Ваң лечүән йеңи йиллиқ чай зияпитидә муқимлиқни тәкитлиди

2007-12-30
Елхәт
Пикир
Share
Принт

29 - Декабир күни кәчтә уйғур аптоном районлуқ сиясий кеңәш чай зияпити өткүзгән болуп, буниңға уйғур аптоном районлуқ компартийә комитети, һөкүмәт, ишләпчиқириш қурулуш армийиси, уйғур елидә турушлуқ хитай азадлиқ армийиси, сода-санаәтчиләр вә һәр қайси саһәләрниң бир қисим вәкиллири иштирак қилған.

Хитай компартийиси мәркизий комитети сиясий бюросиниң әзаси, аптоном районлуқ партком секритари ваң лечүән мәхсус тәбрик сөзи сөзләп, уйғур аптоном райониниң өткән бир йиллиқ һәр саһәдики хизмәтлири вә утуқлириға юқири баһа бериш билән биргә партийә мәркизий комитетиға вакалитән һәр саһәдин, болупму азадлиқ армийә, қораллиқ сақчи қисимлири һәм ишләпчиқириш қурулуши армийисидин алаһидә һал сорайдиғанлиқи вә уларға салам йоллайдиғанлиқини изһар қилған.

Шинхуа агентлиқиниң бу һәқтики хәвиридә көрситилишичә, ваң лечүәнниң сөзидә йәнә миллий иттипақлиқ вә муқимлиқ мәсилиси алаһидә орунни игилигән болуп, у сөзидә " биз мәркәзниң шинҗаңниң муқимлиқини қоғдашқа аит чиқарған бир қатар зор сиясәтлирини техиму чоңқур һалда әмәлийләштүрүшимиз лазим. Байриқимиз рошән һалда миллий бөлгүнчилик вә қанунсиз диний паалийәтләргә қарши туруп, иҗтимаий вә сиясий аманлиқни қәтий тәврәнмәй қоғдишимиз керәк" дәп тәкитлигән.

Бу йиғинға 28 - декабир күни аптоном районниң рәислик вәзиписидин қалдуриветилгән исмаил тиливалдиниңму қатнашқанлиқи мәлум. Бирақ, униң һазир уйғур районида һечқандақ рәһбирий салаһийити йоқ болуп, униң орни қош тиллиқ маарип нами астида уйғур маарипи вә тилини йоқитишниң вә уйғур сиясий һәрикәтлиригә зәрбә беришниң байрақдари дәп тәриплинип келиватқан 46 яшлиқ нур бәкри игилигән иди. Исмаил тиливалдиниң вәзипә өтәш муддити тошмай туруп, туюқсиз вәзиписидин қалдуриветилиши уйғурлар арисида түрлүк инкасларни қозғимақта. (Үмидвар)

Пикирләр (0)
Share
Толуқ бәт