2008 - Йилда уйғур елидә сиртларға йөткәп ишқа орунлаштурулидиғанлар бир милйон икки йүз миң адәм қетимға йәткүзүлмәкчи

2008-03-04
Елхәт
Пикир
Share
Принт

Шинхуа агентлиқиниң сәйшәнбидики уйғур елигә даир хәвиридин ашкарилинишичә, 3 - март күни кәчтә, хотән вилайитиниң һәр қайси наһийә, йезилиридин тәшкилләнгән төт йүздин артуқ уйғур қизлар ишләмчилик үчүн үрүмчи вогзалидин шәндуң, хубей қатарлиқ өлкиләргә йолға селинған.

Хәвәрдә ейтилишичә, 2008 - йилда хитай һөкүмити уйғур елидә сиртларға йөткәп ишқа орунлаштурулидиғанларни йәнә бир милйон икки йүз миң адәм қетимға йәткүзүшни пиланлиған болуп, нөвәттә даириләр чиңдав, йәнтәй қатарлиқ җайлардики завутлар билән ишләмчи йөткәш келишимлирини түзүп, буниң үчүн уйғурлар зич олтурақлашқан районлардин қәшқәр, хотән, қизилсу қатарлиқ җайларни асас қилип ишләмчиләрни тәшкиллимәктә икән.

Уйғур аптоном районлуқ әмгәк назаритиниң ашкарилишичә, йеза ешинча әмгәк күчлирини сиртларға йөткәш, һөкүмәтниң деһқанларниң киримини ашурушта қоллиниватқан тәдбири болуп, 2005 - йили уйғур елидә сиртларға йөткәп ишқа орунлаштурулғанлар 486 миң адәм‏- қетим болған болса, 2006 ‏- йилидин башлап хитай һөкүмити һәр йилда бир милйон икки йүз миң адәм ‏- қетимға йәткүзүшни пиланлиған вә шу буйичә орунлап келиватқан болуп, 2007 - йили һәтта бу пилан ашуруп орунлинип сиртларға йөткилип ишқа орунлаштурулған йеза ешинчә әмгәк күчлири бир милйон 450 миң адәм ‏- қетимға йәткән. Болупму, уйғур елиниң җәнубидики үч вилайәт вә бир областидин йөткәлгән әмгәк күчлири 774миң икки йүз адәм ‏- қетимға йәткүзүлгән.

Уйғур елидин игилигән мәлуматлиримиздин ашкарилинишичә, хитай һөкүмити ешинча йеза әмгәк күчлирини сиртларға йөткәп ишқа орунлаштуруш баһанисидә асасән 18 яштин 25 яшқичә болған уйғур қизлирини асас қилип, түрлүк васитиләрни қоллинип хитай өлкилиридики завутларға йөткәш елип барған болуп, сиртларға йөткәлгән уйғур қизларниң әмгәк һәм кишилик һоқуқлириниң охшимиған дәриҗидә дәхлигә учраватқанлиқи мәлум.

Дуня уйғур қурултийи рәиси рабийә қадир болса, хитайниң той һәм туғут йешидики яшларни өз маканлиридин айрип яд муһитқа түркүмләп йөткәйдиған бу сиясити ирқий ассимилятсийә сияситидин башқа нәрсә әмәс дәп көрсәтмәктә. (Гүлчеһрә)

Пикирләр (0)
Share
Толуқ бәт