ئۇيغۇر مۇقام ئانسامبىلى ئۆزبېكىستاندا ئويۇن كۆرسەتمەكچى

2006-07-28
ئېلخەت
پىكىر
Share
پرىنت

ئۇيغۇر ئاپتونوم رايونى مۇقام ئانسامبىلى 29 ۋە 30 - ئىيۇل كۈنلىرى ئۆزبېكىستان پايتەختى تاشكەنتتىكى تۈركىستان سارىيىدا ئويۇن كۆرسەتمەكچى. بۇ قېتىمقى كونسېرت كېچىلىكى ئۆزبېكىستاندىكى خىتاي ئەلچىخانىسى، جۇڭگو چەتئەل مەدەنىيىتى جەمئىيىتى، ئۆزبېكىستاندىكى خىتاي مەدەنىيەت مەركىزى، تاشكەنت ئۇيغۇر مەدەنىيەت مەركىزى قاتارلىق ئورگانلار ۋە ئۆزبېكىستاندىكى بىر قىسىم خىتاي شىركەت ۋە رېستۇرانلىرى تەرىپىدىن ئۇيۇشتۇرۇلغان.

بۇ پائالىيەت شۇ كۈنلەردە ئېلىپ بېرىلماقتا بولغان جۇڭگو مەدەنىيەت كۈنى بايرىمىنىڭ بىر قىسىمى بولۇشى مۇمكىن. خىتاي ئەلچىخانىسى بۇ ئاينىڭ 21 - كۈنى ئاخبارات ئېلان قىلىش يىغىنى چاقىرىپ، ئۆزبېكىستاندا جۇڭگو مەدەنىيەت بايرىمى ئۆتكۈزۈلىدىغانلىقىنى ئېلان قىلغان ئىدى. جۇڭگو مەدىنىيەت بايرىمىنىڭ كۈنتەرتىپى بويىچە 28 - ئىيۇلدىن باشلاپ 10 كۈنگىچە جۇڭگو كىنو ھەپتىلىكى ئۆتكۈزۈلمەكچى. ئۇيغۇر مۇقام ئانسامبىلىغا خەن جېڭتاڭ، ئەنۋەر ئابدۇشۈكۈرلەر يىتەكچىلىك قىلغان.

ئۆزبېكىستان مەتبۇئاتلىرىنىڭ خەۋەر قىلىشىچە، سەنئەتچىلەر ئۆزبېك تاماشىبىنلارغا 12 مۇقامنىڭ مەشرەپ قىسىمىنى، كوللىكتىپ ۋە يالغۇز كىشىلىك ناخشا - ئۇسۇللار ھەم زۇنۇن قادىرنىڭ " غۇنچەم" دراممىسىدىن پارچىلارنى ئورۇندايدىكەن.

جۇڭگو ھۆكۈمىتى بۇ يىل كىرگەندىن بېرى، ئوتتۇرا ئاسىيا ئەللىرىدە ئاممىۋىي پائالىيەتلەرنى كۈچەيتمەكتە. بولۇپمۇ ئۆزبېكىستان ھۆكۈمىتى ئۇيغۇر دىنىي زات ھۈسەنجان جېلىلنى خىتايغا ئۆتكۈزۈپ بەرگەندىن كېيىن، ئۆزبېكىستانغا كەينى - كەينىدىن ئاممىۋىي ئۈمەكلەرنى ئەۋەتىشكە باشلىدى. يېقىندا ئۇيغۇر ئاپتونوم رايونىنىڭ بىر سودا- سانائەتچىلەر ئۆمىكى تاشكەنتنى زىيارەت قىلغان. (ئەركىن)

پىكىرلەر (0)
Share
تولۇق بەت