Үрүмчидә өлүмгә һөкүм қилинған бир түркүм мәһбусларниң җазаси иҗра қилинди

2006-06-23
Елхәт
Пикир
Share
Принт

Уйғур аптоном райониниң мәркизи үрүмчидә шәһәрлик оттура сот мәһкимиси тәрипидин өлүм җазасиға һөкүм қилинған бир түркүм мәһбусларниң җазаси, аптоном районлуқ юқири сотниң тәдбиқлишидин кейин 22 - июн күни иҗра қилинди.

Өлүм җазаси иҗра қилинған бу түркүмдики мәһбусларниң 6 нәпири қатиллиқ, басқунчилиқ вә булаңчилиқ җинайәтлиридин әйибләнгән хитай көчмәнлирини асас қилған. Хитай мәтбуатлири бу вәқәни "шәһәрлик оттура сот мәһкимиси өлүм җазасиға һөкүм қилинған бир түркүм җинайәтчиләрниң җазаси иҗра қилинди" дәп хәвәр бәрди вә өлүм җазаси иҗра қилинған яң сиҗи, җу биң, ма йиңҗүн, ли чүнпиң қатарлиқ 6 кишиниң исмини тилға алди. Лекин , аталмиш бу бир түркүм мәһбусларниң мушу 6 киши билән чәклинидиғанлиқини яки бу бир түркүмләр ичидә башқиларниң бар - йоқлиқини вә өлүм җазасиниң милтиқ билән яки зәһәрлик йиңнидә иҗра қилинғанлиқини әскәртмигән.

Хитай дуня бойичә өлүм җазасини кәң көләмдә иҗра қиливатқан дөләт сүпитидә хәлқара җәмийәтниң тәнқидигә учримақта. Мутәхәссисләрниң пәрәз қилишичә, хитайда йилиға аз дегәндә 10 миң адәм өлүм җазасиға һөкүм қилиниши мумкин. Лекин хитай һөкүмити өлүм җазасиға һөкүм қилинғанларниң санини дөләт мәхпийәтлики қатарида һазирғичә елан қилип бақмиди.

Хитай даирилири илгири өлүм җазасини тәдбиқлаш һоқуқини алий сот өткүзүвалидиғанлиқини җакарлиған. Лекин, хитай мәтбуатлири юқириқи кишиләргә берилгән өлүм җазасини "юқири сотниң тәдбиқлишидин кейин" иҗра қилинди, дәп язди. (Әркин)

Пикирләр (0)
Share
Толуқ бәт