Хитай һөкүмити исмайил сәмәтни өлүмгә һөкүм қилди

2006-04-06
Елхәт
Пикир
Share
Принт

Хитай һөкүмити, 2003 ‏- йили пакистан һөкүмити тәрипидин хитайға тапшуруп берилгән исмайил қари вә илһам дәп тонолған исмайил сәмәтни, дөләтни парчилашқа урунған, қанунсиз партлатқуч ясаш җинайити өткүзгән дәп әйибләп, өлүм җазасиға һөкүм қилди.

Әркин асия радиоси мухбириниң игилишичә, смайил сәмәт үрүмчи шәһәрлик оттура хәлқ сот мәһкимиси тәрипидин 2005‏-йили 10‏- айниң 31‏- күни өлүм җазасиға һөкүм қилинған. Лекин сот һөкүмидә, исмайил сәмәтниң әгәр һөкүмгә қайил болмиса, аптоном районлуқ юқири хәлқ сот мәһкимисигә әрз қилалайдиғанлиқи баян қилинған.

Игилишимизчә, урумчи шәһәрлик хәлқ тәптиш мәһкимиси, исмайил сәмәтни, 1997‏- йили 3‏- айда пакистанниң равалпинди шәһиридә һәсән мәхсум қатарлиқ тоққуз киши билән бирликтә "шәрқий түркистан ислам партийиси" ни қуруп чиққан һәмдә мустәқил шәрқий түркистан дөлитини қуруш мәқситидә, муҗаһитлар тәрбийиләш үчүн 1997‏- йили 5‏- айда тунҗи түркүмдики 11 адәмни афғанистанға тәрбийиләшкә апарған, 1997‏- йили 9‏- айда афғанистанда химийивий партлитиш қурулмиси ясашни өгитидиған лиза лагирини қуруп шинҗаңлиқ 100гә йеқин адәмни тәрбийлигән дәп әйиблигән.

Әмма, исмайил сәмәт сотниң пүтүн әйибләшлирини рәт қилип, әйибнамида бекитилгән пакитлар пүтүнләй хата, мән гунаһсиз дегән.

Сотниң һөкүмнамисида баян қилинишичә, исмайил сәмәтниң ақлиғучиси сотта " җавабкар исмайил сәмәткә қанунсиз қорал-ярағ, оқ ‏- дора, партлатқуч ясиған дегән пакитни бекитишниң дәлил-испати толуқ әмәс, гуваһчиларниң гуваһлиқи билән җавабкарниң иқрари өз- ара мас кәлмәйду дәп, исмайил сәмәтни ақлиған. (Әқидә)

Пикирләр (0)
Share
Толуқ бәт