)

Pikirler (0)
Share
Toluq bet