Хитай һөкүмити 2008 - йиллиқ йеза хизмити пиланида яшларни хитай өлкилиригә йөткәшни давамлаштурмақчи

2008-01-08
Елхәт
Пикир
Share
Принт

Уйғур ели һөкүмәт тор бәтлиридин ашкарилинишичә, уйғур аптоном районлуқ 2008 - йиллиқ йеза хизмәт йиғини,4 - вә 5 - январ үрүмчидә чақирилған болуп, йиғинда, хитай һөкүмитиниң уйғур ели йезилирида бу бир йил йүргүзидиған муһим сиясәт һәм хизмәтлири елан қилинған.

Йиғин һәққидики хәвәрләрдин мәлум болушичә, йеза ешинча әмгәк күчлирини сиртларға йөткәп ишқа орунлаштуруш сиясити 2008 - йилдики әң муһим хизмәт пилани ичигә киргүзүлгән болуп, хитай һөкүмити бу йил йәнә,сиртларға йөткәп ишқа орунлаштурулидиған йеза әмгәк күчлирини бир милйон 500 миң адәм ‏- қетимға йәткүзгәндин башқа, турақлиқ һалда 300 миң ешинча әмгәк күчлирини сиртларға йөткәп ишқа орунлаштурушқа капаләтлик қилиш пиланини ишқа ашурмақчи икән.

Мәлум болушичә, хитай һөкүмити 2007 - йилида уйғур елидин сиртларға йөткәп ишқа орунлаштурған йеза ешинча әмгәк күчлирини бир милйон икки йүз миң адәм ‏- қетимға йәткүзгән. Хитай һөкүмити тәрипидин уйғур деһқанлирини намратлиқтин қутулдуруштики муһим тәдбир дәп тәриплиниватқан уйғур йеза әмгәк күчлирини хитай өлкилири һәмдә башқа юртларға йөткәп ишқа орунлаштуруш сияситини әмәлийләштүрүш җәрянида асасән 18 яштин 25 яшқичә болған уйғур йеза қизлирини асас қилип,хитай өлкилиригә мәҗбурий йөткигән болуп,уларниң һәқ ‏- һоқуқлири еғир дәхлигә учриған, бу уйғурларда күчлүк наразилиқ қозғиған болуп, кучада һәтта мушу сәвәбтин хәлқ һөкүмәткә қарши наразилиқ намайиши елип барған иди.

Америка авам палата әзалири йеқинда хитай һөкүмитиниң уйғур елидә йүргүзүватқан мәзкур сияситини, уйғурларға қарита ирқий қирғинчилиқ түсини алған бир сиясәт дәп әйиблигән иди. Хитай һөкүмити өткән йили асасән қәшқәр, хотән, қизилсу һәмдә ақсудин ибарәт уйғурлар әң зич олтурақлашқан җайларни асас қилип уйғур қизлирини ишқа орунлаштуруш баһанисидә хитай өлкилиригә йөткигән болуп,қәшқәр һөкүмәт ториниң 8 - январдики хәвиридин ашкарилинишичә, қәшқәр вилайитидин өткән бир йилда сиртларға йөткәлгәнләр 606 миң адәм ‏- қетимға йәткүзүлгән. (Гүлчеһрә)

Пикирләр (0)
Share
Толуқ бәт