Қизилсу аптоном областидин 60 миң деһқан ишқа орунлаштуруш баһанисида юртидин йөткәлди

2007-11-27
Елхәт
Пикир
Share
Принт

Шинхуа ториниң 27 - ноябир хәвиридин ашкарилинишичә, бу бир йил ичидә қизилсудин икки миңдин артуқ деһқан, хитай һөкүмитиниң йеза ешинча әмгәк күчлирини сиртларға йөткәп ишқа орунлаштуруш сиясити буйичә хитайниң җеҗяң, җяңсу, тйәнҗин, хебей қатарлиқ җайлиридики завутларға йөткәлгән.

Игилинишичә, 2007 - йили бир йил ичидила мушу хил сиясәт билән қизилсуниң һәр қайси наһийә ‏- йезилиридин 60 миңдин артуқ деһқан йәрлирини ташлап сиртларға йөткәлгән. Хәвәрдә дейилишичә, мәзкүр сиясәтни әмәлийләштүрүшкә мәсул орунлар йәниму көп деһқан ‏- чарвичиларни киримини өстүрүш үчүн юртини ташлап сиртларға берип иш издәшкә риғбәтләндүрүватқан болуп, болупму хитай өлкилиригә йөткилишни бәкрәк тәвсийә қилмақта икән. Қизилсу области даирилири нөвәттә һәр бир аилидин бирни сиртқа йөткәш сияситини қоллинип, йеза әмгәк күчлирини йөткәп ишқа орунлаштурушни җиддий давам қилмақта икән.

Қизилсу, қәшқәр, хотән һәмдә ақсудин ибарәт уйғурлар зич олтурақлашқан җайларни,хитай даирилири әмгәк күчини хитайға йөткәш пиланини йөргүзидиған әң асаслиқ "бир област, үч вилайәт "дәп елан қилған иди.

Хитай һөкүмитиниң пилани буйичә, бу йил уйғур елиниң мушу бир области вә үч вилайитини асас қилип йезилардин, хитай өлкилиригә йөткилидиған әмгәк күчлири санини, бир милйон икки йүз миңға йәткүзмәкчи шундақла асаслиқи 18 яштин 25 яшқичә болған уйғур қизлирини асас қилип йөткимәктә.

Хитай һөкүмитиниң никаһ йешидики қизларни түркүмләп етник районидин йөткиши кишилик һоқоқ тәшкилатлири тәрипидинму, ерқий тазилаш характерини алған һәрикәт дәп әйибләнмәктә. (Гүлчеһрә)

Пикирләр (0)
Share
Толуқ бәт